Бу сыл олунньу 18 күнүгэр П.А.Ойуунускай аатынан судаарыстыбаннас музейыгар «Кинилэр Өрөспүүбүлүкэ саргытын түстээбиттэрэ» бырайыакпыт чэрчитинэн «Ийэ тыл уонна сурук-бичик күнүгэр» анаммыт онлайн- тэрээһиҥҥэ үс улуус Таатта Чөркөөҕө, Нам Хатырыга уонна Үөһээ Бүлүү сэлиэнньэтин N-1нүөмэрдээх орто оскуолатын үөрэнээччилэригэр телемост буолла. Тэрээһин саҕаланыытыгар хас биирдии оскуола оҕолоро төрөөбүт тылбытыгар анаммыт хомоҕой хоһоонунан эҕэрдэлэстилэр. Туһааннаах судаарыстыбаннас музейдарын специалистара бииртэн биир иһитиннэриилэри оҥордулар. Ол курдук П.А.Ойуунускай тыл сайдыытыгар үлэтин туһунан иһитиннэриини музей специалиһа С.С.Халгаева, И.Н.Барахов төрөөбүт тыл дьылҕатыгар үлэтин музей специалиһа Е.П.Семенова, М.К.Аммосов аатынан судаарыстыбаннас музейыттан чаҕылхай Махсыым тылга сыһыанын, үлэтин С.А. Дьяконов иһитиннэрдилэр.
Бырайыагы иилээн-саҕалаан үлэлэтэр Э.Х.Кашкина бэлиэтээбитинэн: «Быйыл төрдүс үөрэх сылын «Кинилэр Өрөспүүбүлүкэ саргытын түстээбиттэрэ» сетевой бырайыакпыт үлэлиир. Быйылгы үөрэх дьылыттан бырайыакпыт ис хоһооно кэҥээн «Саха сирин судаарыстыбаннаһын
саҥа кирбиитигэр» диэн ааттанна. Саха сиригэр Автономияны олохтообут бас-көс дьоммутугар холбуу тутан, саҥа үйэ кирбиитигэр сүҥкэн уларытыылары киллэрбит, төрөөбүт төрүт сирбит барҕара сайдарыгар күүстээх үлэни ыыппыт, тэрийбит Саха сирин бастакы Президенэ М.Е.Николаевы үөрэтиини киллэрдибит.
Бу саас былаан быһыытынан, Хаҥалас улууһугар Николаев-кииҥҥэ ыалдьыттаан, салгыы биир ситимнээхтик үлэлииргэ дуогабар түһэрсиэхпит», — диэтэ. Онон саха саргытын түстээбит Улуу дьоммутун бииртэн биир үлэлэрин салгыы үөрэтэн, саҥа көлүөнэҕэ билиһиннэрэр, өйдөтөр сыаллаах-соруктаах бырайыакпыт суолтата кэҥиир. Манна даҕатан бэлиэтээтэххэ, төрдүс сылын П.А.Ойуунускай, М.К.Аммосов, И.Н.Барахов аатын сүгэр оскуолалар уонна судаарыстыбаннас музейдара бииргэ үлэлиир бырайыакпыт буолар. Салгыы М.Е.Николаев аатынан Николаев-киин уонна оскуола бу бырайыакка кыттыһыахтара.
С. Халгаева.