Сыллар ааһыахтара…
Ол эрэн эн мөссүөнүҥ
Сүрэхпитигэр өрүү тыыннаах…
Күндү киһибитин сүтэрбиппит номнуо биир сыл ааста. Ыраас халлааҥҥа этиҥ эппитинии ааспыт сыл кулун тутар 13 киэһээ хойут төлөпүөн тыаһа куһаҕан сонуну тиэрдибитэ.
Таптыыр соҕотох уол оҕом, олоҕум аргыһа, амарах аҕабыт Репин Василий Васильевич 1976 сыллаахха кулун тутар 27 күнүгэр Өлүөхүмэ улууһун 1-Нөөрүктээйи нэһилиэгэр иккис оҕонон күн сирин көрбүтэ.
1983 сыллаахха Ытык Күөл 8 кылаастаах орто оскуолатыгар Екатерина Никитична Меккюсярова салайааччылаах 1 кылааска үөрэнэ киирэр. Оскуолаҕа үөрэнэр сылларыгар спордунан сөбүлээн дьарыктанара, чэпчэки атлетикаҕа, хайыһарга үрдүк ситиһиилэрдээҕэ. 1993 сыллаахха оскуоланы бүтэрээт быстах үлэлиир, онтон Аҕа дойдутун иннигэр ытык иэһин төлүү сулууспалыы барбыта.
Икки сылынан төннөн кэлээт Таатта улууһун ИДьО милиционерынан үлэлии киирэр. Ис дьыала отделениетыгар 2006 сылга диэри, ол кэннэ Анал байыаннай дьайыыга барыар диэри ЧОП «Гранит» тэрилтэҕэ үтүө суобастаахтык үлэлээбитэ.
Вася элбэх саҥата суох, туруу үлэһит, көнө майгылааҕа. Айылҕаҕа сылдьарын, бултуурун, сир астыырын туохтааҕар да ордороро.
Күндү киһибитин төрөөбүт буорун булларарга күүс-көмө, өйөбүл буолбут бар дьоммутугар, чуолаан ДВФО Постпредство үлэһиттэригэр Борисов Ким Александровичка, Протопопов Валерий Николаевичка, Алексей уонна Диана Сыромятниковтарга, Таатта улууһун уонна нэһилиэгин дьаһалталарыгар, Вася доҕотторугар барҕа махталбытын тиэрдэбит, мэлдьи чэгиэн сылдьыҥ, дьиэ-кэргэттэргитигэр дьолу, эйэлээх ыраас халлааны.
Кылгас да буоллар сырдык, ыраас олоҕу олорбут киһибит сиппэтэх ыра санааларын ситэриэхпит, дьоллоох түгэннэрбитин өйбүтүгэр-сүрэхпитигэр итиинэн илгийэр өйдөбүл оҥостуохпут.
Аттыбытыгар мэлдьи баар Аанньал буоларгар итэҕэйэбит.
Ийэтэ, кэргэнэ, оҕолоро.