50 сыл анараа өттүгэр, 1975 сыл олунньу ый 20 күнүгэр ырыаҕа ыламмыт, хоһооҥҥо холбоммут Амма эбэ хотун биир кэрэ кытылыгар турар кырдьаҕас Чычымах алааһыгар, Амма нэһилиэгин сэбиэтигэр эдэркээн дьон Скороходкина Мария уонна Малышев Василий, ыал буолар туоһу суругу туппуттара. Онтон ыла үйэ аҥаара устата күүстээх тапталларын уота уостубакка, кэскил тэнитэн, үлэни өрө тутан, сахалыы сиэринэн сэмэйдик иллээх дьиэ кэргэн буолан, 50 сыл бииргэ олорон кэллилэр.
Быйыл 2025 сыл, Россияҕа Аҕа Дойдуну көмүскээччилэр, Өрөспүүбүлүкэбитигэр Ийэ Дойдуну көмүскээччи, Тааттабыт улууһугар Кыайыы сыла биллэриллибитэ. Бу бэлиэ сылга 2025 сыл кулун тутар 1 күнүгэр, Мария Николаевна уонна Василий Андрианович Малышевтар 50 сыл бииргэ олорбуттарынан, Саха Өрөспүүбүлүкэтин Ил Дарханын укааһынан олохтоммут, «Килбиэннээх дьиэ кэргэн» үрдүкү бэлиэни туттулар, маны тэнэ Таатта улууһун кэргэнниилэрин бочуот кинигэтигэр уонна «Амма нэһилиэгэ» олохтоох дьаһалта, 2019 сыллаахтан төрүттээбит үбүлүөйдээх ыаллар кинигэлэригэр киирдилэр, үөрэн-көтөн туран илии баттаатылар.
Улахан ыал күн күбэй ийэтэ Мария Николаевна, Амма нэһилиэгин бочуоттаах олохтооҕо, 35 сыл ыстаастаах ветеран учуутал, Саха Өрөспүүбүлүкэтин үөрэҕириитин туйгуна, учууталлар учууталлара, В. И. Ленин 100 үбүлүөйдээх сааһынан килбиэннээх үлэтин иһин мэтээллээх нуучча тылын учуутала. Василий Андрианович үйэтин тухары тыа хаһаайыстыбатыгар суоппарынан таһаарыылаахтык үлэлээбитэ. Таатта улууһугар автомобильнай сулууспаҕа тус кылаатын иһин муниципальнай знак хаһаайына. Бастыҥ үлэтин иһин «Коммунизм»сопхуос үбүлүөйдээх мэтээлинэн наҕараадаламмыта.
Ытык мааны дьоммут Мария Николаевна уонна Василий Андрианович 50 сыл бииргэ тутуһан, туруулаһан, оҕо-уруу тэнитэн, биир санаанан өйдөһөн-өйөнсөн биир ыллыгынан хааман, дьоһун олоҕу олорон кэллилэр. Инникитин да оҕолоргут, сиэннэргит, хос сиэннэргит уонна чугас дьоҥҥут истиҥ сылаас сыһыаннарыгар уйдаран уһун үйэлэниҥ, оҕолоргут дьоллоро дьолгутугар дьол эбэн үөрүүгүт үксэттин!
Лена Михайлова, Таатта улууһун «Амма нэһилиэгэ»
тыа сирин түөлбэтин
дьаһалтатын специалиһа