Э.К. Пекарскай аатынан Игидэй орто оскуолатыгар саҥа үөрэх кабинетын аһыллыытыгар улуустааҕы үөрэх салаатыттан салайааччылар Иннокентий Дягилев, Татьяна Тютрина кэлэн кыттыыны ыллылар.
Арассыыйа, Саха сирин уонна Таатта гимнэринэн аһыллыбыт үөрүүлээх линейкаҕа оскуола дириэктэрэ Андрей Миронов киирии тыл эттэ:
«Быйылгы үөрэх дьылыгар саҥа оборудование кэллэ. Түгэнинэн туһанан махтал тылларын этиэхпин баҕарабын улуус баһылыга Айаал Семенович Бурцевка уонна улуустааҕы үөрэх салаатын начальнига Иннокентий Иннокентьевич Дягилевка. Бу аһыллыбыт кылааска 4 мөл. солк. кэриҥэ суумалаах оборудованиеҕа 41 ноутбук, 3 интерактивнай панель, 3 видеокамера уонна МФУ принтер кэллэ. Бу үөрэх кабинета үөрэх хаачыстыбата үрдүүрүгэр, оҕолор билиилэрин-көрүүлэрин кэҥэтэллэригэр төһүү күүһүнэн буолуоҕа. Оскуолаларга сылын аайы үөрэх хаачыстыбатын тупсарыыга тестирование оҥоһуллар. Ол түмүгэр Э.К. Пекарскай аатынан Игидэй орто оскуолата инники күөҥнэ сылдьар. Бу ылбыт таһыммытын ыһыктыбакка, өссө инники диэки эрэллээхтик хардыылаан иһэр сыалы-соругу туруорунуохтаахпыт. Манна үлэбит көрдөрүүтэ барыта киирэр. Эксээмэннэрбит араас таһымнаах көрдөрүүлэрбит, үөрэх өттүгэр туох баар түмүктэрбит барыта түмүллэр. Бу кабинет аһыллыыта биһиэхэ күүс-көмө буолуо диэн эрэнэбит. Өссө да ситиһиилэр кэлэ турдуннар!»
Салгыы үөрэҕирии салаатыттан Иннокентий Дягилев: «Үөрэҕирии уонна билим министиэристибэтин сүнньүнэн аныгы олох ирдэбилигэр эппиэттиир цифровой оборудованиелар кэллилэр. Биһиги үөрэнээччилэрбит Москва, Санкт Петербург уонна да атын улахан куораттар оҕолорун кытта тэҥҥэ сайдар кыахтаахтар. Саҥа кабинет оборудованиета оҕолорбут үүнэллэригэр-сайдалларыгар сөптөөх, илин былдьаһар дьоҕурдаах буолалларыгар туһаайыллыбыт «Цифровая образовательная среда» Федеральнай бырайыак чэрчитинэн кэллэ. Айаал Семенович Бурцев, улууспут дьокутааттарын уонна үөрэх салалтатын ааттарыттан эһигини эҕэрдэлиибин. Бу бырайыак үлэлээбитэ бэһис сыла. 2019 сылтан Бүтүн Арассыыйа үрдүнэн 21 тыһыынчаттан тахса оскуола бу бырайыакка холбосто. Бырайыак бүтэһик үлэлиир сылыгар хаһааҥҥытааҕар да элбэх үп-харчы көрүллэн, быйыл Игидэй оскуолатыгар маннык хайысха олоххо киирдэ. Онно эһиги оскуолаҕыт таба тайанан тиксэр чиэстэннэ. Онон үөрэх кабинета аһыллыбыта үөрэхпит хаачыстыбата тупсарыгар инникитин төһүү күүс буолуохтаах. Бу барыта үүнэр көлүөнэбит инникитин программированиеҕа, сыыппара эйгэтигэр сыһыаннаах дьоҕурун сайыннарарыгар туһалыаҕа. Дойдубут Бэрисидьиэнэ В.