Атырдьах ыйын 21 күнүгэр «Түһүлгэ» кафеҕа, оройуоҥҥа Быткомбинат тэриллибитэ 60 сылынан, бу тэрилтэҕэ араас кэмнэргэ үлэлээбит 40 киһи түмсэн, үлэлээбит сылларбытын ахтан-санаан аастыбыт. Быткомбинаты 20 сыл сатабыллаахтык салайбыт директорбыт оҕолоро, сиэнэ аҕаларын, эһэтин Живкурс Николаевич Осипов олорон ааспыт олоҕун, үлэтин-хамнаһын киэҥник сырдатан, ахтыы хомуйан бэртээхэй кинигэни бэчээттэтэн, үйэтиппиттэр. Суруллубут суоруллубат диэнинэн “Дьол суолугар тиийбитим” диэн Кинигэ-пааматынньыгы туруорбуттара хайҕаллаах.
Көрсүһүү маҥнайгы чааһа кинигэ сүрэхтэниитигэр ананна. Киин библиотека үлэһитэ С.С.Игнатьева кинигэни толору арыйан дьон болҕомтотун тарта, махталын ылла. Живкурс Николаевич иитэн такайбыт сиэнэ Сергей Владиславович эһэтин туһунан истиҥ-иһирэх ахтыыта, махтала барыбытын долгутта. Киин библиотекаҕа, кинигэ тахсарыгар ахтыы суруйан көмөлөспүт дьоҥҥо махтанан туран эһэтин кинигэтин бэлэх уунна.
Кинигэ аныгы ирдэбилгэ эппиэттиир гына “Дани-Алмас” компания” ХЭТ 100 ахсаанынан бэчээттэммит. Халыҥ тастаах, хаачыстыбалаах кумааҕыга, дизайнерскай өртө олус табыллан оҥоһуллубут, тыла-өһө бэрээдэктэммит, куйаар куодунан сэдэх хаартыскалары, видео устуулары сыһыары тутан көрөр гына оҥоһуллубута кэрэхсэбиллээх. Бу дьыл ахсынньы 3 күнүгэр, Живкурс Николаевич төрөөбүт күнүгэр анаан Дьокуускай куоракка кинигэ сүрэхтэниитэ буоларын сиэнэ иһитиннэрдэ. Эһэтин олоҕун туһунан документальнай киинэ устан бар дьонугар көрдөрөр бүччүм санаатын билиһиннэрдэ. Биллэр артыыстар кэлэн тэрээһини киэргэтиэхтэрэ диэтэ уонна барыбытын ыҥырда. Сиэн уол хайдах курдук эһэтин, эбэтин ытыктыырын, кинилэргэ сүгүрүйэн үйэтитэ сылдьарыттан, эһэтин уөрэҕин, эппит тылларын өйдүү-саныы сылдьара сөхтөрдө, хас биирдиибит кини курдук сиэннэниэн баҕарда.
Тэрээһин иккис чааһа 60 сылга ананна. Быткомбинакка өр сылларга үтүө суобастаахтык үлэлээбит, биһиги ытык дьоммут, 90 сааһын туолаары сылдьар, атах таҥаһын маастара Л.Т.Захарова, Туора Түөлгэ КПП приемщигынан үлэлээбит В.И.Аянитова кэлэн алгыс тыл этэн, тэҥҥэ үҥкүүлэһэн, муода көрдөрөн барыбытыгар үтүө холобур буолалларын өссө төгүл бигэргэттилэр. Билигин да үлэттэн илиилэрин араара илик үлэһит дьоммутугар, олоххо көхтөөх доҕотторбутугар анал ааттары, Бочуотунай грамоталары, махтал суруктары өр сыл профсоюз бэрэссэдээтэлинэн үлэлээбит, билигин куоракка олорор С.Н.Филатова туттарда, өссө да ситиһиини, доруобуйаны баҕарда. Билиҥҥи балаһыанньа геройдара, анал байыаннай дьайыыга Аҕа дойдуларын көмүскүү сылдьар хорсун буойуттарбытын сылаас таҥаһынан хааччыйар Далбар хотуттарбытыгар анал ааттары, нэһилиэк дьаһалтатын махтал суругун, ДРСУ начаалынньыга И.И.Бочонин аатыттан махтанан туран, кини спонсордаабыт харчынан бириэмийэтин үөрүүлээх быһыыга-майгыга туттарда. Талан ылбыт идэлэрин күн бүгүнүгэр диэри туһанан, үтүө санаалаах элбэх ийэни түмэн иистэнэ, түбүгүрэ сылдьар күндү дьоммутунан киэн туттабыт уонна кинилэр ааттарын ааттыыбыт: Дедюкина Галина Афанасьевна, Оросина Анастасия Николаевна, Собакина Валентина Николаевна, Ючюгяева Анна Петровна, Саввина Саргылана Николаевна.
