Алтынньы 11 күнүгэр Амма нэһилиэгин дьаһалтатын баһылыга Степан Старостин дуоһунаһыгар киириитин үөрүүлээх тэрээһинэ Өксөкүлээх Өлөксөй аатынан норуот айымньытын дьиэтигэр буолла. Ытык Амма сиригэр саҥа баһылык үлэҕэ киирэн үлэ-хамнас этэҥҥэ салалларын түстээн Өймөкөөҥҥө ыытыллыбыт өрөспүүбүлүкэтээҕи «Олоҥхо Ыһыаҕын” Кылаан кыайыылааҕа, олоҥхоһут Алексей Николаев алгыс тылынан, Аал уоту аһатыытынан саҕаланна.
Степан Петровичка Амма нэһилиэгин баһылыгын түөскэ кэтэр бэлиэни уонна дастабырыанньатын быыбар хамыыһыйатын бэрэссэдээтэлэ Аграфена Малышева дохсун ытыс тыаһыгар туттарда.
Саҥа баһылык Степан Петрович:
– Амма нэһилиэгин баһылыгын дуоһунаһыгар киирэр өрөгөйдөөх күммэр эһиги өйөбүлгүтүн ылан кэлэр биэс сылга нэһилиэкпит, түөлбэбит бигэ тирэхтээх, дьоно-сэргэтэ туруктаах буолалларын туһугар бары күүспүн-санаабын биэрэн туран үлэлиэм. Төрөөбүт-үөскээбит нэһилиэгим – улууһум киинэ, олохтоох бэйэни салайыныы бэлиитикэтигэр тирэҕирэн сайдарын-үүнэрин туһугар, дьоно-сэргэтэ үлэлээх, кырдьаҕастара көмүскэллээх буоларын туһугар РФ, СӨ Конституцияларынан, Амма нэһилиэгин Устаабынан салайтаран бар дьонум интэриэстэрин көмүскүөм, Амма нэһилиэгин баһылыгын эбээһинэстэрин үтүө суобастаахтык толоруом диэн андаҕайабын, – диэн мэктиэ тылын эттэ.
Салгыы улуус баһылыгын бастакы солбуйааччыта Руслан Захаров эҕэрдэ тыл эттэ: «Степан Петрович түөлбэн дьоно-сэргэтэ эйиигин өйдөөн, өйөөн бу быыбарга баһылыгынан талбыттара. Онон, инники үлэҕэр дьон итэҕэлин толорон, быргыраамалары, өйөбүллэри сөптөөхтүк туһанан үлэлээ-хамсаа. Биһиги улуус дьаһалтата сүбэ-соргу уонна тэҥҥэ үлэлэһэн өйүөхпүт диэн эрэннэрэбин», – диэн туран, улуус дьаһалтатын аатыттан Степан Петровичка «бу чорооҥҥо үрүҥ илгэ үрүлүйэ сүүрэрин курдук, үлэҥ-хамнаһын таһаарыылаах буоллун» диэн алҕаан туран бэлэх уунна.
Степан Петровиһы улуус үөрэҕин салаатыттан салайааччы Иннокентий Дягилев, оскуола дириэктэрдэрэ, улууспут нэһилиэктэрин баһылыктара, Амма нэһилиэгин дьокутааттара, түөлбэ аҕам саастаахтара эҕэрдэлээтилэр, эппиэтинэстээх, уустук үлэтигэр үтүө холобурдары көрдөрөн, баар кыһалҕалары быһаарыыга биир сүбэнэн үлэлииргэ эттилэр, эдэр кэскиллээх салайааччыга баҕа санаа бастыҥын анаатылар.
Елена Слепцова.