Бары билэрбит курдук «Азия оҕолоро» норуоттар икки ардыларынааҕы спорт оонньуулара түөрт сылга биирдэ буолар. Кэтэһиилээх оонньууга Азия дойдуларын бастыҥ хамаандалара Сахабыт сирин күөх хонуутугар муһуннулар. Ол курдук Азия оҕолоро ахсыс оонньуутугар 24 дойдуттан, Россия 5 регионуттан улахан сүүмэрдээһини ааһан бастыҥнар кэлэн күөн көрүстүлэр: Азербайджан, Армения, Афганистан, Бахрейн, Бангладеш, Беларусь, Грузия, Индия, Иран, Казахстан, КНДР, Кытай, Кыргызстан, Лаос, Ливан, Монголия, Палестина, Пакистан, Корея, Сирия, Таджикистан, Таиланд, Тайбэй, Узбекистан, Россия аатын Ураллааҕы, Сибиирдээҕи, Уһук Илин федеральнай уокуруктар уонна дойдубут тэбэр сүрэҕиттэн Москуба куоратыттан кытыннылар. Быйылгы «Азия оҕолоро» норуоттар икки ардыларынааҕы спортивнай оонньуулар тэрээһиннэрэ 11 күн устата үрдүк таһымнаахтык ыытылынна.
Манна бастакы хамаандатыгар сүүмэрдээһини барыта холбоон 245 спортсмен ааспыт, онтон ккис хамаандаҕа – 125 оҕо киирбит.
Быйылгы оонньуу түмүгүнэн саамай элбэх мэтээллэнэн, Узбекистан хамаандата чорбойон 1-гы миэстэҕэ таҕыста.
36 кыһыл, 31 үрүҥ көмүс уонна 21 боруонса мэтээли ылла.
Иккис миэстэҕэ Сибиирдээҕи федеральнай уокурук 1- 31, 2 — 31, 3 – 31 мэтээллээх.
Беларусь 1-27, 2-21, 3-30 көрдөрүүтүнэн бочуоттаах үһүс миэстэҕэ таҕыста,
Саха сирин — 1-кы хамаандата кыһыл — 25, үрүҥ — 26, боруонса — 30 мэтээли тутан төрдүс миэстэҕэ таҕыста, Саха сирин иккис хамаандата к — 3, ү — 7, б — 15 мэтээллэнэн 14 миэстэ буолла. 
Аны 4 сылынан «Азия оҕолоро» IX норуоттар икки ардыларынааҕы оонньууну Тываҕа уонна Хакасияҕа ыытарга сайаапка түһэрдилэр. Хакасия Абакан уонна Тыва Кызыл куораттарыгар спорт национальнай көрүҥнэрэ үчүгэй сайдыылааҕын, үтүө үгэстэрдээҕин иһитин-нэрдилэр. Туһааннаах кэмитиэт өрөспүүбүлүкэ инфраструктуратын билсиигэ, ону таһынан эбийиэктэри, усулуобуйаны бэрэбиэркэлииргэ былаанныыллар.
Биир дойдулаахпыт, Дьохсоҕон нэһилиэгиттэн төрүттээх Алберт Винокуров «Азия оҕолоро» VIII спортивнай оонньууга мэһэйдээх сүүрүүгэ киирсэн Саха сирин хамаандатыгар кыһыл көмүс мэтээли аҕалла, ол туһунан санаатын үллэстэр:
— Дьокуускай куоракка маҥнайгы нүөмэрдээх оҕо спортивнай оскуолатыгар дьарыктанабын, тренерым Петр Александрович Нечаев буолар. Чэпчэки атлетиканан дьарыктаммытым номнуо 4 сыла буолар. Азия оҕолоро оонньууга биир сыл инниттэн дьаныардаахтык бэлэмнэнэн, улахан сүүмэрдээһини ааһан хапсыбыппыт. Күүтүүлээх, долгутуулаах күммүт тигинээн кэлэн Н.Н. Тарскай аатынан «Туймаада» стадиоҥҥа мустан бэйэбит кыахпытынан киирсибиппит. Чэпчэки атлетикаҕа уонна ырааҕы ыстаныыга от ыйын иккис күнүттэн саҕалаан 4 күн устата киирсибиппит. Биллэн турар, аан дойду бастыҥ спортсмен оҕолорун кытары киирсэр икки бүк эппиэтинэстээх, эрээри тыҥааһыннаах күрэс кэннэ Сахабыт сирин хамаандатын кытары кыайыы өрөгөйүн тутан, түөскэ мэтээл кэтэр олус долгутуулаах, умнуллубат бэлиэ күн буолар. Үйэ тухары «Азия оҕолоро» VIII Норуоттар икки ардыларынааҕы спортивнай Оонньуу устуоруйатыгар киирэн турарбытыттан кыттааччылар бары даҕаны киэн туттабыт. Азия оҕолоро оонньуу хас биирдии саҥа тахсан эрэр эдэр спортсменнарга, тренердэргэ спорт эйгэтигэр биир улахан хардыыны киллэрэр, бу кэннэ киһи түмүк оҥостон, иккис тыыннанан өссө күөрэйиэх санаата киирэр.
Мин саныахпар Азия Оҕолоро оонньуу бэйэҕэ эрэллээх буолууну, тулууру, дьулууру, чэгиэн буолууну, бэйэ туругун бөҕөргөтүүнү, самныбат санааны биэрэр, онон инникигэ былааным киэҥ.
Альберт төрөппүтэрэ, доҕотторо, биир дойдулаахтара эҕэрдэлээн туран инникитин сахалыы сэмэйдик этэҥҥэ сылдьарыгар баҕа санаа алгыһын тиэрдэллэр.
Альберт Винокуров аатын өсө да истиэхпит турдаҕа, онон уолбутугар үрдүк дабайыылары, саҥа арыйыылары, дьоллоох оҕо сааһы баҕарабыт. Бу улахан хабааннаах тэрээһиҥҥэ кыттыыны ылыы хас биирдии эдэр ыччакка үрдүк чиэс буолар. Бастыкы президеммит Михаил Николаев бүтүн норуоту ситимниир, оҕо-аймаҕы бары өттүнэн сайыннарар, чөл олоҕу, спорду өрө тутар, норуоттар култуураларын, устуоруйаларын үөрэтэр, бэйэ бэйэҕэ үтүө сыһыаны олохтуурга олоҕурбут, инники кэскиллэрбит туһугар туһуламмыт Азия оҕолорун оонньуута дьоллоох оҕо саас түһүлгэтэ буолан үөрүүнү эрэ сахтын.
Уруйана. Хаартыска «Азия оҕолоро» оонньуу дирекциятыттан