Олунньу 20 күнүгэр Былатыан Ойуунускай аатынан Таатта народнай театрыгар улуус культураҕа салаатын профсоюһун эдэр үлэһиттэрэ “Культура. Профсоюз. Молодежь” диэн дьыалабыай көрсүһүүгэ муһуннулар.
Көрсүһүүнү культура үлэһиттэрин улуустаҕы профсоюзнай кэмитиэтин бэрэссэдээтэлэ Раиса Родионовна Петрова иилээн-саҕалаан ыытта. Ол курдук манна Таатта улууһун нэһилиэктэриттэн культура эйгэтин эдэр специалистара муһуннулар. Кинилэри сэргэ көрсүһүүгэ ыҥырыллан кэллилэр:
Петр Егорович Захаров – Манчаары оонньууларын дирекциятын салайааччыта, Варвара Петровна Рахлеева – Таатта улууһун дьаһалтатын ыччат уонна дьиэ-кэргэн политикатын отделын начальнига, Руслан Семенович Ковлеков – СР СФР Тааттатааҕы отделын клиентскай сулууспатын сүрүннүүр специалиһа, Альбина Николаевна Башарина – ГКУ ЦСЗН кылаабынай специалиһа, Майя Борисовна Аргунова – АКБ “Алмазэргиэнбанк” АО Ытык Күөллээҕи офиһын салайааччыта.
Петр Егорович Манчаары оонньууларыгар бэлэмнэнии үлэ хаамыытын, төһө кыттааччы, ыалдьыт кэлиэхтээҕин, улууспут киинигэр спортивнай эбийиэктэр тутууларын, брендбук туһунан, бу тэрээһиҥҥэ ыччат сүрүн күүс- көмө буолуохтааҕын туһунан сиһилии кэпсээтэ.
Варвара Петровна Манчаары оонньууларыгар волонтерскай үлэ туһунан кэпсээтэ.
Дьыалабыай чаас программатынан Руслан Семенович уонна Альбина Николаевна эдэр ыалга, ыччакка сыһыаннаах пособиелар, льготалар, маткапитал, соцконтракт о.д.а. араас көмөлөр туһунан сиһилии кэпсээтилэр, ыйытыыларга эппиэттээтилэр.
М.Б. Аргунова “Финансовая грамотность” диэн олус интэриэһинэй темаҕа харчы уурунуу, элбэтии, дохуоту — ороскуоту анализтааһын, страховка, ЖКУ кэшбега, ипотека сумматын хайдах кыччатар туһунан кэпсээтэ, эдэр дьон ыйытыыларыгар хоруйдаата.
Онтон культура салаатын ыччат сэбиэтин бэрэссэдээтэлинэн Уолба кулуубун директорын Леонид Арсентьевич Егоровы бары биир киһи курдук куоластаан таллылар.
Эбиэт кэннэ ГБУ РС(Я) “Центр социально-психологической поддержки семьи и молодежи” специалистара Людмила Васильевна Тистяхова, Айталина Артуровна Филиппова мустубут ыччаттарга тренинг ыыттылар, ол кэннэ улуустааҕы ыччат уонна дьиэ-кэргэн политикатын сүрүннүүр специалиһа Анастасия Вячеславовна Габышева олус сэргэх квест — оонньуу ыытта.
Ити курдук эдэр специалистар олус истиҥ, сэргэх тэрээһиҥҥэ Манчаары оонньуутугар инники үлэ торумун сүбэлэһэн, бэйэлэригэр туһалаах информацияны билэн, оонньоон сэргэхсийэн тарҕастылар.
Сарыал Кыыма