Биһиги өрөспүүбүлүкэбит неофашизмы кыайар туһугар тугунан да кэмнэммэт кылаатын киллэрсэр. Байыастарбыт байыаннай дьайыы фроннарыгар дойду туһугар бэйэлэрин харыстаммакка кыргыһаллар. Волонтердар кинилэри дьыаланан, үтүө тылынан өйүүллэр. Байыастарга уонна кинилэр дьиэ кэргэттэригэр болҕомто, кыһамньы уҕараабат, ол туһугар Саха сирин правительствота уонна өрөспүүбүлүкэ олохтоохторо көмө-тирэх буолаллар. Бары бииргэ – модун күүспүт, барытын кыайыахпыт!
Биһиги геройдарбыт
Саха сирэ – геройдар дойдулара. Байыаннай дьайыыга инники кирбиигэ сылдьар байыастарбыт хорсун-хоодуот, күүстээх санаа холобурун көрдөрөн өстөөҕү утары харса суох кимэн киирэллэр. Кинилэр хас биирдии кыргыһыыны үлтүрүтүүлэрэ – кыайыыны чугаһатар. Аҕа дойдуларын көмүскүү сылдьар биир дойдулаахтарбыт ортолоругар фроҥҥа сүрэхтэрин баҕатынан барбыттар аҕыйаҕа суохтар. «Россия Геройа» сулуһу бастакынан туппут доброволец, «Боотур-1» саха этэрээтин хамандыыра Александр Колесов буолар. Үрдүк наҕарааданы кини дойду президенэ Владимир Путин илиититтэн туппута. «Александр Гаврильевич Колесов бойобуой сорудаҕы чиэстээхтик толорбутун таһынан, кыргыһыы хонуутун ортотуттан бааһырбыт табаарыстарын таһаарда. Кытаанах киирсиилэргэ бэйэтин дьиҥнээх герой быһыытынан көрдөрөн «Россия Геройа» ааты ылыан ылла», – диэбитэ Владимир Путин.
2023 сылга «Россия Геройа» үрдүк ааты биһиги 4 байыаспыт ылбыта. Кинилэр истэригэр ВСУ атаакалыыр байыаннай техникатын колоннатын сууһарбыт «Алеша» танка экипаһын суоппар-механига Филипп Евсеев, оператор-наводчик Алексей Неустроев бааллар.
Ким да умнуллубат
Саха сирин өссө биир чулуу уола, «Россия Геройа» кыһыл көмүс сулуһун ылбыт Сунтаар улууһуттан төрүттээх морпех Дмитрий Егоров буолар. Кини Донецкай народнай республика Новомайорскай нэһилиэнньэлээх пуунун аттыгар өстөөҕү кытта киирсэ сылдьан геройдуу охтубута. ВСУ штурмовой бөлөҕүн сороҕун эһэн өстөөҕү тэйиппитэ. 48 саастаах байыас кэргэннээх, 2 уол оҕолоох этэ. Дойду аҕа баһылыга Владимир Путин Ороһуоспа иннинэ байыаннай дьайыыга сылдьан олохторун толук уурбут Россия Геройдарын дьиэ кэргэннэрин кытта көрсүбүтэ. Олор истэригэр Дмитрий Егоров дьиэ кэргэнэ баара. Дойду аҕа баһылыга кинилэри кытта олус истиҥник кэпсэппитэ, аҕаларын хорсун быһыытын иһин махтаммыта.
«Я в тылу не останусь»
2023 сылга өрөспүүбүлүкэҕэ «Я в тылу не останусь» диэн кинигэ саамай ааҕыллымтыа буолбута. Ол курдук, «Айар» национальнай кыһа айымньыларын бастыҥнарыгар 2022 сыл сэтинньитигэр доҕотторун быыһаары сэрии хонуутугар геройдуу охтубут биһиги өрөспүүбүлүкэбит байыаһа Василий Данилов туһунан Сергей Москвитин кинигэтэ киирбитэ. Бойобуой доҕотторо ахталларынан, Василий Данилов кинилэргэ эр санаа, хорсун быһыы холобурунан буолар. Кини аата-суола, хорсун быһыыта бүтүн Саха сирин үрдүнэн сатараабыта. «Россия Геройа» государственнай наҕарааданы иҥэрэр туһугар 48538 киһи илии баттаабыта. Василий Данилов сырдык мөссүөнэ боруонсаҕа кутуллан Уус Алдан улууһун киинигэр Бороҕоҥҥо үйэтитиллэн пааматынньык турбута.
Нөрүөн нөргүй буолуохтун!
