Бүгүн Дьохсоҕон нэһилиэгэр үгэс буолбут бэлиэ күн. Ол курдук бөдөҥ общественнай диэйэтэл, Саха АССР Ситэриилээх Киин Кэмитиэтин уонна совнарком бэрэссэдээтэлэ, Саха АССР коммунальнай хаһаайыстыбатын бастакы наркома, Саха АССР киин электрическай станциятын бастакы дириэктэрэ, сахалартан бастакы үрдүк үөрэхтээх инженер-теплоэнергетик, Дьохсоҕон сиригэр-уотугар төрөөбүт Ананий Кононович Андреев сырдык аатыгар сүгүрүйүү күнэ кини олорбут өтөҕөр баар скверга буолла.
Манна Саха Өрөспүүбүлүкэтин “Олох-дьаһах коммунальнай хаһаайыстыбата” Государственнай Унитарнай Тэрилтэ генеральнай дириэктэрэ В.С. Чикачев, сүрүн инженера В.В. Бондарь, идэлээх сойуус тэрилтэтин бэрэссэдээтэлэ А.И. Михайлов, “Ил Түмэн” СӨ судаарыстыбаннай мунньаҕын тутууга, ОДьКХ уонна энергетикаҕа бастайааннай кэмитиэтин бэрэссэдээтэлэ А.И. Корякин, СӨ ОДьКХ ГУП 27 филиалларын дириэктэрдэрэ ыҥырыылаах ыалдьыт буоллулар. Кинилэри сэргэ Таатта улууһун баһылыгын солбуйааччы Р.И. Захаров, Тааттатааҕы филиал дириэктэрэ В.П. Будикин, ОДьКХ түмэлин салайааччыта Г.Е. Арылахова, Дьохсоҕон олохтоохторо, оскуола оҕолоро скверга тоҕуоруһа муһуннулар. Бэлиэ тэрээһин А.К. Андреев өйдөбүнньүгэр сибэкки дьөрбөтүн уонна бэс гирлянда ууруутуттан саҕаланна. Ол кэннэ Дьохсоҕон нэһилиэгин тумус туттар киһитэ, алгысчыт Афанасий Попов бу бэлиэ күнүнэн уонна кыстыгы этэҥҥэ туоруур туһугар аал уот иччитигэр сүгүрүйдэ, алгыс көтөхтө.
Алгыс тыл кэнниттэн эҕэрдэлэр, бастыҥ үлэһиттэри наҕараадалааһын буолла. Онтон 2011 сылтан олохтоммут А.К. Андреев аатынан стипендияны туттарар долгутуулаах түгэн үүннэ. Бу стипендия 2011 сыллаахха Ананий Кононович сиэнэ М.Н. Васильева, ОДьКХ ГУП бочуоттаах үлэһитэ А.А. Ноговицын, ОДьКХ ГУП идэлээх сойуус тэрилтэтин бэрэссэдээтэлэ С.Е. Анисимов, ОДьКХ түмэлин салайааччыта Г.Е. Арылахова көҕүлээһиннэринэн олохтоммута. Стипендия Дьохсоҕон ыччатыгар, үрдүк эбэтэр орто анал техническэй үөрэххэ үөрэнэр устудьуон оҕоҕо ананар. 2025 сылга бу стипендияны М.К. Аммосов аатынан ХИФУ геологоразведочнай факультет прикладная геология салаатын иккис куурсугар ситиһиилээхтик үөрэнэ сылдьар Константин Бабановка ананна. Костя 6 оҕолоох Анна уонна Иван Бабановтар дьиэ-кэргэттэригэр иккис стипендиат буолла. 2016 сыллаахха иккис уоллара Иван Бабанов Андреев стипендиятын ылбыта, билигин үөрэҕин бүтэрэн Дьокуускайга олорор, үлэлиир. Онон төрөппүттэр үөрүүлэрэ улахан.
Дьохсоҕон нэһилиэгэр СӨ ОДЬКХ ГУП көмөтүнэн кэккэ сылларга үгүс үлэ барда. Ол курдук 2013 сыллаахха квартальнай хочуолунай үлэҕэ киирбитэ, магистраль тардыллан чааһынай ыаллар киин ититиигэ холбоммуттара. А.К. Андреев аатынан “Сырал Тулааһына” олохтоохтор түмсэр балаҕаннара тутуллан үлэҕэ киирбитэ. Ананий Кононович аатынан уулуссаҕа уот лаампалара ыйаммыттара. Таатта үрэҕи туоруур тимир муоста тутуллубута. Андреевтар сайылыктарыгар уонна кыстыктарыгар сквердэр тутуллубуттара. Былырыын 2024 сыллаахха толору механизациялаах хочуолунай үлэҕэ киирбитэ, чааһынай ыаллары холбооһун үлэтэ салҕанар. Онон бөһүөлэк улахан аҥаара оһох оттор кыһалҕаттан босхолонон үөрүүлэрэ үрдүк. Таатта, Набережнай, Заречнай уулуссалар хаалан тураллар. Дойду үрдүнэн бүрүүкээбит ыарахан балаһыанньа тубустаҕына бу уулуссаларга диэри магистраль тардыллан киин ититиигэ холбонору олохтоохтор эрэнэ күүтэбит.
Эһиил Ананий Кононович Андреев төрөөбүтэ 125 сыла буолар. Ол курдук Саха Өрөспүүбүлүкэтин бырабыыталыстыбата кыттыылаах киэҥ далааһыннаах үбүлүөйүнэй тэрээһиннэр буолаллара былааннанар. Дьокуускай куоракка А.К. Андреевка анаан өйдөбүнньүк бэлиэ туруохтаах, документальнай киинэ уһуллуохтаах, кинигэ тахсыахтаах. Ону таһынан улуу биир дойдулаахпыт көмүс уҥуоҕа хараллан сытар Үөһээ Дьааҥы улууһугар сквер тутуллуохтаах.
ОДЬКХ үлэһиттэрэ сыл аайы Таатта сиригэр кэлэр үтүө үгэстэрэ салҕана, улуу киһибит сырдык аата ааттана, дьон олоҕо тупсарын туһугар үгүс өрүттээх үлэ бара турарыгар!
Сарыал Кыыма