Сэтинньи 15 күнүгэр Уус Таатта орто оскуолатыгар Таатта улууһун саха тылын, литэрэтиирэтин, төрүт култуура учууталларыгар аналлаах “О.Н.Корякина – Умсуура уонна билиҥҥи кэм” сэминээр-практикум олус бэркэ ааста.
Улуустааҕы үөрэх салаата Уолба орто оскуолатын оптуобуһун кэпсэтэн, айаммыт аана арыллан, сырыыбыт табылынна. Сэминээрбит биир дьиэ кэргэнтэн тахсыбыт талааннаах суруйааччылар Николай уонна Анна Неустроевтар пааматынньыктарын көрүүттэн саҕаланна. О.Н. Корякина — Умсуура биһигин ыйаабыт сиригэр илэ бэйэтинэн кэлэн сэминээр ис хоһоонун байытта. Улуустааҕы тэрээһиҥҥэ бэһис кылаас үөрэнээччитэ Дарина Николаева «Умсуура уонна «Чуораанчык» сурунаал», Алевтина Николаева «Хоһоон суруйуу ньымалара», Розабелла Готовцева 9 кылаас оҕолоругар аһаҕас уруоктары ыыттылар. Анна Кочнева толкуйдаабыт «Умсуура эйгэтэ» интерактивнай оонньуутугар үс бастыҥнар Мария Сивцева, Анна Боппосова, Оксана Андросова Умсуураттан Добун суругу кытта кинигэ, сурунаал бэлэх туттулар. «Дойду сурахтаах, алаас ааттаах» эскурсия оскуола тиэргэнигэр турар түмэлгэ баай ис хоһоонноох историятын педагог Антонина Неустроева сиһилии кэпсээтэ. ХИФУ доцена, биир дойдулаахпыт М.П. Попова «Творчество Умсууры в контексте развития современной якутской поэзии» научнай-методическай хабааннаах сэминээрин сэргэхтик ыытта. Сэминээр кыттыылаахтара институт дириэктэрэ Гаврил Торотоев илии баттааһыннаах туоһу суругу туттулар.
Кэлбит учууталлар үлэлэрин уопутун атастаһан, кэлбит дьоҥҥо тарҕаттылар. Кинилэргэ улуустааҕы үөрэҕирии салаатын начальнига Иннокентий Дягилев аатыттан туоһу суруктары тэрийээччи Галина Им туттартаата. Сэминээр ыалдьыта Иустиния Варламова Умсуура хоһооннорун иэйиилээхтик аахта, тойугунан киэргэттэ. Олохтоох нэһилиэк модельнай библиотекатын үлэһитэ Акулина Маркова, оскуола педагогбиблиотекара Розабелла Готовцева О.Н. Корякина — Умсуура олоҕун, айар үлэтин кэрэһэлиир баай ис хоһоонноох быыстапкатынан киэҥ сэҥээриини ылла.
Нэһилиэк уонна оскуола оҕото кыттыгастаах эҕэрдэ кэнсиэрин кэнниттэн Умсуура аман өһүнэн амалыйда. Оҕо сааһын, дьоно Уус Тааттаҕа олорбуттарын туһунан үтүө өйдөбүлүнэн аҕынна. Ааҕааччыларыгар тыл ис хоһоонун сөпкө туттан саҥаралларыгар, сахабыт тыла симэлийбэтигэр, төрөппүтү кытта күүскэ үлэ барарыгар сүбэ-соргу тылларынан түмүктээтэ. Ааптар «Биэрэ Дабыыдап» диэн бэртээхэй кинигэтэ тахсан барыбыт үөрүүтүнэн буолла. Сэргэх кэпсэтиигэ, истиҥ сэлэһиигэ оҕолор тыыннаах суруйааччы тылын-өһүн истэн, олохторугар умнуллубат кэрэ-бэлиэ түгэн буолан ааста. Улуус үөрэҕириитин салалтатыгар, Уус Таатта оскуолатын кэллэктиибигэр кэлбит ыалдьыттар, саха тылын учууталлара ис сүрэхтэн махтаннылар.
Сандаара.