Биһиги уолаттарбыт байыаннай дьайыыттан төрөөбүт дойдуларыгар төннөн кэлэллэрин чугас эрэ дьоно буолбакка, бүтүн Саха сирэ күүтэр. Төрөөбүт куораттарыгар, бөһүөлэктэригэр байыастарга үлэ булалларыгар көмөлөһөллөр, наада буоллаҕына саҥа идэҕэ үөрэнэллэригэр кыах бэриллэр. Байыаннай сулууспалаахтар аймахтара үлэ булалларыгар эмиэ көмө оҥоһуллар. Маннык үтүө холобур өрөспүүбүлүкэбитигэр элбэх. Россия президенэ Владимир Путин эппитин курдук: «Байыаннай сулууспалаахтар дойдулара кинилэри сыаналыырын, көмөлөһөрүн, өйүүрүн билиэхтээхтэр уонна биһиэхэ бүк эрэниэхтээхтэр». Саха сиригэр байыаннай дьайыы кыттыылаахтара уонна кинилэр дьиэ кэргэннэрэ медицинскэй реабилитацияттан уонна психологическай көмөттөн саҕалаан баран, араас хабааннаах чэпчэтии уонна субсидия көрүҥүн 28 хайысханан ылаллар.
Биһиги өрөспүүбүлүкэбитигэр байыастары кыһалҕаҕа хаалларбаттар. Холобура, байыаннай дьайыы кыттыылааҕа, Дьокуускай олохтооҕо Павел Моякунов дьиэтэ уокка былдьаммытыгар волонтердар кини дьиэ кэргэнигэр «Биир ньыгыл Россия» партия региональнай салаатын көмөтүнэн дьиэ тутан биэрбиттэрэ. Моякуновтар дьиэлэрэ ааспыт сылга уокка былдьаммыта. Бу кэмҥэ дьиэ кэргэн аҕа баһылыга бааһыран госпитальга сытара. Кини кэргэнэ уонна оҕолоро быыһаммыттара эрээри, маллара-саллара, таҥастара-саптара, докумуоннара уокка былдьаммыта. Уопсай көмө күүһүнэн дьиэ кэргэн 2024 сылы саҥа улахан дьиэҕэ көрсүбүтэ. «Дьиэбит сылаас, сырдык. Уоллаах кыыспыт тус-туспа хостоохтор», – диэн Павел Моякунов махталын биллэрбитэ.
Байыас, чугас дьонуҥ туһугар санаарҕаама!
Кэргэттэр, аҕалар, уолаттар байыаннай дайыыга сылдьар кэмнэригэр государство кинилэр чугас дьоннорун харыстыыр, араҥаччылыыр, көмөлөһөр. Байыаннай сулууспалаахтар оҕолорун олорор сирдэриттэн чугас оскуолаҕа, оҕо саадыгар ылаллар. Кинилэр оскуола кэнниттэн дьарыкка, куруһуоктарга босхо сылдьаллар. Оҕолор өрөспүүбүлүкэ пансионаттарыгар босхо сынньаналлар. Санаторнай-курортнай путевкаларынан байыаннай сулууспалаахтар төрөппүттэрин эмиэ хааччыйаллар. Бэлиэтээн эттэххэ, кинилэр Саха сиригэр эрэ буолбакка, атын регионнарга эмиэ сынньаныахтарын, эмтэниэхтэрин сөп.
Үгүс холобуртан биирдэстэрин ылан көрдөххө, байыаннай дьайыыга сылдьар Сунтаар улууһун Агдаары (Хадан нэһилиэгэ) сэлиэнньэтиттэн бырааттыы Ивановтар төрөппүттэрэ хаарбах дьиэттэн саҥаҕа көһүөхтэрэ. Сотору кэминэн кинилэр төрөөбүт нэһилиэктэригэр «Хаарбах дьиэттэн дьону көһөрүү» программанан 4 квартиралаах дьиэ тутуллан бүтүөҕэ. Мантан биирдэстэрин байыастар төрөппүттэрэ ылыахтара.
Ис сүрэхтэн
Саха сирин бүттүүн олохтооҕо байыаннай дьайыы кыттыылаахтарын уонна кинилэр чугас дьоннорун истиҥ баҕа санаанан өйүүллэр. Хас биирдии нэһилиэккэ, кыра-улахан бөһүөлэк диэн аахсыбакка, фроҥҥа диэн хаххалыыр сиэккэлэри, байыастарга халыҥ наскылары, үтүлүктэри тигэн, баайан, дьиэ минньигэс, амтаннаах аһын-үөлүн астаан ыыталлар. Үтүө бачыымнарын үтүө алгыһынан тиэрдэллэр. Хас биирдии гуманитарнай көмө оҕолор уонна улахан дьон истиҥ-иһирэх тыллардаах суруктарынан арыалланар.
Бары бииргэ – модун күүспүт, барытын кыайыахпыт!