Кини аата Кристина Игнатьевна Старостина диэн. Төрдүс кылаастары үөрэппитэ. Илииттэн илиигэ сылдьан, ыһыллан хаалбыт кэллэктииби бэрт кылгас кэм иһигэр сомоҕолуу түмпүтэ. Эдэр учуутал ирдэбиллээх буолан, үгүһү ситиспитэ.
Ол курдук саас үөрэнээччилэр билиилэрин тургутар бэрэбиэркэлиир үлэҕэ үгүс оҕо хаачыстыбаҕа үлэлээбитэ, куһаҕан сыананы ылбыт оҕо суоҕа. Бу саҥа үлэлиир учуутал үрдүк ситиһиитинэн буолар. Кини үөрэҕи таһынан, араас хайысхаҕа үлэни былааннаан, иитэр үлэтин тэрийбитэ. «Ытык сирдэр» сэргэх бырайыакка кыттан, Калистрат Елисеевич Владимиров аатынан нэһилэк култуурунай-сырдатар комплекс тиэргэнин иһэ, таһа ыраас, хомуллуулаах буоларын ситиспиттэрэ. Чулуу тустуук олоҕун, спортивнай ситиһиилэрин, үлэтин-хамнаһын чинчийбиттэрэ.
Ону тэҥэ «Оскуола театра» түмсүү тэрийэн ыытар Амма Аччыгыйа «Сааскы кэм» арамаанынан туруорууну көрүүгэ биир бастыҥынан ааттанан, улуустааҕы «Эдэр актер» күрэскэ кыттарга мэктиэлэммиттэрэ. «Эдэр актер» күрэскэ иккис миэстэни ылан, үөрэн-көтөн кэлбиттэрэ. Салгыы «Кустук» өрөспүүбүлүкэтээҕи драматическай көрүүгэ ситиһиилээхтик кыттан, «Кэскиллээх кэлэктиип» анал аакка тиксибиттэрэ.
Кылаас оҕото бүтүннүү «Хоһоонноохтук ааҕыы» дьарыгар сылдьаллар. Араас күрэстэргэ кыттан, куруук миэстэлэспиттэрэ. Онтон саамай улахан ситиһиилэринэн «Өбүгэ тыла» тэрийиитинэн «Кыайыы күнүнэн» күрэскэ кыайыылаах аатын сүгэн, 1 миэстэни ылбыттара. Бу Арассыыйа араас эрэгийиэннэрэ кыттыылаах күрэс этэ.
Кристина Игнатьевна төрөппүттэрин кытта биир сомоҕо буолан үлэлиир. Ол түмүгэр алын сүһүөх кылааһы бүтэрээччилэр отчуоттуур кэнсиэрдэрэ үрдүк таһымҥа туруоруллубута.
Быйыл Кристина Игнатьевна маҥнайгы кылаастары ылан, ааҕарга-суруйарга, ахсааны суоттуурга үөрэтэн саҕалаата. Кырачааннар учууталларын олус сөбүлээтилэр, уоскулаҥҥа аттыттан арахпат мөккүөрдээхтэр. Удьуор утума салҕанар холобурун Кристина Игнатьевнаҕа көрөбүн. Ийэтинэн эбэтэ Альбина Лукинична Посельская Дьохсоҕоннор биир киэн туттар учууталлара этэ. Аҕатынан эдьиийдэрэ Голиковалар Хара Алданнар тумус туттар учууталларынан буолаллар.
Кэскиллээх эдэр учууталы, Кристина Игнатьевнаны, кэлэн иһэр идэлээх күммүтүнэн эҕэрдэлиибин! Саҕалаабытыҥ салҕана турдун, кырачааннары сайыннарар, үөрэтэр үлэҥ ситиһиилээх буоллун. Оҕо аймах тапталын-махталын ылан, учуутал бастыҥа, уһуйааччы үтүөлээҕэ буола үүн-сайын!
СӨ үтүөлээх учуутала Валентина Семеновна КРИВОШАПКИНА.