В. Путин этэн турардаах, Аан дойдуга буола турар ыарахан кэмҥэ дойдубут бэйэтин бэйэтэ хааччынар буолуохтаах диэн. Туох баар эйгэҕэ аныгы олоххо эппиэттиир каадырдарынан толору хааччыллыы баар буолуохтаах. Бэйэбитин бэйэбит ииттиниэхтээхпит. Оччоҕуна туохха да бэриммэт сайдыылаах дойду быһыытынан үүнүөхпүт, сайдыахпыт, инники олохпутун түстүөхпүт. Ити үлэ барыта детсад, оскуола саҕаттан ыытыллыахтаах. Ол иһин маннык бырайыактар олоххо киирэн, оҕолорбут сайдалларыгар бигэ тирэх буолаллар. Үөрэхтээһиҥҥэ ыытыллар араас куонкурустарга кыттабыт. Сыыппара эйгэтигэр Игидэй оскуолата үлэлээбитэ ыраатта, ол курдук 2019 сыллаахха улууска бастакынан «Үүнүү туочуката» Федеральнай бырайыакка киирбитэ. Оҕолорбут өрөспүүбүлүкэҕэ ыытыллар күрэхтэргэ инники күөҥҥэ хаһыс да сылын сылдьан кэллилэр. Дойду таһымыгар Арассыыйаҕа тиийэ күрэхтэһэллэр. Ити барыта бу оскуола сөптөөх билиини-көрүүнү биэрэриттэн тутулуктаах. Былырыыҥҥы үөрэх дьылыгар киэн туттар үөрэнээччилэрбит Айта Аргунова, Илья Лопатин «Виртуальная и дополненная реальность» диэн кэмпэтиэнсийэҕэ соҕуруу куорат гимназияларын оҕолорун кытта күрэс былдьаһан ситиһиилээхтик кыттан, өрөспүүбүлүкэ, улуус чиэһин көмүскээбиттэрэ. Маны таһынан инники идэни баһылыырга туһаайыллыбыт «Профессионаллар» күрэскэ Ытык Күөл 1 нүөмэрдээх оскуолатын үөрэнээччитэ В. Андросов «Лечебное дело» кэмпэтиэнсийэҕэ иккис миэстэни ылары ситистэ. Оҕо оскуола эрдэхтэн бэлэмнэнэн үчүгэй исписэлиис буоларга үөрэнэр. Салгыы иннибитигэр үгүс үлэлэр ыытыллаллар. Оҕо үөрэнэригэр туох баар усулуобуйа барыта тэриллэр. Быйыл Таатта улууһугар өссө биир саҥа таас оскуола аанын тэлэччи аһыаҕа. Аны кэлэр сайын «саха олимпиадата» диэн ааттаммыт XXII төгүлүн ыытыллар «Манчаары оонньуулара» буолара күүтүллэр. Онон улууспут киинигэр элбэх тутуу үлэҕэ киирэн, үөрэххэ эрэ буолбакка, успуорт өттүгэр эмиэ ситиһиилээх буолуохтаахпыт. Эт-хаан өттүнэн эрчиллэн, үөрэҕи сэргэ успуорду эмиэ өрө тутуохтаахпыт. Федеральнай бырайыагынан Игидэй оскуолатыгар киирбит саҥа кабинет улахан эппиэтинэһи ирдиир», — диэн этэн туран, улуустааҕы үөрэҕирии салаатын аатыттан оскуола дириэктэригэр А.А. Мироновка махтал суругу туттарда.
«Игидэй нэһилиэгэ» МТ баһылыга Егор Марков тэтимнээхтик баран иһэр олохпутугар сыыппара эйгэтэ бигэтик киирбитин бэлиэтээн туран, оҕолорбут, учууталларбыт Федеральнай бырайыагынан киирбит кабинеты сөпкө туһаналларыгар эрэнэрин биллэрдэ.
Саҥа кабинеты үөрүүлээхтик аһыы кэнниттэн, ыалдьыттарга экскурсия тэрилиннэ, улуустааҕы үөрэҕирии салаатын начальнига И.И. Дягилев үөрэнээччилэри кытта көрүстэ.
Гизелла ПОПОВА.