Бүгүн Тыараһа нэһилиэгэр бэлиэ күн буолла. Ол курдук тапталлаахтар күннэригэр сөп түбэһэ Раиса Еримеевна, Николай Алексеевич Слепцовтар ыал буолан олорбуттара 50 сылын, кыһыл көмүс сыбаайбаларын бэлиэтээтилэр. Бырааһынньыктыы киэргэммит кулуупка ытык ыал Мендельсон маршыгар доҕуһуоллатан сыанаҕа таҕыстылар. Кинилэри Таатта улууһун ЗАГС отделын салайааччыта Нария Васильевна Пестрякова эҕэрдэлээн туран, бочуот кинигэтигэр киллэрдэ, «Килбиэннээх дьиэ кэргэн” анал бэлиэни туттарда. Таатта улууһун дьахталларын сэбиэтин бэрэссэдээтэлэ Варвара Ильинична Будикина эйэҕэс эҕэрдэ тыл этэн баран дьиэ-кэргэн халандаарын бэлэх уунна. Тыараһа нэһилиэгин баһылыгын э.т. Семен Лукич Бетюнов, ветеран сэбиэтиттэн Нина Ивановна Турнина, олохтоох дьаһалта специалиһа Анна Петровна Бережнова истиҥ-иһирэх тылларын эттилэр, сыаналаах бэлэхтэрин туттардылар.
Николай Алексеевич, Раиса Еримеевна ыал буолан сирдээҕи аналларын толорон, 5 оҕону төрөтөн, барыларын үөрэхтээх, үлэһит дьон оҥорон, билигин элбэх сиэн, хос сиэн эйэҕэс эбээтэ, эһээтэ буолан нэһилиэктэригэр ытыктанар ыал.
Кинилэр бииргэ олорууга сүрүнэ бэйэ бэйэни өйдөһүү, көмөлөһүү эйэлээх буолуу диэн судургутук сэмэйдик эттилэр. Ытык ыалларга Слепцовтарга өссө да чэгиэн туруктаах уһуннук, дьоллоохтук олороллоругар, оҕолорун, сиэннэрин харыстыы араҥаччылыы сылдьалларыгар баҕарабыт!
Күн иккис аҥарыгар Былатыан Ойуунускай аатынан норуот айымньытын дьиэтигэр, ГТАС саалатыгар эдэркээн Альбина уонна Софрон Солдатовтар үөрүүлээх быһыыга майгыга ыал буоллулар. Кинилэри эҕэрдэлээтилэр Варвара Ильинична Будикина — Таатта улууһун дьахталларын сэбиэтин бэрэссэдээтэлэ уонна ыччат отделын специалиһа Анастасия Вячеславовна Габышева.
Эдэркээн ыал тапталларын уота куруук сылаас буоллун, үөрүү-көтүү аргыстаах дьоллоох, бигэ туруктаах дьиэ-кэргэн буоллунар!
Василена Власова