Ала Мылахсын Хотун саханы саха дэппит туора муостаах айыы сүөһүтүн көрөргө-истэргэ, үрүҥ илгэни үрүлүтэ сүүрдэргэ, араҕас илгэни алларыта турарга үөһэттэн анаан ыытар дьонноох буоллаҕына Миисэлээх Аанчыгы үтүө хараҕынан көрөн үөрэ мүчүҥнээн, күрдьэх, солуурчах туттаран салайан ыыттаҕа. Ахсынньы аам-даам, тохсунньу томороон тымныытыгар холуоһалаах хаатыҥканан хоочугураан, бөһүөлэк суолунан иккиэн сэнньилиһэн иһэр буолаллар. Сайынын сайылыкка сай бараан түүннэргэ титииккэ ынахтарын ыан сииктээх от устун үгүстүк хаампыт буолуохтаахтар. Бу курдук Анна уонна Михаил Никулиннар сопхуос саҕаттан күн бүгүҥҥэ диэри сырдыгы кытта хараҥаны ыпсаран, харыларын күүһүнэн үлэлээн-хамсаан кэллилэр.
Анна, Михаил Никулиннар
Анастасия Захарова
Семен Саввин
Михаил Уус Тааттаттан тардыылаах, Анна төрөөбүт үөскээбит Дьохсоҕонун сириттэн харыс да халбарыйбакка, ахсыс кылаас кэннэ ыанньыксыт буолбута. Сүрдээх сэмэй, аҕыйах саҥалаах, ыксаабат-ыгылыйбат, ордук хос хамсаммат, үөрүйэх илиилэринэн имигэстик туттан-хаптан үлэтин түргэн үлүгэрдик үмүрүтэн, үгүс сылларга ымпыгар-чымпыгар тиийэ чочуллубут хамсаныыларынан барытын орун оннугар бүтэрэ-оһоро охсор.
1971 сыллаахха Мария Михайловна, Трофим Федорович Габышевтар дьиэ кэргэттэригэр төрөөбүтүм.
Тыа хаһаайыстыбатыгар 1987 сыллаахтан үлэлиибин, 38 сыл буолла.
Серов ферматыгар Дария Петровна Миронованы кытта үлэбин саҕалаабытым. Үүт бөҕө ыан, үрдүк көрдөрүүлээх буоларбыт. Даайыстыын элбэх слеттарга, семинардарга сылдьыбыппыт. 1989 сыллаахха үчүгэй үлэбит иһин Москваҕа баран кэлбиппит. Михаил Михайлович Соров куратор буолан илдьэ сылдьыбыта. Победаттан Василий Охотин уонна Чычымах, Чымынаайы кыргыттара бааллара. Ону күн бүгүҥҥэ диэри күндүтүк саныыбын.
Кэргэмминээн манна үлэлии сылдьан билсэн ыал буолбуппут, үс кыыстаахпыт, сиэннэрдээхпит.
Сопхуостан саҕалаан араас уларыйыыны барытын көрсүбүппүт. Элбэх киһини кытта эн-мин дэсиһэн үлэлээбиппит. Мурун Күрүө, Адаам, Серов, Бараһыылап сайылыктарыгар олорбуппут. Мин саамай үлэлээбит сайылыгым Мурун Күрүө. Сайылыкка көһүү туспа кэрэ, бырааһынньык курдук буолааччы.
Сарсыарда 6 чаастан күнү быһа хотоҥҥо сылдьарбыт, быыһыгар дьиэбитигэр тиийэн оһохпутун оттон кэлэрбит. Былырыын хата киин ититиигэ холбономмут, дьиэҕэ ыксаабаппыт. Быйыл субан сүөһүнү көрөбүт. 2023 сыллаахха Тыа хаһаайыстыбатын туйгуна буолбутум.
Үөһэттэн айдарыллан, биэдэрэбин туппутунан ынахха ананан кэлбиппин быһыылаах. Сүөһүгэ оҕолоргор курдук сыһыаннаһан, көрөн-истэн таптаан сылдьыахха наада. Үлэбин сөбүлүүбүн, тохтоон хааллахпына хайдах буолуохпун билбэппин, — диэн Анна кэпсээнин түмүктүүр.
Аанчык аҕыйах тылынан этэн кэбиспитигэр урукку кэм туруу үлэһит дьонун санаата түмүллэр.
“Победа” КП уһун сылларга үтүө суобастаахтык үлэлээбит ытык мааны дьоммут; Дария Миронова, Харитина Мочкина, Вера Макарова, Мария, Василий Матвеевтар, Мария, Сергей Кычкиннар, Галина, Иван Габышевтар, Татьяна, Егор Саввиннар, Владимир Иванов, Мария Попова, Ньургустаана Дуракинова, Ирина Харайданова, Мария Макарова, Валентина Тистяхова, Евдокия Попова, Ксения Толстякова, Федор Гладкин, Мария, Егор Лопатыревтар, Акулина Макарова, Ирина, Иван Павловтар уонна да атыттар.
Билигин бу дьон бары бочуоттаах сынньалаҥҥа олороллор, сорохтор биһиги кэккэбититтэн туораабыттара. Кэлиҥҥи көлүөнэ сүөһү үлэтиттэн тэйэн, үлэһит илии тиийбэт. Онон “Победа” ХЭТ уларыйыы суолун тутар.
Сарыал Кыыма