Биһиги оскуолабыт оҕолоро сыл аайы тиһигин быспакка нэһилиэкпит аҕам саастаах дьонугар көмөлөһөр үтүө үгэһи тутуһан, тимуровскай көмө оҥороллор. Күһүҥҥү сылаас күннэри тутуһан, кыстыкка бэлэмнэнии, дьиэ, хаһаайыстыба үлэтэ киһи сааһырдаҕын аайы кыайтарбат буолан иһэр. Ол курдук, бу үөрэх дьылын саҕаланыыта «Бастыҥнар хамсааһыннарын» былаанынан, «Орто Амма Кэскилэ» түмсүү актыбыыстара, 7-с уонна 8-с кылаас оҕолоро, кылаас салайааччылара Ксения Владимировна Григорьева уонна Вероника Самуиловна Петрова тэрийиитинэн нэһилиэкпит олохтоохторугар уонна оскуолабыт бэтэрээн учууталларыгар дьиэ ис-тас үлэтигэр күүс-көмө буоллулар. 8 кылаас үөрэнээччилэрэ уонна 7 кылаас кыргыттара оскуолаҕа өр сылларга библиотекарынан үлэлээбит Зоя Николаевна Даниловаҕа хортуоппуй хостооһунугар көмөлөстүлэр.
Оттон 7 кылаас уолаттара оскуолабыт бэтэрээн учууталыгар, билигин оскуола түмэлин салайар Валентина Викторовна Блахироваҕа дьиэ ис-тас үлэтигэр көмө оҥордулар. Ол курдук, дьиэ муостатын анныгар буор куттулар, сорох уолаттар дьиэҕэ уу тастылар. Ону тэҥэ оҕуруот үлэтигэр эмиэ көмөлөстүлэр. Бэтэрээннэрбит оҕолорго махтал тылларын эттилэр, кэлэн көмөлөспүттэриттэн олус үөрдүлэр.
Кырдьаҕас көлүөнэҕэ ытыктабыллаах, болҕомтолоох сыһыаны, көрөр-харайар үгэһи ыһыктыбаппыт. Сыл аайы тимуровскай үлэ чэрчитинэн оскуолабытыгар былааннаах үлэ ыытыллар.
Тимуровскай хамсааһын оҕолору үлэҕэ үөрэтэр, үтүөҕэ көҕүлүүр, кырдьаҕаска болҕомтолоох буолууну иитэр.
Хортуоппуй субуотунньуга
Балаҕан ыйын 12 күнүгэр Н.Е. Мординов-Амма Аччыгыйын аатынан Харбалаахтааҕы үөрэхтээһин холбоһугун 10-11 кылааһын оҕолоро, Кэрэчээнэ Егоровна Терентьева салайааччылаах ыаллыы Чымынаайы нэһилиэгэр бааһынай хаһаайыстыбалаах дьиэ-кэргэҥҥэ хортуоппуй хостооһунугар субуотунньукка сырыттылар. Күммүт туран биэрэн, оҕолор 182 куулу хостоон, оскуолаларын буфетыгар кыстыгы туоруур хортуоппуйдарын булан бэйэлэрэ да үөрдүлэр. Урукку көлүөнэ оҕолорун, эбээлэрин-эһээлэрин холобурдарынан билиҥҥи көлүөнэ оҕолоро субуотунньуктарга үөрүүнэн кытталлар, үлэ үөрүйэхтэрин иҥэринэллэр.
Макарова В.В., дириэктэри иитэр үлэҕэ слобуйааччы