Харбалаахтааҕы үөрэхтээһин холбоһугар оскуолаҕа, учуутал күнүгэр аналлаах тэрээһиннэр буолан аастылар. Ол курдук алтынньы 3 күнүгэр учуутал күнүн көрсө биһиги выпускниктарбыт тэрийиилэринэн, оскуолабыт оҕолоро кыттыылаах истиҥ иһирэх киэһэ буолла. Учууталларга аналлаах эҕэрдэ кэнсиэр, бэһиэлэй оонньуулар уонна эҕэрдэлэр. Ону таһынан аҕам саастаахтар күннэринэн ытыктыыр ветеран учууталларбытын кылааһынан дьиэлэригэр тиийэн эҕэрдэлээтибит.
Алтынньы 4 күнүгэр учуутал күнүгэр аналлаах үгэс буолбут «День самоуправления» күнүн бэлиэтээтибит. Бу күн олус долгуйан туран, эппиэтинэһи ылынан быйылгы выпускниктарбыт биир күн устата учуутал оруолун толорон бэйэлэрин сатабылларын көрдөрөн оҕолору үөрэттилэр.
Ол курдук күммүт учуутал күнүгэр аналлаах үөрүүлээх линейкаттан саҕаламмыта. Оскуола директорынан Спиридонов Михаил, дириэктэри иитэр үлэҕэ солбуйааччынан Федорова Эмилия, дириэктэри үөрэх чааһыгар солбуйааччынан Слепцова Анджелия буоллулар. Онтон атын оҕолор предметтэринэн арахсан үөрэттилэр.
Хас биирдии кылаастарга анаммыт кылаас салайааччылара үлэлэстилэр.
Ону таһынан уһун переменаларга музыка күнүгэр аналлаах инсталляциялар: «Окно в мир музыки» фотозона, «Открытый микрофон» диэн баҕалаах оҕолор ыллаан иһитиннэрдилэр, 11 кылаас үөрэнээччитэ Дарина Борисова оҕолорго уонна учууталларга гитараҕа мастер-класс көрдөрөн сөхтөрдө. Музыкаҕа аналлаах тэрээһиннэри музыка учуутала Лилия Дементьевна уонна «Орто Амма Кэскилэ» оскуолабыт лидердара тэрийэн ыыттылар. Бүтэһик уруоктар кэннилэриттэн спортивнай залга эстафета, көрдөөх стартар буоллулар. Оҕолор сүрдээҕин көхтөөхтүк кытыннылар.
Учуутал күнүгэр аналлаах солбуйуу күҥҥэ ыытыллыбыт тэрээһиннэргэ хас биирдии оҕо актыыбынайдык кытынна. Оҕолор учууталлыылларын олус сөбүлээтилэр. Түмүгэр быйылгы выпускниктар бэйэлэрин санааларын эттилэр: -Учуутал үлэтэ ыарахан, улахан сыралаах, эппиэтинэстээх, түбүктээх ол эрээри олус интэриэһинэй. Онон учууталларга махталбыт улахан.
Күндү учууталларбытын «Учуутал күнүнэн» ис сүрэхпититтэн итиитик-истиҥник эҕэрдэлиибит! Кыһамньылаах үлэҕит иһин барҕа махтал!
Лейла Никонова, 9 кылаас үөрэнээччитэ, бастыҥнар хамсааһыннарын «Орто Амма Кэскил» оҕо тэрилтэтин суруналыыһа.