Муус устар 7 күнүгэр Дьокуускайга Өрөспүүбүлүкэтээҕи куорат, тыа оскуолаларын остолобуойдарын күрэхтэһиитэ буолла.
А.Е.Мординов аатынан Таатта лицейин остолобуойун хамаандата, сэбиэдиссэй Мария Ивановна Иванова, «Тыа сирин бастыҥ остолобуойа-2025» үрдүк ааты ылары ситистилэр уонна аны күһүн Москваҕа күрэхтэһэ барар чиэскэ тигистилэр. Хамаанда сүрүн концепцията саха төрүт аһын оскуола саастаах оҕолорго аһатыы буолар. Ол курдук быйыл хас нэдиэлэ аайы сэрэдэҕэ сахалыы төрүт аһы оҕолор аһаатылар. Сарсыардааҥҥы хааһы оннугар саламаат, лэппиэскэ, күнүс ис миинэ үөрэ-көтө иһэллэр, бэйэлэрэ үргээбит отонноруттан пастила сииллэр. Күрэхтэһии экспертэрэ бэйэ аһын аһатыыны олус сэҥээрдилэр. Республика уһуйааннарыгар, оскуолаларыгар төрүт аһы аһатыы 38%-ҥа эрэ тиийдэ дииллэр, ону үрдэтиигэ сорук турарын тоһоҕолоотулар. Күрэхтэһии түөрт түһүмэҕинэн барда, сокуоннары, быраабылалары билииттэн саҕалаан остуол тардыыга тиийэ. Элбэҕи сонуну көрдүбүт. Бэйэбит биир сонун бүлүүдэбитинэн мундуттан хохту, соботтон барча оҥоруу буолла.
Кыттыбыт повардарбытыгар, үөрэхпит салалтатыгар оскуола салалтатын аатыттан махтанабыт. Оҕолорбут доруобай аһы аһаан, саха омугу тэнитэ, өйдөрө-санаалара үрдүү туралларын туһугар үлэбит түмсүүлээх, кэскиллээх буоллун.
Изабелла Сивцева, лицей директора.