Живкурс Николаевич өр сыллаах үлэтин түмүгэ, биир өйгө-санааҕа тириэрдибит коллектива, баай уопутуттан бэрсэн үөрэппит-такайбыт каадырдара билигин да эдэрдии эрчимнэрин ыһыктыбакка коллективы түмэ, үөрдэ-көтүтэ сылдьаллара хайҕаллаах. Түмсүүгэ Живкурс Николаевич аата дорҕоонноохтук ааттанна, үлэтэ-хамнаһа махталынан ахтылынна. Түмсүүлээх коллектив көрү-нары көгүлүттэн тутта, сэһэн-сэппэн ыраатта. “Ситцевый бал”, “Оригинальная шляпа” диэн конурустарга элбэх киһи кыттан бириис тутан үөрдэ. Үлэ бэтэрээнэ С.М.Федоров “Человек магнит” диэн ураты дьарыгын көрдөрөн сөхтөрдө. Сааһырдыбыт диэбэккэ көмө хаһаайыстыбанан дьарыктанар, ыллыы-туойа, үҥкүүлүү, хаалыктаах хаамыынан, коллекциянан дьарыктанар дьоммут элбэҕэ үөртэ. Баянист, мелодист, Харбалаахтааҕы филиалга фотографтаабыт В.В.Туманов ардаҕы быыһынан кэлэн байааннаан, ыллаан, тыл этэн барбыта сэргэхситтэ. Бэтэрээммит Вера Ивановна уран тарбаҕынан өрбүт бирииһэ Живкурс Николаевич сиэнигэр түбэһэн, кыыһыгар Анжелика Живкурсовнаҕа ананна. Ытык кырдьаҕаспыт Любовь Титовна тэрээһин бүтүөр диэри тэҥҥэ үөрдэ-көттө. Бириис элбэх буолан кыттыбыт дьон бары илии тутуурдаах бардылар, махтал-баһыыба эттилэр.
Бу үбүлүөйдээх тэрээһиммитин урукку комиссия састаабын туһанан бэрт тэрээһиннээхтик салайан ыыппыт С.Н.Филатоваҕа, чилиэннэригэр Е.И.Толстяковаҕа, Р.С.Аржаковаҕа, С.М.Федоровка, Г.А.Дедюкинаҕа, А.П.Ючюгяеваҕа, Л.С.Кутугутоваҕа уонна «Сарыал» сынньалаҥ киинин үлэһитэ, эдэркээн кыыс Сергеева Лия кэлэн тэрээһини бэркэ иилээн-саҕалаан ыыппытыгар барҕа махталбытын этэбит.
Л.С.Кутугутова аҕа саастаах эдьиийдэригэр эрэллээх көмөлөһөөччүлэрэ, тэрээһин сүүрэр-көтөр, суруйар-бичийэр өртүн кыайа-хото тутан, солбуйааччы буоларын өссө төгүл бигэргэттэ. Бу урукку өртүгэр нэһилиэнньэҕэ бар дьон олоҕун уйгута тупсарын туһугар бэрт үгүс өҥөнү оҥорбут тэрилтэ үбүлүөйдээх тэрээһиннэрэ үлэлээн ааспыт дьон өйүгэр-санаатыгар, сүрэҕэр-быарыгар умнуллуо суоҕа.
Бу тэрилтэни 20 сыл салайан, бэртээхэй коллективы түмэн, биир өйгө-санааҕа киллэрэн, дьон ытыктабылын ылбыт, Бочуот Бэлиэтэ уордьан кавалера, Таатта улууһун, Тааттыныскай нэһилиэк бочуоттаах олохтооҕо, ССРС кинематографиятын, РСФСР норуотун үөрэҕириитин туйгуна, тыыл, советскай-партийнай үлэ ветерана Осипов Живкурс Николаевич 83 үлэһиттэрин кытары тиһэх көрсүһүүтэ 2019 сыллаахха буолбута. Кини эппит кэс тылларынан түмүктүүбүн: “Бука бары дьоллоох, Доруобай буолуҥ. Үлэлээҥ-хамсааҥ, Үүнүҥ-сайдыҥ, Кыайыҥ-хотуҥ!”.
Елена Кузьмина, үлэлээн ааспыт Ателье-2 сэбиэдиссэйэ.