Тыараһа нэһилиэгэр тохсунньу 18 күнүгэр Л.Н.Турнин аатынан “Алгыс” норуот айымньытын дьиэтигэр “Точь в точь” диэн пародия-шоу күрэһэ буолан ааста. Тэрилтэлэр икки ардыгар маннык хабааннаах күрэстэр сылын ахсын ыытыллар үтүө үгэскэ кубулуйдулар. Урукку өттүгэр “Две звезды”, “Үҥкүүлээ” бырайыактар ыытыллыбыт эбит буоллахтарына, былырыын уонна быйыл “Точь в точь” пародия күрэһэ үрдүк тэрээһиннээхтик ыытылынна.
Быйылгы күрэс уратыта диэн, маҥнайгы түһүмэххэ кыттааччылар Россия эстрадатын биллэр-көстөр ансаамбылларын үтүктэн, эт куоластарынан ыллаан, ансаамбыл уратытын арыйар гына таҥнан-симэнэн, үҥкүүлээн көрдөрдүлэр. Иккис түмүһэххэ ааспыт Оҕо саас сылынан мультфильмнар ырыаларынан, ис хоһоонун арыйар гына артыыстаан көрдөрдүлэр.
Уопсайа 4 хамаанда кыттыыны ылла: М.Н.Турнин аатынан Тыараһатааҕы орто оскуола, Тыараһатааҕы коррекционнай интернат-оскуола, олохтоох уһуйаан коллектива, кыра тэрилтэлэр (балыыһа, ветеринария, маҕаһыыннар) холбоһуктаах хамаандалара.
Бастакынан уһуйаан коллективын кыргыттара “Блестящие” бөлөх буолан, көлүөһэлээх чымыдааннарын соспутунан, чаҕылыйан тахсан кэлбиттэригэр көрөөччүлэр ытыстарын тыаһа өрө хабылла түстэ. Салҕыы кыра тэрилтэлэр 80-нус сыллардаахха суһумнуур сулус буола сылдьыбыт “Мираж” группаны үтүктэн, уостан түспэккэ ылланар “Музыка нас связала” ырыаны тоҕо тардан кэбистилэр. Үсүһүнэн орто оскуола коллектива халыҥ хампаанньанан тахсан, “Дюна” группа “Коммунальная квартира” ырыатын ис хоһоонун толору арыйда. Бастакы түһүмэҕи коррекционнай оскуола коллектива “На-На” бөлөҕү үүт үкчү үтүктэн, уоттаах-күөстээх нүөмэринэн түмүктээтэ. Аҥардас бөлөх ырыаһыттара, музыканнара эрэ буолбакка, имигэс бэйэлээх үҥкүүһүт кыргыттара, “охраналара”, фанаттара кытта бааллара, нүөмэр силигин ситэрэн, толорон биэрдэ.
Иккис түһүмэххэ көрөөччүлэр мультфильмнарга олоҕурбут бииртэн биир сэргэх туруорууну көрөн оҕо саастарыгар төнүннүлэр. Уһуйаан үлэһиттэрэ “Ну, погоди!” бөрөтө уонна куобаҕа Саҥа дьыллааҕы ырыаларын олус бэһиэлэйдик үтүгүннүлэр. Кыра тэрилтэлэр “Кунг-Фу Панда” мультфилм геройдара буолан дьону соһуттулар. Орто оскуола “Летучий корабль” диэн сэбиэскэй кэмҥэ биллэ сылдьыбыт мультфильмы толору арыйан көрдөрдүлэр. Коррекционнай оскуолалар “Бременские музыканты” мультфильм ороспуонньуктарын, сүрүн дьоруойун, кыылларын-сүөллэрин олох күөх экраҥҥа көстөрүн курдук, омуннааттахха оннооҕор ордук көрдөрөн, көрөөччүлэргэ умнуллубат өйдөбүлү хааллардылар.
Дьүүллүүр сүбэҕэ Кыйыттан төрүттээх биир дойдулаахтарбыт, “Сарыал” култуура киинин үлэһиттэрэ Мотрена Сунхалырова уонна Анна Яковлева, бэрэссэдээтэлинэн “Төлөн” акционернай общество салайааччытын көмөлөһөөччүтэ, улуус депутата Петр Захаров үлэлээтилэр. Түмүк тахсар кэмигэр олохтоох талааннар Марина, Иван Говоровтар, Игнат Белин, Анатолий Варламов, Валентин Аржаков, практикатын бара сылдьар ХИФУ устудьуона Василий Полускин, “Алгыс” ВИА ыллам ырыаларынан көрөөччүлэри сэргэхситтилэр. Дьоро киэһэни Галина Полускина уолунаан Василийдыын олус сэргэхтик, сонуннук иилээн-салайан ыыттылар.
Түмүккэ, уһуйаан коллектива 3-с, кыра тэрилтэлэр 2-с, орто оскуола коллектива 3-с миэстэ буоллулар. Муҥутуур кыайыылаах аатын уонна “Көрөөччү биһирэбилэ” диэн куоластааһынынан быһаарыллыбыт анал ааты Коррекционнай интернат-оскуола коллектива ылла. Бу хамаанданы бэлиэтээн эттэххэ, аҥардас бу эрэ тэрээһиҥҥэ анаан икки нүөмэрдэригэр толору көстүүм тигэн, үҥкүү туруоран, атрибут бөҕө оҥостон, ымпыгар-чымпыгар тиийэ толкуйдаан, оруолларыгар олус барсар артыыстарын талан кытыннаран, дьүүлүүр сүбэ бэрэссэдээтэлэ Петр Егорович бэлиэтээбитинии “Ханан да уу тэстибэт гына бэлэмнэммит” хамаанда буолан, туох да мөккүөрэ суох кыайыахтарын кыайдылар. Бары кыттааччылар грамоталаранынан, анал бириистэринэн наҕараадаланнылар.
“Точь в точь” пародия-шоуга саала ыы-быччары көрөөччүнэн туолан, бииртэн биир чаҕылхай нүөмэр бу киэһэ кыттыылаахтарыгар да, көрөөччүлэригэр да умнуллубат өйдөбүлү хаалларда. “Талаан норуокка баар” диэн этиини өссө төгүл бигэргэттэ.
Галина ПОЛУСКИНА.