Сатабыл оҕо айымньытын дьиэтин иһинэн үлэлиир «Ситик» оҕо тэрилтэтэ сылын ахсын бастыҥнары, чаҕылхай көрдөрүүлээх оҕолору иитэн, үөрэтэн таһаарар. Матрена Алексеева өр кэмҥэ оҕолору кытта үлэлэһэн, кэрэҕэ уһуйан, хас биирдии оҕоҕо тирэх буолан, лидер хаачыстыбаларын, бэйэҕэ итэҕэллэрин, эрэллэрин арыйар сэдэх күүстээх. Урут оскуолаҕа да үөрэнэ сылдьан бары сүбэ-ама ылан, холобур оҥостон, биир хамаанда буолан олус элбэх кыайыыны тутан, умнуллубат кэрэ, бэлиэ түгэннэрбит Матрена Дмитриевналыын быстыспат ситимнээх.
Оҕо биир ситиһииттэн, хайҕабыл тылтан күүс ылынан өссө үрдүккэ дабайан тахсар. Онон оҕолору түмэн, сөптөөхтүк салайан үлэлиири эмиэ сатыахха, кыайыахха наада. Матрена бэйэтэ күн курдук киһи буолан оҕолору тардар, сылаас эйгэни тиэрдэр аналлаах. Ону мин бэйэбинэн билэн турабын. Кини кынатын анныгар киирбит оҕо саҥалыы тыын ылан, олох кэрэтин, күндүтүн билиэн баҕарардыы, сиэрдээх олоҕу тутуһан, ситиһиигэ, үрдүккэ дабайарга кынаттанан, тирэхтэнэн тахсар. Тыл күүһэ манна эмиэ баар дии саныыбын. Тылын күүһүнэн суолдьут буолан сырдыкка уһуйар сатабыллаах.
Уол оҕо бэйэтигэр эрэллээх, хайа да үлэттэн толлубат, күүстээх санаалаах буолара дьиэ кэргэнтэн улахан тутулуктаах. Ол эрэн уол оҕону иитиигэ сөптөөх ньыманы тутуһар уһуйааччы эмиэ сүрүн оруолу ылар. Билигин «Ситик» оҕо тэрилтэтигэр инники кэскиллэрбит, уолаттарбыт сөбүлээн сылдьаллар. Бары бэйэ бэйэлэригэр холобур буолан, кыра саастарыттан үлэҕэ тардыһан, сылын ахсын санаалара күүһүрэн, инникигэ сыал-сорук туруоруналларын көрөн киһи астынар.
Афоня Канаев А.Е. Мординов аатынан Тааттатааҕы лицей онус кылааһын үөрэнээччитэ. Кини «Үрдэл» бүтүн оҕо хамсааһыныгар бэрэссэдээтэл солбуйааччытынан буолар, ону таһынан СӨ «Бастыҥнар хамсааһыннарын» «Совет первых» чилиэнэ.
-«Ситик» оҕо тэрилтэтигэр биһиги биир хамаанда буолан бары улахан хабааннаах тэрээһиннэргэ, күрэстэргэ кыттабыт, баһаатайынан, волонтерунан үлэлиибит, ол эбэтэр 12 хайысханан толору үлэлии олоробут. Үөрэҕим сүнньүнэн олимпиадаларга, НПК-каларга ситиһиилээхтик кыттабын. Өрөспүүбүлүкэ үрдүнэн ыытыллыбыт «Лучший вожатый» күрэскэ маҥнайгы миэстэни ылбытым. Былырыын «Малая академия наук» кыттан «Лучший актер второго плана» диэн номинация ылбытым.
Бэһис кылааска үөрэнэ сырыттахпына дириэктэри иитэр үлэҕэ солбуйааччы Вера Юрьевна Михайлова олус элбэх туһааннаах күрэстэргэ кытыннаран тус олохпор, лидер хаачыстыбабын арыйарбар төһүү күүс буолбута. Онтон «Ситик» оҕо тэрилтэтэ «Школа юного вожатого» диэн күрэс ыыппыта. Манна ситиһиилээхтик кыттан, кэлин сайын устата баһаатайынан үлэлиир буолбутум. Онтон ыла Матрена Дмитриевна хамаандатыгар киирэн бары өттүнэн сайдан, арыллан барбытым. Манна киириэхпиттэн сыанаттан түспэккэ олус элбэх тэрээһиннэри ыытан, олоҕум биир сүрүн кэрчигэ саҕаламмыта. Бүтүн улуус, республика да үрдүнэн ыытыллыбыт КВН күрэһигэр маҥнайгы миэстэлэри ылары ситиспиппит.
-КВН миигин хайа да ыарахан түгэнтэн чаҕыйбакка, быыс-хайаҕас булан кыһалҕаны үмүрүтэргэ үөрэппитэ. Онон сыанаҕа сөптөөхтүк тутта-хапта сылдьарга, аудиторияттан толлубат буоларга КВН улахан көмөнү биэрэр эбит. Инникитин артыыс эбэтэр ырыаһыт буолар баҕа санаалаахпын. Биһиги бииргэ төрөөбүт бэһиэбит. Бэйэм кыра эрдэхпиттэн ыллыырбын, хомуска оонньуурбун сөбүлүүбүн. Бэйэм кыахпын бэрэбиэркэлээн литератураҕа ыытыллар олимпиадаларга ситиһиилээхтик кыттабын.
— Инники көлүөнэбит, инники кэскиллэрбит биһигини көрөн, холобур ылан сайдалларын туһугар, сырдык, ыраас дьиэлээхпит буоллар өссө күүстээх үлэ барыа этэ. Оҕолор бары мустан, саҥа бырайыактары киллэрэн үлэлэтэрбит туһугар, улууспут сайдыытыгар бэйэбит кылааппытын киллэрэрбитигэр, барыбытын түмэр, эдэр ыччаты хамсатар, туһунан дьиэлэниэхпитин баҕарабыт.
Оҕо сайдарын, үүнэрин туһугар кырдьык бүтүн улуус хамсаныахтаах, оччоҕо инникибит эрэллээх, үлэбит түмүктээх буолар. Үүнэр көлүөнэтин туһугар санаатын ууран туран, оҕо сайдар кэскилин түстээн сүүрэр-көтөр, кыһаллан үлэлиир киһибитигэр — Матрена Дмитриевнаҕа сайдыы суолун арыйан өссө үрдүк дабайыылары дабайарыгар баҕа санаа алгыһын тиэрдэбит.
Уруйана