Аан дойдутааҕы худуоһунньук күнүгэр Тааттаттан тардыылаах худуоһунньук Наталья Петрова туһунан билиһиннэриэхпит. Наталья 1990 сыллаахха Марфа уонна Назар Никифоровтар дьиэ кэргэттэригэр төрөөбүтэ.  Оҕо сааһа кэрэ айылҕалаах, талааннаах дьоннордоох Таатта сиригэр ааспыта. 2007 сыллаахха Тааттатааҕы лицейи бүтэрбитэ. Ити сыл Дьокуускайдааҕы медицинскэй колледжка фармацевт идэтигэр туттарсан киирэр. Салгыы үрдэтинэ медицинскэй институкка “Лечебное дело” туттарсар. Устудьуоннуур сылларыгар ойуулуур-дьүһүннүүр быыстапкаларга кыттыыны ылар. Үһүс куурус кэнниттэн кини олоҕо 180 кыраадыс тосту уларыйар. Салгыы Натальялыын кэпсэтиибитин билиһиннэрэрбит:

— Наталья, бүгүн Аан дойдутааҕы худуоһунньуктар күннэринэн эҕэрдэлиибин. Уонна сэһэргэһиибитин худуоһунньук идэтигэр хайдах кэлбиккиттэн саҕалыахха.

— Мин кыра эрдэхпиттэн, бэйэбин өйдүөхпүттэн уруһуйдуур санаам күүстээх этэ. Хантан кэлбитин билбэтим, төһө да олоххо көрүүгүн, сыалгын уларыта сатаабытым иһин, ис-искиттэн тахса турар күүстэн, киһи сатаан куоппат, утарыласпат  эбит. Ол иһин эмчит үөрэхпин тохтотон, Дьокуускайдааҕы художественнай училищеҕэ туттарсан киирбитим. Биллэн турар, чугас дьонум ылымматахтара. Уруһуйдуур баҕаттан улахан   утарсыыны ааһан,  бэйэм күүспэр эрэнэн,  идэбин уларыппытым.

— Устудьуоннуур сылларга быыстапкаларга кыттар этим диэн ахтыбытын, бастакы дьоҥҥо-сэргэҕэ тахсыбыт үлэлэрин ханныктарый?

Аан бастакы быыстапкаларым 2012 с.  “Арт-Куб”, 2013 с. ХИФУ иһинэн тэриллибит эдэр худуоһунньуктар күрэхтэһии быыстапкалара буолар. 2020 с. Национальнай художественнай музей бырайыагынан өрөспүүбүлүкэтээҕи “Арт-Молодость” быыстапкаҕа кыттыбытым. Манна  саҥа «Саха киэргэллэрэ» сериябын билиһиннэрбитим. Миигин сэргэ быыстапкаҕа  кэскиллээх худуоһунньуктар Феодосий Заровняев, Екатерина Суржанинова, Мира Аргунова кыттыбыттара.

— Эйигин дьон-сэргэ хантан билэн, хартыыналары сакаастыыр буолбутай?

2018 с. социальнай ситимҥэ страница арынан, үлэлэрбин онно таһаарар буолбутум, @nataka_p  диэн нигынан билэллэр.

— Онно аан бастакы үлэҥ ханныгый?

— Бастакы таһаарыыбар натюрморт укпутум: хараҥа фоҥҥа килэбэчигэс самовардаах подстаканнигы  сэргэ кытарчы буспут кыһыл отону уруһуйдаабытым. Бу үлэм ойуулуур-дьүһүннүүр искусство «гипперреализм»  хайысхатыгар ылыннарыылаахтык тайаныым холобура буолар.

  «Гипперреализм» диэн ойуулуур-дьүһүннүүр искусство биир хайысхатын туһунан быһаарыахха эрэ.

—     Бу хайысха ХХ үйэ 1970-с сылларыгар үөскээбитэ, ордук  эстетическэй көрүүгэ олоҕурар. Уруһуйдуур эбийиэккин үүт-үкчү буолбакка, кини кэрэ көстүүлэригэр болҕомтоҕун уураҕын.

