Арай биирдэ улуус остолобуойугар табаарыһым Егор Васильевич Захаров үбүлүөйүгэр төрөөбүт күнүгэр ыҥырылынным. Кэлин ааспытын кэннэ көрсөн тоҕо эбитэ буолла, бэйэм да билбэппин. «Төрөөбүт күнҥүн Эн туох ис хоһоонноон бэлиэтээтиҥ, төрөөбүт күн тоҕо хайаан да бэлиэтэниэхтээҕий?” — диэн ыйыттым. Онно кини эппиэттээбитэ: «…Дьоммун-сэргэбин, үлэһиттэрбин үлэлэрин, кыһамньыларын бэлиэтээри…» — диэтэ. Онно биирдэ өйдөөтүм тоҕо итинник бырааһынньыгын тэрийбитин. Ол да иһин саҕаланыытыгар бэйэтэ тахсан дьонун кытта дорооболоһон, махтанан баран, уоттаах-төлөннөөх тыл эппитэ. Онтон Министиэристибэлэр анал бэлиэлэрин туттартаабыта. Махтал суруктарын, бэлэхтэрин туттартаабыта. Дьэ элбэх киһи бэлиэтэммитэ. Адьас улахан мунньах курдук буолбута. Олохтоох дьон үлэлэрэ сыаналанан, үөрүү-көтүү, харыс үрдээһинэ буолта. Бастаан аахайбатаҕым, кэлин өйдөөбүтүм, бэйэтин төрөөбүт күнүн эрэ буолбакка, дьонун мунньан, сомоҕолоон, тыл этэн, үлэһит дьонун убаастаан үтүө да киэһээни бэлэхтээбит эбит. Түмсүүтүн ис хоһооно итиннэ сыппыт эбит. Төрөөбүт күнэ онно олук эрэ курдук ааспыт эбит, бастаан кырдьык тугу да өйдөөбөтөҕүм, дьону кытта тэҥҥэ үөрэн-көтөн табаарыһым төрөөбүт күнүн бэлиэтииригэр сырыттым дии санаабытым. Онтон бэйэтэ быһааран биэрбитигэр, дьэ кырдьык биирдэ өйдөөбүтүм, туохха барытыгар бастаан киһи, онтон дьэ атына буоларын. Дьоннорун санаатын табан, дьонноругар күүс-уох эбэн, ыллатан, үҥкүүлэтэн, бэйэтэ оһуохай этэн-таһааран, дьэ бэрт да бырааһынньык буолта. Мин буоллаҕына биир киһи, төһө да табаарыһым буолтун иһин, төрөөбүт күнүн бэлиэтии сылдьабын. Дьэ буолар да эбит этэ, дьон санаата кэлэн үөрэн-көтөн, мустан, илии илииттэн тутуһан оһуохайдаан киэһээни түмүктээбитэ, оһуобай этэ…
Г.И.Каприн, үлэ ветерана, улуус бочуоттаах олохтооҕо.
PS: бу суруйууну бэчээттээбиппит түбэһиэхчэ буолбатах, үтүө аатын үйэлэргэ хаалларбыт Таатта биир чаҕылхай киһитэ, улахан салайааччыта Егор Васильевич Захаров баара буоллар бу олунньу 2 күнүгэр 80 сааһын туолуохтааҕа. Кини сырдык олоҕо оҕолоругар, сиэннэригэр салҕанар.