От ыйын 7 күнүгэр Чычымахха кэрэ айылҕалаах Амма эбэ үрдүгэр Унньуулалаахха саха бастакы норуодунай поэта С.Р.Кулачиков – Эллэй төрөөбүтэ 120, ССРС суруйааччыларын Сойууһун чилиэнэ, биллэр прозаик Р.А.Кулаковскай төрөөбүтэ 110, кини уола, СӨ үөрэҕин үтүөлээх үлэһитэ А.Р.Кулаковскай төрөөбүтэ 85 сылларыгар уонна РФ маастар асчыта, РФ эргиэнин үтүөлээх үлэһитэ, СӨ бочуоттаах олохтооҕо И.И.Тарбахов 80 сааһыгар ананар, түөрт үбүлүөйдээх улахан ыһыах ыһыллан, үрдүк таһымнаахтык ыытыллан түмүктэммитэ.
Нөҥүө күнүгэр Дьаамҥа суруйааччы Р.А.Кулаковскай төрөөбүтэ 110 сылыгар анаан Кулаковскай аймах, улуус салалтата, СӨ дуобакка Федерацията, Амма нэһилиэгэ тэрийиилэринэн нуучча дуобатыгар өрөспүүбүлүкэ таһымнаах улахан күрэхтэһии ыытылынна. Урут аҕатын А.Е.КулаковскайӨксөкүлээх Өлөксөй аатынан маастар нуормалаах күрэхтэһии уонтан тахса төгүл ыытыллан баран, сыыйа тохтообута. Онтон уонтан тахса сыл буолан баран, уолун Р.А.Кулаковскай үбүлүөйдээх сааһыгар сөп түбэһиннэрэн ыытылынна. Күрэхтэһии үөрүүлээх аһыллыытыгар Р.А.Кулаковскай сиэнэ Степан Охлопков, СӨ дуобакка Федерациятын аатыттан, СӨ баһылык тириэнэрэ Иван Токусаров, Амма нэһилиэгин баһылыгын э.т Александр Бытыков эҕэрдэлээтилэр уонна ситиһиини баҕардылар. Дьокуускай куораттан, Ньурба, Бүлүү, Нам, Амма, Уус Алдан, Чурапчы, Мэҥэ Хаҥалас улуустарыттан 54 дуобатчыт мустан илин-кэлин түһүстүлэр, ким бастыҥын быһаарыстылар. Ол иһигэр 3 Аан дойду чөмпүйүөнэ, 5 аан дойдутааҕы гроссмейстердар, 5 спорт маастардара кыттаннар, күрэхтэһии таһымын үрдэттилэр. Күрэхтэһии швейцарскай систиэмэнэн 9 турдаах ыытылынна, 54 киһи бары бииргэ оонньоотулар. Балаһыанньа быһыытынан гроссмейстердарга, маастардарга туһунан, спорт маастарыгар кандидаттарга, оҕолорго уонна Таатта дуобатчыттарыгар тус-туһунан түмүктэр таһаарылыннылар. Ол оннугар дьахталлар, бэтэрээннэр диэн араарбатылар. Бастакы бөлөххө Аан дойду 11 төгүллээх чөмпүйүөнэ Гаврил Колесов (Дьокуускай) иккитэ эрэ тэҥнэһэн холкутук бастаата. Иккискэ эмиэ Аан дойду чөмпүйүөнэ Андрей Федотов (Амма) 13 очукуолаах таҕыста. Үһүс миэстэни 100 харахтаах дуобакка Аан дойду кыайыылааҕа Мотрена Ноговицына (Дьокуускай) ылла. Иккис кандидаттар бөлөхтөрүгэр 12 очукуону аахсан бу строкалар автордара (Ы-Күөл) инники таҕыста. Кыргыттарга Арассыыйа чөмпүйүөнэ Марианна Федорова (Чурапчы) коэффициенынан кыайтаран иккис миэстэ буолла. Тааттаттан тардыылаах, уолаттарга СӨ, Арассыыйа кыайыылааҕа Артем Федоров (Дьокуускай) 11 очукуоланан, үһүс миэстэни хааччынна. Таатта дуобатчыттарыгар, олохтоохтор үөрүөхтэрин иһин, маанылаах күтүөттэрэ Константин Софронов (Чычымах) 11 очукуолаах чөмпүйүөн аатын сүктэ. Коэффициенынан сабырыттарбыт Николай Винокуров (Харбалаах) иккис миэстэҕэ таҕыста. Олус тахсыылаахтык оонньообут Герман Егоров (Ытык Күөл) элбэх дуобатчыты кэннигэр хаалларан, бочуоттаах үһүс миэстэни ылла.
Оҕолорго Дьокуускай, Чурапчы дуобатчыттара бириистээх миэстэлэри ыллылар. Бириистээх миэстэлэри таһынан, элбэх анал бириистэр туттарылыннылар. Таатта оҕолоруттан, 1№-дээх Ы-КОО 1 кылааһын үөрэнээччитэ Күннэй Гоголева уонна Тааттатааҕы лицей 5 кылааһын үөрэнээччитэ Игорь Федоров «Эдэр кэскиллээх оонньооччу» анал бирииһинэн бэлиэтэннилэр. Күннэй өссө 2 разряд нуорматын толордо. Кинилэри дуобакка спорт маастарыгар кандидат Л.Р. Захарова дьарыктыыр. Дьокуускайтан уонна ыраах улуустартан кэлбит дуобатчыттар Дьаам сынньалаҥ дьиэлэригэр хоно сылдьан күрэхтэстилэр. Кураан күннэр тураннар, суолбут көнөн, элбэх төрөппүт оҕолорун арыаллаан кэлэннэр, күрэхтэһиини кэтээн көрдүлэр, оҕолоругар ыарыйдылар. Ыалдьыттарбыт быыстарыгар ыраас уулаах Амма эбэҕэ астына сөтүөлээтилэр, кэрэ айылҕатын кэрэхсии көрдүлэр. Күрэхтэһии сүрдээх тэрээһиннээхтик ыытыллан түмүктэннэ. Күрэхтэһии кыттыылаахтара, ыалдьыттар күрэхтэһиини тэрийээччилэргэ, бары Кулаковскай аймахха, улуус салалтатыгар (баһылык А.С. Бурцев), СӨ дуобакка Федерациятыгар (сал. Р.М. Платонов, тол. дир. Н.К. Стручков), өрөспүүбүлүкэтээҕи дуобат-саахымат Киинигэр (дир. М.С. Ноговицына), Амма нэһилиэгэр (баһ.э.т А.А. Бытыков, спортинструктор К.И. Софронов), бириис туруорбут бары спонсордарга барҕа махталларын тиэрдэллэр.
Анатолий Мурунов, спорт бэтэрээнэ, дуобакка ССРС спордун маастарыгар кандидат.