Күрэс төрүт көрүҥнэригэр XXII “Манчаары оонньууларыгар” волонтердар — үтүө көмөһүт диэн сүрэхтэнэн чаҕылхайдык үлэлээтилэр.
Уопсайа 300-тэн тахса сайаапка киирбититтэн 200 үтүө көмөһүт талыллыбыта.
Кинилэр от ыйын 2 кунуттэн анал үөрэҕи ааспыттара: баһаартан, суолтан сэрэхтээх буолууга, маҥнайгы суһал көмөнү оҥорууга, уопсастыбаннай миэстэлэргэ сылдьыыга.
Маны сэргэ “Үтүө көмөһүт биир хамаанда буолан үлэлиэхтээх” диэн тренинг ааспыттара уонна уопсай быраабылалары кытта билсибиттэрэ, “Манчаары оонньуулара” ыытыллар эбийиэктэринэн квест ааспыттара, билиилэрин квиз оонньууга чиҥэппиттэрэ.
От ыйын 7 күнүгэр А.Е. Турнин аатынан спорт уораҕайын болуоссатыгар күнүс 12 чааска үтүө көмөһүттэр корпустарын үөрүүлээх арыллыыта буолбута. Манна Саха Өрөспүүбүлүкэтин Бырабыыталыстыбатын бэрэссэдээтэлин солбуйааччыта, “Манчаары оонньууларын” тэрийэр кэмитиэт салайааччыта С.В.Местников, Саха Өрөспүүбүлүкэтин физическэй култуура уонна спорт миниистирэ Л.Н.Спиридонов, Таатта улууһун баһылыга А.С.Бурцев кытыыны ылбыттара, үтүө көмөһүттэр “Манчаары оонньууларыгар” төһүү күүс буолалларын эппиттэрэ.
От ыйын 7-12 күннэригэр ардаҕы ардах диэбэккэ сарсыардаттан киэһээҥҥэ диэри 200 үтүө көмөһүт 6 сүрүн хайысханан үлэлээбиттэрэ: спорт эбийиэктэригэр, аккредитацияҕа, тырааныспарга, пресс-кииҥҥэ, медиктэргэ, наҕараадалыыр хамыыһыйаҕа. Кинилэри таһынан 25 үтүө көмөһүт хомуйууга, эбийиэктэргэ ырааһы хааччыйыыга түбүгүрбүттэрэ.
Үтүө көмөһүттэргэ анал форма ыларга анаан “Алроса” акционернай хампаанньа 2 мөл. суумманы көмөлөспүтэ, тигиитин брендбук логотиптарын туһанан «Iron” хампаанньаҕа сакаастаабыппыт.
Оҕолор бу хамсааһынтан астынан, элбэххэ үөрэнэн, үгүс доҕоттордонон тарҕастылар. Төрөппүттэр тэрийээччилэргэ махтал тылларын тиэрдэллэр, Туора-Күөлтэн Максимова Дарина ийэтэ, убайдара:
“Биһиги оҕобут Туора-Күөлтэн волонтерскай хамсааһыҥҥа кыттыыны ылла. Эрдэ суруйтаран, онтун олус долгуйа күүтэн, билигин бүтэ оҕуста диэн хомойор, оҕолорун, халыҥ хамаандатын ахтар да ахтар.
Махтал тэрийээччилэргэ, волонтердары иилээн илдьэ сылдьыбыт салайааччыларга, халыҥ хамаандаҕа!
Эдэр көлүөнэни патриот дьон буола үүнэн тахсалларыгар иитэн таһаарыыга биир олус наадалаах хамсааһын — волонтерство буолар. Ону кыайа тутан, сөптөөхтүк дьаһайан, кэлбит эрэ ыалдьыт бары үтүө көмөһүттэр үлэлэрин сэргии, хайгыы көрдүлэр, иһиттилэр, эттилэр.
Биһиги төрөппүттэр оҕолорбут этэҥҥэ сылдьыбыттарыттан, сылаас аһынан хааччыллыыттан, олус кэрэ таҥастарыттан, аны закрытиеҕа “Манчаары оонньуулара” символлардаах бэлэхтэри, улуус баһылыгын аатыттан махтал суругу туттарбыккытыттан наһаа үөрдүбүт. Таҥастара-саптара уратыта, тута харахха быраҕыллара олох астык.
Үтүө дьоммутугар кэрэни, үлэҕэ ситиһиини, дьоллоох, доруобай эрэ сылдьаргытыгар баҕарабыт!”
Уус Тааттаттан Валерия Чирикова:
“Бу XXII “Манчаары оонньууларыгар” волонтердар наадалар диэни истэн биһиги Уус Таттаттан Чириковтар дьиэ кэргэн улахан уолбут Ярик кыттыан баҕарар санаатын истэн, сүбэлэһэн госуслуги нөҥүө заявка хаалларбыппыт.
От ыйын 2-с кунуттэн Ытык Күөлгэ Таатта улууһун ыччат уонна дьиэ-кэргэн политикатын салаатын эдэр специалиһа Варвара Петровна Рахлеева элбэх идеялаах, оҕолору кытта биир тэҥник үөрэн-көтөн үлэлэспитэ, оҕолор анал үөрэх ааспыттара, үтүө көмөһүттэр корпустара арыллыбыта. Саҥа формаларын тутаннар, араас оонньуулары оонньоон, элбэх оҕолору кытта билсиһэн, араас тэрээһиннэргэ кыттыбыта.
Оҕобут Ярик эрдэ севернай многоборьенан дьарыктаммыт буолан, хайҕанан, ол хайысхаҕа судьуйаларга көмөһүтүнэн сырытта.
Уолбут астынан аҕай кэлбитэ “бэйэтэ лааҕыр курдук эбит”, диэн үөрбүтэ.
Үтүө көмөлөрүн иһин Таатта улууһун баһылыга Айаал Семенович Бурцев Махтал суругунан уонна сэмэй бэлэхтэри туттарбыттара. Оҕобут бу улахан тэрээһиҥҥэ кыттан тус кылаатын киллэрсибититтэн киэн туттабыт уонна олоҕор өссө биир үтүө түгэн, астык санаалар буолан хааллылар дии саныыбыт.
Үтүө көмөһүттэр баар буоланнар Манчаары оонньуута үрдүк таһымна ааста диэтэхпинэ сыыспат буолуохтаахпын”.
Варвара Рахлеева хаартыскалара