Баайаҕа нэһилиэгэр бэс ыйын 28, 29 күннэригэр бильярд спордунан утумнаахтык дьарыктаммыт, кэккэ ситиһиилэммит Андрей Николаевич Попов сырдык кэриэһигэр улуустааҕы аһаҕас бильярд турнира ыытылынна. Бу турнирга кытта улуус нэһилиэктэриттэн, Дьокуускай куораттан Андрейы кытта бэйэтин кэмигэр иэмэх курдук тардыаласпыт, кыайыы өрөгөйүн, хотторуу хомолтотун бииргэ үллэстибит табаарыстара, бу спорт көрүҥүн сэҥээрээччилэр мустубуттар.
15-с үйэҕэ Азияҕа (сорохтор Китай, сорохтор Индия) үөскээбит көрүҥ Арассыыйаҕа 18-с үйэ саҥатыгар кэлбитэ. Петр-I Голландияҕа сылдьан, бу оонньууну биһирээн, бэйэтигэр бильярд остуолун оҥотторон, иллэҥ кэмигэр оонньуур дьарык оҥостуммут. Саха сиригэр Аҕа дойду сэриитин кэнниттэн үөдүйбүтэ. Аан бастаан куорат пааркатын буфетыгар хас да бильярднай остуол турбута, онно кэлээччи-барааччы оонньоон ааһара. Ити курдук, бильярд биһиги олохпутугар бигэтик киирэн, дьон сынньалаҥын биир көрүҥэ буолбута. Салгыы спорт көрүҥүн быһыытынан сайдан, турнирдар, күрэхтэһиилэр ыытыллаллар.
Баайаҕаҕа кулуупка 70-с сылларга бильярднай остуол баара, онно үлэ быыһыгар, киэһэтин үлэһит ыччат оонньуура. Билигин спорт энтузиаґа Анатолий Герасимович Андросов Баайаҕатааҕы бильярднай кулуубу салайар, общественнай тэрийээччи быһыытынан элбэх күрэхтэһиилэри тэрийэр.
Андрей Николаевич Попов бэс ыйыгар 50 сааһын бэлиэтиэхтээх этэ да, дьылҕа-хаан оннук үөрүүнү анаабатах. Ол оннугар, аһаҕас турнир ыытыллан, аймахтара, бииргэ төрөөбүттэрэ, оҕолоро хайдах эрэ Андрей баҕатын толорбут, кини аатын кэриэстээбит, үйэтиппит курдук санаан үөрдүлэр. Андрей сөбүлээн дьарыктаммыт бильярд оонньуутун дьоҥҥо-сэргэҕэ тиэртибит диэн астыналлар. Турнир кэмигэр Андрей Николаевич оҕолоро бильярд оонньуутун сэҥээрэн көрдүлэр, аҕаларын туһунан истиҥ ахтыылары долгуйа иһиттилэр. Аҕабыт 50 сааһын туолуутугар элбэх кыттааччылаах, улахан бириистээх турнир ыытыллыбыта диэн ахта-саныы сылдьыахтара диэн эдьиийдэрэ олус эрэнэллэр. Баҕар, аҕаларын суолун солоон, аатын ааттатар бильярдист да тахсыан сөп буоллаҕа.
Икки күннээх сытыы киирсии кэнниттэн миэстэлэр маннык буоллулар.
Бэтэрээннэргэ:
1м. Хаптагаев Семен, Туора Күөл.
2 м. Андросов Анатолий, Баайаҕа.
3 м. Луковцев Эльфидипор, Дэбдиргэ.
Эр дьоҥҥо:
1 м. Афанасьев Прокопий, Ытык Күөл.
2 м. Оконешников Афанасий, Ытык Күөл.
3 м. Луковцев Станислав, Баайаҕа-Дьокуускай.
Утешительнай оонньууга:
1 м. Шамаев Феликс, Баайаҕа-Дьокуускай.
2 м. Никитин Афанасий, Баайаҕа
3 м. Васильев Афанасий, Баайаҕа.
Андрей Попов кэриэһигэр ыытыллар улуустааҕы аһаҕас бильярд турнирын спонсордарынан буоллулар: «Баайаҕа нэһилиэгэ» МТ дьаһалтата, «Баайаҕа уолаттара» куйаар ситимин бөлөҕө, Баайаҕа бильярдистара, «Аллан» маҕаһыын, Андрей бииргэ үөрэммит оҕолоро уонна табаарыстара, кэргэнин Лидия бииргэ үөрэммиттэрэ уонна дьүөгэлэрэ, Степанида Христофоровна Мандарова дьиэ кэргэнэ, Семен Андросов, Агаша Ионова-Шамаева, Артем Хатылаев, Георгий Андросов, Валерий Яроев, бырааттара Антон, Дмитрий Поповтар уонна бииргэ төрөөбүттэрэ, аймахтара.
Андрей эдьиийэ Мария Николаевна Макарова санаатын үллэстэр: «Күрэхтэһии үрдүк таһымнаахтык ааспытыттан бары үөрдүбүт, астынныбыт. Хас биирдии сытыы киирсиигэ бэйэм оонньообут курдук сананным, долгуйдум. Күрэхтэһэ кэлбиттэр бары астынан, бырааппыт туһунан үтүө тылы ахтан барбыттарыгар махтанабын. Андрейбыт кэриэһигэр ыытыллыбыт күрэхтэһии үрдүк таһымнаахтык барыытыгар күүс-көмө, тирэх буолбут спонсордарбытыгар муҥура суох махтанабыт. Бу курдук өрүү түмсүүлээх буолуҥ, доруобай, чэгиэн туруктаныҥ, олоххутугар дьол-соргу аргыстаныҥ!».
Анатолий Герасимович Андросов тэрийэр күрэхтэһиилэрэ киэҥ ыырданан, элбэх оонньооччуну хабан, сураҕыра турдун диэн алгыыбын!
Маргарита Егорова, хаһыат общ. корр.