Олоҥхоҕо этиллэр Дьүлэй нэһилиэгин, Таатта бастакы дьоруойа төрөөбүт-үөскээбит, үөрэммит, улааппыт туорах саҕа Туора Күөл дьоно-сэргэтэ Наммара үрэх үрдүгэр уоттара сандаарар билии кыһатыгар Россияҕа Дьиэ кэргэн, Саха Республикатыгар Оҕо саас, Таатта улууһугар Таптал, Эрэл, Итэҕэл, Дьүлэй нэһилиэгэр Аҕа сылын түмүктүү, Аҕа дойдуну көмүскээччилэр сылларын алҕаан арыйа муһуннулар. Тохсунньу 27 күнэ, бары билэрбит курдук, Ленинград куорат блокадаттан босхоломмута 81 сааһын бэлиэтиир ытык суолталаах күн. Итини тэҥэ 2025 сылга ыам ыйын 9 күнүгэр кэскиллээх, эйэлээх толкуйдаах киһи-аймах харах уулаах, долгуйан туран, ааспыты анааран, Россия ийэ сир хорсун буойуттарыгар махтанан, Улуу Кыайыы 80 сылын көрсөр. Онон оскуола коллектива уонна нэһилиэк администрацията толкуйдаабыт, торумнаабыт, иилээн-саҕалаан ыыппыт тэрээһинэ мустубут дьону барытын биир санаанан түмтэ — Ийэ дойдуга муҥура суох таптал, кини сайдарын туһугар күннэтэ олоруу, үлэлээһин, үөрэнии. Тупсаҕайдык киэргэммит саалаҕа түмсүбүт төрөппүттэр, уһуйаан иитиллээччилэрэ, үөрэнээччилэр, иитээччилэр, учууталлар, нэһилиэк олохтоохторо сүһүөхтэригэр туран, оскуола бастыҥ ырыаһыт үөрэнээччилэрин, учууталларын толорууларыгар Россия, Саха сирин уонна Таатта улууһун гимнэрин иһиттилэр. Россия киэҥ киэлитигэр, тыйыс кыһыннаах, итии сайыннаах, муҥура суох баай Сахабыт Сиригэр айа-тута, үүнэ-сайда, Эрэл. Итэҕэл. Таптал. күүстэринэн күннэтэ үөрэн, кэскили түстүү олорорбутуттан киэн туттуу иэйиитэ барыбыт сүрэхпитигэр сүппэттии иҥтэ.
Дьоро күнү нэһилиэк баһылыга Осипов Олег Дмитриевич арыйда. Кини нэһилиэк элбэх оҕолоох ыалларын Туйаара, Семен Захаровтар, Виолина, Егор Егоровтар күн күбэй ийэлэригэр «Герой – ийэ» үрдүк аатын ылбыттарынан эҕэрдэлээн туран анал бэлэхтэри туттарда. Бу кэннэ бырааһынньыктыы кэрэтик киэргэммит сыанаттан, Олег Дмитриевич илиититтэн истиҥ тыллаах махтал суруктары туттулар Дьүлэй нэһилиэгин бастыҥ ыаллара:
«Дойдуга бэриниилээх буолууга бастыҥ дьиэ кэргэн» — Варвара Николаевна, уола Россия Геройа Родимир Дмитриевич Максимовтар;
«Бастыҥ эдэр дьиэ кэргэн» — Татьяна Васильевна, Гаврил Гаврильевич Евграфовтар;
«Оҕо иитиитигэр бастыҥ дьиэ кэргэн» — Виолина Леонидовна, Егор Янсонович Егоровтар;
«Үөрэх эйгэтигэр ситиһиилээх бастыҥ дьиэ кэргэн» — Октябрина Егоровна, Евгений Викторович Неустроевтар;
«Искусство кэрэ эйгэтигэр ситиһиилээх бастыҥ дьиэ кэргэн» — Любовь Васильевна, Дмитрий Семенович Ефимовтар;
«Спорт, чөл олох эйгэтин бастыҥ дьиэ кэргэнэ» — Октябрина Ивановна, Семен Ильич Хаптагаевтар;
«Уол оҕону иитиигэ бастыҥ дьиэ кэргэн» — Сардаана Васильевна, Петр Романович Чупровтар;
«Кэтэх хаһаайыстыбаны сайыннарыы эйгэтин бастыҥ дьиэ кэргэнэ» — Туйаара Станиславовна, Семен Семенович Захаровтар;
«Энергетика уонна олох-дьаһах хаһаайыстыба эйгэтин үлэһиттэрин бастыҥ дьиэ кэргэнэ» —Анастасия Александровна, Афанасий Александрович Потаповтар;
«Атыы-эргиэн эйгэтин бастыҥ дьиэ кэргэнэ» — Наталья Михайловна, Юрий Петрович, Петр Юрьевич Турниннар.