— “Саха киэргэллэрэ” серияҥ хайдах үөскээбитэй?

— Биирдэ Ем.Ярославскай аатынан «Саха музейыгар» экскурсиялыы сылдьан, саха омук төрүт дьарыгын көрдөрөр саалаҕа, хараҕым күн уотугар дьахтар ытарҕалара күлүмүрдүү оонньууругар хатана түстэ. Ол кэмтэн  саҥа идея киирэн, өбүгэлэрбит кэрэ көстүүлээх  «харыйа», «сиэл», «хаҥха» ытарҕаларын араастарын хуолустаҕа тиспитим.

— Наталья, эн бэйэҕин көҥүл худуоһунньукпун диэн суруйаҕын постаргар. Ол аата «фрилансер-художник» диэтэхпитинэ сыыспаппыт буолуо. Фрилансер -худуоһунньук саҥа күнэ хайдах саҕаланарый?

-Тэрилтэҕэ үлэлээбэт буолан, үлэ чааһа диэн биһиэхэ суох. Дьиэбэр олорон эрэ иэйии киирдэҕинэ, Сахабыт сирин киэҥ нэлэмэн айылҕатын, кэрэ көстүүлэрин, айылҕа оҕолорун уруһуйдуубун. Ол быыһыгар сакааһынан хаартыскаттан дьон мэтириэтин, айылҕаны, дьон хото  «Саха киэргэллэрэ»  сериябыттан сакаастыыр.

— Ханнык худуоһунньуктар үлэлэрин сэргиигиний?

— Нуучча классик худуоһунньуктарын Е.И.Репин, Исаак Левитан, М.А.Врубель, тас дойду уруһуйдьуттарын Херст, Густав Климт, Кунс, Баския, Уорхол, Ен-Сун Ким, Ким Чен-Ки уо.д.а. үлэлэрин көрөн, иэйии киирэр, санаам көтөҕүллэр, уруһуйдуур кэммэр мин уонна мин хартыынам эрэ хаалар, аһыыры, утуйары кытта умнаҕын.

— Наталья, эн, дьэ, кырдьык оҕо сааһыҥ баҕатын толорон, ыарахаттарга бэриммэккэ худуоһунньук буолар баҕаҥ баһыйан, айар суолга үктэммит киһи буолаҕын. Инники былаанын туһунан ааҕааччыларбытыгар сэгэттэргин…

— Хас биирдии худуоһунньук айар үлэтин дьоҥҥо-сэргэҕэ билиһиннэрэн быыстапка тэрийиэхтээх дии саныыбын. Аны биир-икки сылынан үлэлэрбин чөкөтөн, саҥа хартыыналары суруйан, быыстапка тэрийэр санаалаахпын. Маны таһынан, Дьокуускайга худуоһунньук уонна кини сэҥээрээччилэрин эйгэлэрин тэрийэр арт-салон арыйыахпын баҕарабын. Дьэ, оччоҕо улахан куораттарга курдук искусство дьоно түмсэр, энергиябытын атастаһар миэстэлээх буолуохпут этэ.

Ити курдук, баҕалаах баҕанаҕа ыттар диэн саха өс хоһооно таба эппитинии, идэҕитин сөпкө таллаххытына олоххут оҥкулун оҥосторгутун умнумаҥ. Онтон биһиги талааннаах кыыспытыгар Наталья Петроваҕа айар ыллыга кэҥээн,  ойуулуур-дьүһүннүр искусство кэрэ эйгэтигэр ситиһиилэри баҕарыаҕыҥ. Мантан аллараа худуоһунньук үлэлэрин билиһиннэрэбит.

Кэпсэттэ Александра Постникова, “Таатта” түмэлин пуондаҕа үлэһитэ

PS: Наталья Петрова үлэлэрин сэҥээрээччилэр +7 914 280-19-27 бу нүөмэринэн билсиэххитин сөп.

Читайте дальше