Ыам ыйын 13 күнүгэр улуус аҕа баһылыга А. С. Бурцев Таатта нэһилиэгин «Алгыс» балаҕаныгар Анал байыаннай дьайыыга кыттыбыт уонна кытта сылдьар байыастар дьиэ кэргэттэрин кытта көрүстэ.
Тэрээһиҥҥэ нэһилиэктэртэн ийэлэр, аҕалар мустан атах тэпсэн олорон кэпсэтиһэн санааларын сайҕаатылар, тыыннарын таһаардылар. Кинилэр кэпсээннэрин киһи харах уута суох истибэт. Дьиэ кэргэн тулхадыйбат тулааһыннара, дурда-хахха буолар киһилэрэ бу анал байыаннай дьайыыга ыҥырыллан барбыта дьиэ-уот, хаһаайыстыба да өттүгэр улахан кыһалҕалары үөскэтэрэ саарбаҕа суох. Ол иһин ону туоратарга, кыратык эмит кыһалҕаларын чэпчэтиһэргэ санаалар этилиннилэр, хоруйдар бэрилиннилэр.
Манна даҕатан эттэххэ улууспут аҕа баһылыга алта ый АБДь-га сылдьан кэлэн Таатта ыччаттара хайдах сылдьалларын туһунан тыыннаах туоһу буолан кэпсээбититтэн төрөппүттэр астыннылар. Ону таһынан туруорсуу боппуруостара эмиэ бааллара. Ол курдук, анал өйдөбүнньүк сквер тутуллуутун, баннер, дьоруой паартатын оҥотторуутун, муус-мас дьаһыйыытын, дьиэ-уот өрөмүөнүн, сир түҥэтигэ, дьиэ кэргэттэри кытта ыкса сибээстээхтик үлэлэһэргэ туруорустулар о.д.а. туруорсуу боппуруостарын сүбэлэстилэр. Маны таһынан, туһааннаах тэрилтэлэртэн (Улуус баайы-дуолу салайар кэмитиэт, Олох-дьаһах коммунальнай хаһаайыстыба, Оройуоннааҕы киин балыыһа, Нэһилиэнньэни дьарыктаах буолуутун киинэ, социальнай харысхал тэрилтэтэ, Россия социальнай фондатын Тааттааҕы филиала) салайааччылар, үлэһиттэр кэлэн ханнык көмө программалар баалларын сырдаттылар, кэпсээтилэр, дьон сэҥээритин ыллылар. Улуус бэтэрээннэрин сэбиэтин бэрэссэдээтэлэ Попова М. А., улуус баһылыгын солбуйааччыта Сунхалыров С. В. тэрээһин кыттыылаахтарыгар бу курдук бииргэ тутуһан былааннаах үлэни ыытары торумнастылар. Төрөппүттэр ситимнээх үлэ биир түмсүүттэн, сомоҕолоһууттан уонна тус бэйэлэриттэн тутулуктааҕын өйдөөтүлэр.
Түмүккэ Эдэр натуралистар станциятын коллектива (салайааччы Им Николай Николаевич) 150 устуука сибэкки рассадатын АБДь сылдьар уолаттарбыт дьиэ кэргэттэригэр бэлэх гынан ууммуттарын дьахтар сэбиэтэ “Далбар Хотун” сурунаалы уонна Анал байыаннай дьыала специалистара кыттыылаахтарга түҥэттилэр.
Төрөппүттэр аҕа баһылыктан дьоһун этиилэри, сүбэлэри ылбыттара буолуо диэн эрэнэбит.
Таатта улууһун дьаһалтата.
Саинна хаартыскаҕа түһэриитэ.