Ыам ыйын 15 күнүгэр, Аан дойдутааҕы дьиэ-кэргэн күнүгэр Тааттатааҕы киин библиотекаҕа үөрүүлээх тэрээһин буолла. Ол курдук Галина Семеновна, Иван Иванович Потаповтар ыал буолан олорбуттара 50 сылын бэлиэтиир, “Килбиэннээх дьиэ-кэргэн” үрдүк аатын ылбыт дьоро күннэригэр эҕэрдэ эгэлгэтин, үтүө тыл үгүһүн эттилэр.
«Ыраас тапталбытын сирдиир сулус оҥостон олох суолун устун сиэттиспитинэн бииргэ хаамсыахпыт, өрүү өйдөһөн, өйөһөн ыал буолан олоруохпут»… Галина Семеновна уонна Иван Иванович Потаповтар үйэ аҥаарын анараа өттүгэр эппит андаҕар тылларын күн бүгүҥҥэ дылы үрдүктүк тутан, дьоһун ыал дэтэн кэллилэр.
1975 сыллаахха кулун тутар 3 күнүгэр Чурапчы Хайахсытын уола Иван уонна Таатта Дьохсоҕонун кыыһа Галина ыал буолуу туоһу суругун туппуттара.
Ол кэмтэн ыла оруобуна 50 сыл эйэ-дэмнээхтик, эдэр саастарын истиҥ иэйиитин сүрэхтэрин сылааһынан угуттаан, харыстаан биир кыыс, икки уол оҕолонон, элбэх сиэннэнэн дьоҥҥо-сэргэҕэ ытыктанар ыал буолан олороллор.
Ыал аҕата Иван Иванович физкультура учуутала идэлээх, 1975-76 үөрэх сылыттан Дьохсоҕон 8 кылаастаах оскуолатыгар анатан үлэтин саҕалаабыта уонна 2015 сылга пенсияҕа тахсыар дылы учууталынан үлэлээбитэ. Быыһыгар саҥа “Сайдыы” совхоз тэриллэн, нэһилиэк сэбиэтин бэрэссэдээтэлинэн,1995-2000 с.с. Дьохсоҕон орто оскуолатын дириэктэринэн үлэлээбитэ. Эдэр эрдэҕиттэн спорду өрө тутан, нэһилиэгин, улууһун чиэһин хайыһарга, сүүрүүгэ мээчик оонньууларыгар элбэхтэ көмүскээбитэ.
И.И. Потапов “РФ норуот үөрэҕириитин туйгуна”, “Саха республикатын физическэй культура уонна спорт туйгуна”, “Дьохсоҕон нэһилиэгин бочуоттаах олохтооҕо” наҕараадалардаах.
Иван Иванович оһуохай таһаарар, “Дьохсоҕон олоҥхоһуттара” бөлөҕү кытта араас күрэстэргэ кыттан мэлдьи бастыҥнар ахсааннарыгар улууһун аатын ааттатар, Таатталыы оһуохайы Хабаровскай,Уфа куораттарга иһитиннэрбитин, көрдөрбүтүн дьоллооҕунан ааҕынар.
Ыал ийэтэ Галина Семеновна «Коммунизм» «Сайдыы» совхозтарга, “Победа” КП пенсияҕа тахсыар дылы бухгалтерынан үлэлээбитэ. 4 сыл түөлбэ салайааччытынан үлэлээбитэ. Билигин Саһарҕа» үҥкүүһүттэр бөлөхтөрүгэр, иистэнньэҥнэр түмсүүлэригэр сылдьар, нэһилиэккэ, улууска ыытыллар тэрээһиннэргэ кыттар.
Г.С. Потапова Роман Кулаковскай аатынан Дьохсоҕоннооҕу 537 №- дээх быыбардыыр учаастакка өр сылларга үтүө суобастаахтык үлэлиир.
“2006 с. Бүтүн Россиятааҕы тыа хаһаайыстыбатын биэрэпиһигэр активнай кыттыытын иһин”, “2010 с. Бүтүн Россиятааҕы нэһилиэнньэ биэрэпиһин ыытыыга кыттыытын иһин”, “ Таатта улууһун тыа хаһаайыстыбатын сайдыытыгар кылаатын иһин” бэлиэлэрдээх.
Бу курдук Иван Иванович уонна Галина Семеновна эдэрдии эрчимнэрин ыһыктыбакка дьон-сэргэ ортотугар, ыччакка холобур буолан үлэлии-хамсыы сылдьаллар.
Сарыал Кыыма