Соторутааҕыта ырыа-хоһоон куттаах, дорҕоонноохтук ааҕар, иэйиилээхтик этэр Сардаана Попова «Тапталтан тыллыбыт ИЭЙИИ» Игидэй нэһилиэгэр бастакы поэзия киэһэтигэр ыраахтан чугастан айар куттаах, поэзияны сэҥээрээччилэри муста.
Манна саха поэттарын хоһоонноро тыыннаах музыка доҕуһуолунан, ол курдук саха филармониятын музыканнара Светлана Тютрина — виолончель, Максим Аммосов — скрипка, биир дойдулаахпыт Артем Дедюкин — фортепиано тыаһынан киһи уйулҕатын уһугуннаран саха тылыгар, Тааттаҕа тапталынан тайаардыбыт. Сардаана ийэтэ Марина Спартаковна Попова Дьокуускайтан кэлэн, кыыһыгар анабыл хоһоонун ааҕан иһитиннэрдэ. Тааттаҕа хоһоон хомуһуннаах хонуутугар Дьөҥкү Сээн төрөөбүт түөлбэтиттэн «Дьэҥкир алып» түмсүү салайааччыта Зоя Боппосова уонна кини эрэллээх дьүөгэлэрэ Варвара, Саргылана Рахлеевалар, Анна Боппосова поэтическай оруосабай, аалай кытархай өҥнөрү дьүөрэлээн таҥнан тахсан, Уолбалыы дорҕооннорун иһитиннэрбиттэрэ олус табылынна. Галина Другина Дьохсоҕонтон дьоһуннаах Эбээ Валяттан саҕалаан, хомуньуус-баартыйа тыынынан илгийэр Галина Арылахова, талах маһыныы имигэс Любовь Власова о.д.а. нэһилиэк киэн туттар Акулина Егасова, Валентина Пинигина-Арылы хоһооннорун аахтылар. Игидэй «Иэйии» түмсүү истиҥ тэрийээччи, талба талааннаах Суһума — Далбар Хотуттара күөх от алыптаах уйгутунуу өрө көтөҕүллэн аахтылар. Тыараһаттан «Хардыы» түмсүүттэн сахалартан бастакы суруйааччы Биэрэ Дабыыдап, Ирина Колодезникова-Ымыы дойдутун тыыныгар иитиллибит туналыйар Туналы Солко уус тылынан умсугутта. «Уран тыл» улуустааҕы литературнай түмсүү төһүү күүстэрэ, аҕас-балыстыылар Дьөҥкүчээнэ Сандааралыын сааланы сэргэхситтилэр.
Бу барыта — А.Ф.Бояров аатынан НАДь, Игидэй нэһилиэгэр умнуллубат, өргө диэри сөҕүрүйбэт сүүрээн салгыҥҥа уйдаран, өссө да бүччүм поэзия киэһэлэрэ буолалларын кэрэһэлээтэ. Киһи иэйиитин уһугуннарар, уоскутар, сынньатар тыыннаах дорҕоон алыбыгар ылларан, тэрийээччилэргэ махтанан тарҕастыбыт.
Оксана Андросова.