Кулун тутар 4 күнүгэр быйылгы Өрөспүүбүлүкэбитигэр биллэриллибит «Дьиэ кэргэн» сылынан «Чолбон» сурунаал үлэһиттэрэ ыытар Республиканскай «Чолбон өй күрэһэ» сүүмэрдиир интеллектуальнай оонньууларыгар киирэн ийэм Изабелла Ивановна, эбэм Варвара Константиновна Карбаканова буолан үһүөн кытынныбыт. Улууспутут нэһилиэктэриттэн тоҕус дьиэ кэргэнтэн үс көлүөнэнэн кытынна. Оонньуу улууспут Иван Аргунов аатынан библиотекаҕа ыытылынна.
Оонньуу түөрт түһүмэҕинэн ыытылынна. Бастакы түһүмэх — » Саха литературатын төрүттээччилэр айымньыларыттан ыйытыылар», иккис түһүмэх — » саха уус — уран литературатын төрүттээччилэр», үһүс түһүмэх — » Саха литературата сэрии уонна сэрии кэннинээҕи кэмнэргэ», төрдүс түһүмэх — «Билиҥҥи кэмнээҕи литература».
Түһүмэхтэр бэрт түргэнник уонна чаҕылхайдык аастылар. Уон биэс эрэ сөкүүндэ бэриллэр уонна эппиэтэ тута көстөр. Ол иһин инник күрэххэ сытыы уонна түргэн буолуохха наада эбит. Холобур мин эбэм кырдьаҕас киһи мөлтөхтук истэр, ол иһин ыарырҕатта. Оонньууну сүрүн редактор, суруйааччы Андросов Гаврил Гаврильевич иилээн — саҕалаан ыытта, хас биирдии кыттааччыны кытта болҕомто ууран кэпсэттэ, хаартыскаҕа түстэ. Биһиэхэ автографтаах бэйэтин хоһоонун хомурунньугун бэлэх уунна. Эбээбит Баайаҕатын дьонун көрсөн ирэ — хоро кэпсэтэн олус үөрдэ, астынна.
Бастыкы миэстэ Кустуровтар — Баайаҕа дьиэ кэргэнэ буолла, иккис миэстэ — Ытык Күөлтэн Бурмистровтар, үһүс миэстэ — Дьүлэйтэн Никитиннэр дьиэ кэргэн ыллылар.
Күрэхтэһиигэ кыттаммын элбэҕи биллим, өссө да үгүһү билиэхпин, ааҕыахпын баҕардым. Онон инникигэ маннык күрэхтэһиилэр өссө да ыытыллаллара буоллар кыттыахпын сөп эбит диэн иэйиигэ куустардым.
Ангелина Данилова, 10 кылаас. Таатта улууһун Уолба орто оскуолата.