Таатта нэһилиэгэр аҕам саастаах дьон аан дойдутааҕы күннэрэ «Сарыал» култуура киинин иһинэн элбэх сэргэх тэрээһининэн бэлиэтэннэ.
Нэдиэлэ кырдьаҕастар баттахтарын босхо кырыйар нэһилиэк парикмахердарын үгэскэ кубулуйбут аахсыйаларынан уонна Таатта улууһун мэдисиинэ кэллиэһин устудьуоннарын хаан баттааһыннарын, саахардарын көрүүлэриттэн саҕаланна.
Салгыы иккис күнүгэр аҕам саастаах коллекционердар быыстапкалара тэрилиннэ. Манна дойдубут историятын кэпсиир значоктар, харчылар, мааркалар, ону таһынан уруучука, бүлүүһэ, сүүтүк арааһа уо.д.а.киэҥник тардылынна.
Үһүс күн түөлбэ аҕам саастаах дьонун «Назад в СССР» диэн ток-шоуга түмтэ. Кыттааччылар барыта алта түһүмэҕинэн ааспыт кэми санаан, оччотооҕу кэм киинэлэрин, малын-салын, биллиилээх дьонун уо.д.а. таайдылар, ахтылҕан кэрэ иэйиитигэр куустардылар. Нэһилиэкпит бары түөлбэлэрэ ох курдук оҥостон кэлэн таайбараҥы таайан иннигэр-кэннигэр түһүстүлэр.
Уопсай түмүккэ кыайыылааҕынан «Куула» түөлбэ (сал. Савватеева А.М.), иккис миэстэҕэ «Кэскил» түөлбэ (сал. Данилова И.И), үһүс миэстэҕэ «Сайдам» түөлбэ (сал.Бондарева М.Е.) таҕыстылар.
Нэдиэлэ сылын аайы ыытыллар «Көрсүһэр түгэн…» бырааһынньыктааҕы тэрээһининэн түмүктэннэ. Чахчы даҕаны аҕам саастаах дьоммут көрсүһэр түгэни мүччү туппакка, күүтүүлээх кэрэ күҥҥэ сүргэлэрэ көтөҕүллэн, ыллаан-үҥкүүлээн, үөлээннээхтэрин көрсөн баай астаах сандалы тула олорон сэһэргэһэн-сэлэһэн астынан тарҕастылар. Үөрүүлээх күҥҥэ улуус баһылыгын бастакы солбуйааччыта Р.И.Захаров, Таатта нэһилиэгин баһылыга Е.И.Павлов, Тааттатааҕы нэһилиэнньэ социальнай көмүскэлин кэлим киинин салайааччыта М.П. Тарасов, улуус, нэһилиэк бэтэрээннэрин Сэбиэттэрин председателлэрэ М.А Попова, М.Е.Бондарева истиҥ эҕэрдэлэрин тиэртилэр. Эҕэрдэ ырыалар, оонньуулар, «Кэрэ сэлээппэ» күрэһэ дьоро күнү киэргэттилэр. Бырааһынньык Улуу Кыайыы 80 сылын бары бииргэ, өрө күүрүүлээхтик көрсөргө ыҥырыынан түмүктэннэ.
Мотрена Сунхалырова, «Сарыал» КК директорын солбуйааччыта.