Олунньутааҕы улуустааҕы тэрээһиҥҥэ аһаҕас уруокка сырыттыбыт.
Маҥнайгы нүөмэрдээх орто оскуолаттан эдэр учуутал Михаил Егорович Иванов «Киһи эриэнэ иһигэр, сүөһү эриэнэ таһыгар» диэн өс хоһоон тутулунан уруогун «Аламай Күн Сыламынан» диэн саҕалаабыта, уруок ураты суолталаах буоларын тута таайаҕын. Биир дойдулаахпыт Социалистическай Үлэ Дьоруойа, тапталлаах суруйааччыбыт Д.К.Сивцев-Суорун Омоллоон «Аанчык» кэпсээнигэр олоҕуран Мыычаар уобараһын ахсыс кылаас үөрэнээччилэригэр толору тиийимтиэтик ыытта. Дьиҥнээх эр киһи олоххо кыһалҕатын хайдах быһаарыахха сөбүн болҕомтоҕо ылла. Мыычаар инники дьылҕата хайдах салаллыан сөбүн оҕоттон таба ыйытык туруоран, уруок сыалын-соругун ситтэ.
Чымынаайы орто оскуолатын учуутала Ульяна Васильевна Хоютанова сахалыы нус-бааччы тылынан «Ахсаан аат» тиэмэтинэн алтыс кылааска аныгы технологиялары туттан, оонньуу көмөтүнэн олоҥхо тылын-өһүн болҕойон истэн, ахсаан ааттары тэтэрээккэ суруйтарбыта олус сөпкө дьүөрэлэстэ. Сиэри-туому тутуһар айылгытынан алгыстаах алаадьыны оҕолорго бэрсэн, үллэрэн, ахсаан аат араастарын быһаартарбыта сэргэхтик көһүннэ. Талааннаах учуутал оһуохайдатан, сахалыы кээмэйдэри ахсаан аакка туһаммыта бэркэ табылынна. Бу икки учуутал улуус чиэһин көмүскүүр улахан куонкуруска ситиһиилээхтик кыттыахтара диэн эрэнэбит.
Салгыы саха тылын, литэрэтиирэтин уонна төрүт култууратын учууталлара өр сыллаах, сыралаах үлэлэрин баай уопуттарын биир идэлээхтэрин кытта тэҥҥэ үллэһиннилэр. Харбалаахтан РФ үөрэҕириитин туйгуна В.П.Трофимова Н.Е.Мординов-Амма Аччыгыйа аатынан бүтүн өрөспүүбүлүкэтээҕи тэрээһиҥҥэ бэлэмнэнэ сылдьалларын сэһэргээтэ. Игидэйтэн В.К.Ефимова «Куолу» куонкуруска бүтүн оскуола бэлэмнэнэ сылдьарынан киэн туттарын астына иһиттибит. Таатта лиссиэйиттэн наукаҕа сыһыамах О.М.Слепцова грант куонкуруһугар бэйэтин көрүүтүн сиһилии кэпсээтэ. О.П.Андросова сүүрбэттэн тахса сыл утумнаахтык ыытыллар «Уолан» турнир-олимпиада 5-8 кылаас уолаттарыгар быйыл искусственнай интеллект көмөтүнэн туһалаахтык ыытыллыа диэн эрэннэрбитин биһирээтилэр. Уус Тааттаттан олус талааннаах А.С.Кочнева, Д.В.Николаева медианы баһылаан, литератураҕа дириҥник өтөн киирэн, нейросеть көрүҥүн баһылаабыттара харахха быраҕылынна. М.Е.Павлова ЫКОО-1 учуутала тар уута туһатын, билиҥҥи дьон бары күннээҕи аһылыктара доруобуйаҕа олус туһалаах буолара кэрэхсэбили ылла. Т.Ю. Прокопьева Чымынаайыга нэһилиэги кытта биир ситимҥэ киирэн боччумнаахтык үлэлиирин билистибит. Мунньаҕы салайан ыыппыт Г.Ф.Им билиилэрин бэрсибиттэргэ туоһу суруктары туттарда. Саха тылын сүмэтин, ийэ тылы иҥэринэ сылдьар учууталлар Таатта улууһун нэһилиэктэринэн улахан дьайыыны оҥорооччулар, инники олоҕу түстээччилэр буолаллара ырылыччы көһүннэ.
Сандаара.