Иван Николаевич Гуляев аатынан орто оскуола директора Гуляева Оксана Николаевна оскуола үөрэнээччилэрин, учууталларын 2024 сыллааҕы араас хайысхалаах, Россия, Аан Дойду таһымнаах ситиһиилэрин киэн тутта, долгуйа аҕынна. Оскуола, нэһилиэк олоҕун чаҕылхай түгэнинэн биллэн туран үөрэнээччибит Максимов Родимир Дмитриевич Анал байыаннай дьайыы кыттыылааҕа, ефрейтор, кыргыһыы хонуутугар хорсун быһыытын иһин Россия Геройун Кыһыл көмүс сулуһунан наҕараадаламмыта буолара чопчу бэлиэтэннэ. Оскуола директора 2024 сыл 10 бастыҥ үөрэнээччилэрин биир биир ыҥыртаан сыанаҕа муста, дипломнары, сертификаттары туттарда:
- Далаана Туласынова (2 кылаас);
- Айгылаан Ефимов (3 кылаас);
- Айаана Кононова (4 кылаас);
- Ганя Гуляев (5 кылаас);
- Давиид Кузьмин (6 кылаас);
- Денис Неустроев (7 кылаас);
- Мичийэ Хаптагаева (8 кылаас);
- Семен Меркурьев (9 кылаас);
- Эрчим Евграфов (10 кылаас);
- Айталина Васильева (11 кылаас);
Оҕолор үөрэх-билии, наука, спорт, үҥкүү, ырыа эйгэлэригэр үрдүк ситиһиилэрэ барыта ааттанан мустубут дьону сөхтөрдө, үөртэ. Оксана Николаевна оскуола бары хайысханы хабар кыайыылаах-хотуулаах үлэтин төһүү күүһүнэн кэскиллээх толкуйдаах төрөппүттэр буолалларын бэлиэтээтэ.
Дьоро киэһэни образцовай «Дьиэрэҥкэй» ансамбльга дьарыктанар кыргыттар «Кыталыктар» үҥкүүлэрэ киэргэттэ. Россия Геройун Родимир Максимов ийэтэ В.Н.Максимова «Үрүҥ туллук» волонтердар республикатааҕы бырайыактара үлэлээн эрэрин туһунан сырдатта, анал байыаннай дьайыы байыастарын төрөппүттэригэр, дьиэ кэргэттэригэр Егоровтарга, Неустроевтарга, Бояровтарга туус маҥан туллук бэлиэлэри бэлэхтээтэ. Бырааһынньыктыы тэрээһин биир саамай кэрэхсэбиллээх түгэнинэн анаан бэлэмнэммит «Айыы дьоно, умнумаҥ!» театрализованнай дьүһүйүү буолла. Дьүһүйүүнү оскуола учууталлара Л.Э.Егорова, В.Д.Павлова суруйан, толкуйдаан туруордулар. Музыкальнай киэргэтиитин ырыа учуутала Г.К. Васильев оҥордо. Дьүһүйүүгэ талааннаах учуутал А.И. Меркурьев, эдэр артыыстар Эрчим Евграфов, Нарина Кузьмина, Далаана Данилова, Анфиса Бучугасова итэҕэтиилээхтик оонньоотулар уонна уус-уран ааҕыынан утумнаахтык дьарыктанар 6, 7 кылаас уолаттара сэрии ыар сылларын түһүмэхтэрин туһунан кэпсээтилэр. Көрөөччүлэр бары иһийэн олорон иһиттилэр. Дьиҥ чахчы, туох да умнуллубат, ким да умнуллубат.
Үөрүүлээх тэрээһин түмүгэр мустубут дьон бары «Блокада килиэбэ» акцияҕа кыттыыны ылан испиискэ хоруопкатын саҕа хара килиэби уонна саллаат аһын — гречка хааһыны сиэтилэр. Онтон төрөппүттэри, учууталлары, оҕолору, нэһилиэк олохтоохторун минньигэс тордунан оскуола минньигэс астаах буфетын үлэһиттэрэ күндүлээтилэр.
Үөрүүлээх тэрээһин кэнниттэн аҕалар уонна уолаттар военизированнай эстафетаҕа, улахан кылаас кыргыттара, уолаттара, ийэлэри, аҕалары кытта волейболга күрэҕэр үөрэ-көтө кытыннылар.
Дьэ ити курдук, Аҕа Дойдуну көмүскээччилэр сыллара Дьүлэй нэһилиэгэр Наммара үрэх үрдүгэр бэрт уратытык, дириҥ ис хоһоонноохтук арылынна.
Л.Э.Егорова.