ТЫАРАҺАҔА ТӨРДҮ-УУҺУ ҮӨРЭТЭР КИНИГЭ КҮН СИРИН КӨРДӨ

Тохсунньу 31 күнүгэр Тыараһа нэһилиэгэр “Тыараһа. Ревизии. Переписи. Списки” диэн ураты суолталаах кинигэ сүрэхтэниитэ буолан ааста.

Кинигэ ааптара — олохтоох ыччат, Туйаара Терентьевна, Никифор Михайлович Жерготовтар улахан уоллара, М.К.Аммосов аатынан Хотугулуу илиҥҥи федеральнай университет Историческай факультетын, антропология, археология уонна этнология диэн хайысхатын выпускнига, билигин Миклухо-Маклай аатынан Москватааҕы Антропология уонна этнология институтун соискателэ, күн бүгүн Чурапчы улууһун Болтоҥо нэһилиэгэр баһылык солбуйааччытынан үлэлии сылдьар, тапталлаах кэргэн, икки оҕо амарах аҕата Никифор Жерготов буолар. Ааптар 2016 сылтан саҕалаан, сүҥкэн үлэни ыытан, дьаныардаахтык матырыйаалын хомуйан, саҕалаабыт үлэтин тиһэҕэр тиэрдэн нэһилиэк историятыгар улахан суолталаах үлэ күн сирин көрдө. Никифор бу үлэтин икки эбээтин Анна Дмитриевна Сабарайкина уонна Татьяна Никифоровна Полускина сырдык кэриэстэригэр анаабыт. Бу кинигэ күн сирин көрүүтүгэр Никифор бииргэ төрөөбүт быраата Сандал Жерготов көмөлөһөн, уолаттар иккиэ буолан улахан үлэни кыайа тутан, үбүлээһинигэр нэһилиэк дьаһалтата өйөөбүт. Никифор кинигэтин таһаарыыга хайдах үлэлээбитин, хайысхаларынан арааран туох матырыйаал киирбитин слайдаларга олоҕуран сырдатта, инники былаанын кэпсээтэ. Бу кинигэ төрүччү оҥоруутугар Тыараһа дьонугар сүҥкэн тирэх буоларын, атын нэһилиэктэргэ үтүө холобур буоларын тэрээһин кыттыылаахтара бары бэлиэтээтилэр. Кинигэ сүрэхтэниитигэр нэһилиэк олохтоохторун сэргэ, улуус кииниттэн, Дьокуускайтан ыалдьыттар кэлэн кыттыыны ыллылар.

Ол курдук, Таатта улууһун баһылыгын социальнай боппуруостарга Святослав Васильевич Сунхалыров, улуустааҕы ветераннар сэбиэттэрин салайааччы Маргарита Арисовна Попова, А.Е.Мординов аатынан Тааттатааҕы лицей директора Изабелла Александровна Сивцева, Дьокуускайтан А.Е.Кулаковскай институтун научнай сотруднига Светлана Дмитриевна Дарбасова, нэһилиэк кыраайы үөрэтээччилэрин түмсүүтэ (салайааччы С.Н.Собакина), “Айылгы” аҕам саастаахтар түмсүүлэрэ (салайааччы Огонерова Т.Г.), олохтоох библиотека салайааччыта М.Д.Слепцова кинигэ туһунан санааларын үллэстэн, эдэр ааптарга махтал тылларын эттилэр. Тыараһа нэһилиэгин баһылыга Прокопий Прокопьевич Турнин эҕэрдэлээн туран, “Нэһилиэк социально-экономическай сайдыытыгар кылаатын иһин” диэн түөскэ анньыллар анал бэлиэлээх наҕараадатын, норуот маастара, туойдьут Ульяна Васильевна Матвеева анаан оҥорбут көмүлүөк оһоҕун бэлэх туттарда. Дойдутун историятын хорутуулаахтык хаһан үлэлэһэр кэлэр кэскиллээх эдэр ааптарга бар дьоно бу киэһэ алгыс тылларын анаан, инникитин да айар аартыга арыллан айа-тута турарыгар баҕа санааларын тиэртилэр.

 

Галина ПОЛУСКИНА.