Дьокуускай куоракка «Үлэ кыбаартала» креативнай кластерга Саха Өрөспүүбүлүкэтин бөдөҥ урбаанньыттара «Время решать вместе» диэн киэҥ хайысхалаах форумнара буолан ааста.
Форум бырамыысыланнас туризмын сайыннарыы суолун тула кэпсэтиигэ аныгы технологиялаах сонун бырайыактары билиһиннэрэргэ көхтөөх урбаанньыттары, уопсастыбаннай тэрилтэлэри, олохтоох бэйэни салайыныы уорганнарын, сайдыы суолун торумнуур институттары, биисинэс-инкубатор оскуолаларын о.д.а. тэрилтэлэри түмэ тарта. Быйыл «Дьоҕус уонна орто урбаан» национальнай бырайыагынан ыытыллар дьыалабыай форум мэдиссиинэ уонна бырамыысыланнас туризмын, оскуола иһинээҕи биисинэс-бырайыактары, араас биисинэс салааларын, каадыр уонна дьарыктаах буолуу, территорияны сайыннарыы, олохтоох оҥорон таһаарыыны тас дойдуларга таһаарыы курдук үгүс хайысхалары хапта.
Өрөспүүбүлүкэ урбаанньыттарын улахан түһүлгэлэригэр А.Е. Мординов аатынан Тааттатааҕы лиссиэй үөрэнээччилэрэ, учууталлара бэйэлэрин бырайыактарын билиһиннэрэн, аһаҕас кэпсэтиилэргэ кыттан кэллилэр.
Икки күн устата форум кыттыылаахтара дьыалабыай былаһааккалар төгүрүк остуолларыгар санааларын үллэстэн, маастар-кылаастарга сылдьан, ситиһиилээх урбаанньыттар питч-сессияларыгар, сэминээрдэригэр сылдьан, биисинэс-диалокка кыттан, санаа атастаһан, биисинэс-инкубатор оскуолалара «Учимся жить лучше» быыстапкаҕа оҥорон таһаарбыт бородууксуйаларын билиһиннэрэн, баай үөрүйэҕи ылынан, биисинэс-оонньууга кытыннылар.
Форумҥа лиссиэй резиденнэрин оҥоһуктара киэҥ сэҥээриини ылан, атыыта хамаҕатык барда. Биһиги оҕолорбут сахалыы киэргэл симэхтэриттэн, доруобуйаҕа туһалаах мыылаларыттан, Таатта талаҕыттан оҥоһуллубут олоппоһуттан саҕалаан, Эрхан Баснаев тобуллаҕас толкуйу, мындыр өйү сайыннарар тыл оонньуутун, Сандаар Доргуев киэҥ кэрэхсэбили ылбыт «Глав-музей планеты новая Якутия» комикс ааптарыскай икки чаастаах саҥа кинигэтин, Вова Мессеев тимири эллээн охсубут быһаҕын киэҥ атыыга таһаардылар. Биисинэс эйгэтигэр таһаарыылаахтык үлэлэһэр үөрэнээччилэрбит Эрхан Баснаев, Вова Мессеев уонна Сандаар Доргуев бэйэлэрин оҥорон таһаарбыт бородууксуйаларын форум кыттыылаахтарыгар билиһиннэрэн, тус санааларын аһаҕас микрофоҥҥа этэн, анал грамоталарынан наҕараадаланнылар.
Саха Өрөспүүбүлүкэтин үөрэҕи-риитин уонна билимин министиэристибэтиттэн биисинэс-инкубатор оскуолаларын куратора Наталья Михайловна Герасимова: «Быыстапкаҕа кэллэктиип үлэтэ көстөр, оҕолор сыһыамахтар, толлубакка саҥараллар, сайдар кэскиллээххит», — диэн форумҥа бэлиэтээн эппитэ биһиэхэ үрдүк сыанабылынан буолла.
Оҕолорбут биисинэс эйгэтигэр киирэн, бэйэ дьыалатын арыйарга холоноллоругар өссө да бары бииргэ түмсэн үлэлэһиэхпит диэн бигэ эрэллээхпит.
Изабелла СИВЦЕВА, Тааттатааҕы лиссиэй дириэктэрэ.