Мин бу сэтинньи ый 20-23 күннэригэр Москва куоракка ыытыллыбыт «Билингва» диэн төрөөбүт тылы өрө тутар, төрөөбүт ийэ тылынан уонна атын омук тылынан эссе суруйуутун Бүтүн Россиятааҕы, ону таһынан араас омук сириттэн кытары кыттар куонкурустарын түмүгэр ыҥырыы тутан,
учууталым Маргарита Егоровналыын баран кэллибит, ол туһунан бэйэм санаабын суруйарга сананным. Маргарита Егоровна сүбэтинэн куонкуруска эрдэ эссе суруйан ыыппыппыт.
Бэйэм эрдэ 8 кылааска кытта сылдьыбыт куонкуруһум этэ, онно группанан сылдьан кэлбиппит.
Бу сырыыга эссе суруйуутугар хас да тиэмэ баара, мин:
«О чём рассказала фотография из семейного альбома» диэни талбытым. Бэйэм күндү , таптыыр хос эһэм Семён Николаевич уонна хос эбэм Елена Еремеевна Васильевтар сэрии ыар сылыгар эдэр саастара ааспытын, ол кэннинээҕи олохторун туһунан сырдаппытым. Кинилэр хаартыскаларынан туһанан. Кылгастык эссем туһунан суруйдахха, кинилэр эдэр саастарыгар таптаһан, дьиэ — уот туттан этэҥҥэ олоруохпут, — диэн санааларын Аҕа дойду сэриитэ барытын алдьаппыт. Барыаҕын иннинэ икки кыра оҕолорун уонна хос эбээбин хаалларан баран Ийэ дойдутун көмүскүү барбыт. Онтон сэрии кэннэ 11 оҕону төрөтөн, улаатыннаран уонна үлэһит дьон оҥорон таһаарбыттар. Мин эһээм Николай Семёнович кинилэргэ 4-үс оҕонон төрөөбүт.
Биһиги улахан дьиэ кэргэн — «Сиэҥкэлэр» бары куруутун махтана саныыбыт уонна киэн туттабыт.
Ити курдук дьиэ кэргэн сылыгар анаан уонна бэйэм баҕаран туран суруйбут эссем. «Билингва» куонкурус түмүгэ наһаа үчүгэй тэрээһин буолла, бу сылга кини үбүлүөйдээх 10 сылын туолбут уонна 42 араас омук тылынан суруллубут эссены туппуттар. Тэрийээччилэр хас биирдии кэлбит ыалдьыты үөрэ-көтө көрсүбүттэрэ. Барыбытын «Космос» гостиницаҕа босхо түһэрдилэр, күҥҥэ үстэ щведскэй минньигэс астаах остуолга аһаттылар, араас экскурсияларга сырытыннардылар. Бастакы күн экскурсиялар этэ уонна оҕолору кытта билсиһии этэ, араас дойдулартан кэлбит оҕолор: Татарстан, Хакассия, Алтай, Дагестан, Узбекистан, Чувашия, Мордовия, Словакии уо.д.а. Саха сириттэн биһиги иккиэн уонна Кэбээйиттэн икки кыыс салайааччыларын кытары кэлбиттэр этэ. Ол иһин сахалар аҕыйаҕа суох этибит.
Иккис күҥҥэ наҕараадалааһын буолбута, мин соһуччу 1 степеннээх лауреат буолбутум, бэйэм эссем тиэмэтигэр, ол иһин олус үөрбүппүт. Иккис күнҥэ төгүрүк остуол буолбута, онно оҕолор бары туох туһунан суруйбуппутун билиһиннэрбиппит уонна кыра эҕэрдэ нүөмэр биэрбиппит. Биһиги Маргарита Егоровналыын бэйэбит национальнай инструмеммытыгар хомуска оонньообуппут. Ону таһынан, экскурсиялар эмиэ буолбуттара, саамай сөбүлээбитим «экскурсия по Москве». Наһаа элбэх саҥаны биллим, кэрэ- бэлиэ сирдэри көрдүм, астынным, хас Москваҕа сырыттаҕым аайы наар үчүгэй өйдөбүллээх хаалабын. Махтаныам этэ бу олус үчүгэй туругу үөскэтэр тэрээһин тэрийээччилэригэр. Сүбэлээбит, салайан илдьэ сылдьыбыт учууталбар Маргарита Егоровнаҕа, тапталлаах наар өйүүр, өйдүүр, төрөппүттэрбэр барҕа махтал буолуохтун!
Жанна Алексеева, Алампа аатынан Ытык-Күөл 1 нүөмэрдээх орто оскуолатын 10 кылааһын үөрэнээччитэ.
