Ахсынньы 15-17 күннэригэр Покровскай куоракка Саха сиригэр физкультурнай хамсааһын үбүлүөйдээх 100 сылыгар анаммыт федерация кубога ыытылынна.
14 хамаандаттан 94 гиревиктэр кэлэннэр 15 ыйааһынна: эр дьоннорго, дьахталларга, бэтэрээн эр дьоннорго, дьахталларга арахсан бу кэмҥэ ким модун күүстээҕин, уһун сылайбат тыыннааҕын, кыайыыга дьулуурдааҕын алта помостка тахсан киирсэн быһаарыстылар.
Биһиги улуустан 12 киһи кытынна. Уопсай хамаанданан түмүккэ 6 миэстэни ыллыбыт. Биирдиилээн түмүккэ: 63 киилэҕэ — Руслан Ковлеков, 5 миэстэ, 73 киилэҕэ — Алексей Максимов, 6 миэстэ, 78 киилэҕэ — Вадим Габышев, 5 миэстэ, 95 киилэттэн үөһэ — Александр Никитин, 4 миэстэ, 58 киилэҕэ — Сардана Тарасова, 3 миэстэ, Василина Матвеева, 5 миэстэ, 63 киилэҕэ — Нарыйаана Степанова, 4 миэстэ, Туйаара Луковцева, 5 миэстэ, 68 киилэттэн үөһэ — Диана Петрова, 1 миэстэ, 63 киилэттэн үөһэ — Сахайаана Прохорова, 4 миэстэ, 73 киилэҕэ — Николай Захаров, 5 миэстэ, 73 киилэттэн үөһэ — Иван Васильев, 8 миэстэ буоллулар.
Быйыл сылы түмүктүүр күрэхтэһиигэ оскуоланы бүтэрэн үөрэӽхэ киирбит устудьуон ыччаттарбыт хамаанда састаабыгар киирэннэр улуустарын аатын чиэһин үрдүктүк тутаннар, ситиһиилээхтик кыттаннар, күүстээх гиревиктэри көрөннөр баай уопут ыллылар, өйдөрө санаалара бөҕөргөөн күүһүрдүлэр.
Биир санаанан хамаанда хапытаанынан талыллыбыт Сардана Тарасова үлэтин сүрдээх үчүгэйдик саҕалаата, кини оскуолаҕа үөрэнэр кэмнэригэр Саха сирин республикатын чемпионаттарыгар үстэ субуруччу бастаан, бүтүн арассыыйатааҕы күрэхтэһии кыайыылааҕынан буолан бастакы спортивнай разряд нуорматын толорбута.
Өссө биири тоһоҕолоон бэлиэтиэхпин сырдатыахпын баҕарабын, билигин күрэхтэһиигэ кытта барартан араас биричиинэни булан сорох спортсменнар олох да барбат, куотунар аткаастанар түгэннэригэр успуорт бэтэрээннэрэ Иван Васильев, Николай Захаров дьиэлэрин, сүөһүлэрин хаһаайыстыбаларын көрөннөр, бэйэлэрин бас билэр массыыналарынан бу үлүгэрдээх тымныыны көрөн туран айаннаан, аара суолга моһуогураннар субуота түүн тиийдилэр. Нөҥүө күнүгэр ситиһиилээхтик киирсэннэр хамаандаҕа ыстырааптыыр очукуону бэрдэрбэткэ кыайыыга дьулуурдарын, күүстээх санаалаахтарын көрдөрөн эдэр ыччаттарга үтүө холобур буоллулар.
Иннибитигэр үрдүк этпиэтинэстээх «Манчаары оонньуута” бэйэбит дойдубутугар ыытыллара күүтүллэр. Күүстээх хамаанда састаабын талан сүүмэрдээһиҥҥэ үлэ барар.
Түгэнинэн туһанан күрэхтэһиигэ кыттарбытыгар аһылыкпытыгар, хонукпутугар күүс-көмө буолбут улуус успуорт комитетын салайааччытыгар Нь.М.Сабарайкиҥҥа, гиирэ федерация бэрэссэдээтэлигэр Г.Г.Вырдылиҥҥа, суоппарбытыгар С.Н.Огонеровка барҕа махталбытын тиэрдэбит.
Иннокентий Бояров.