Арассыыйаҕа Дьиэ кэргэн, Саха сиригэр Оҕо саас, улууска Таптал.Эрэл.Итэҕэл сылларынан Таатта улууһун Тыараһа нэһилиэгин олохтооҕо Дьоруой ийэ, “Ийэ Албан аат 1 истиэпэннээх” Кристина Анатольевна Игнатьеваҕа дьиэ тутталларыгар, эбэтэр атыылаһалларыгар 10 мөллүйүөн 532 тыһыынчалаах сэртипикээт туттарылынна.
Уон оҕолоох Игнатьевтар 2004 сыллаахха ыал буолбуттара. Аҕалара Михаил Иванович пиэрмэр, Кристина оҕо көрөн олорорун таһынан, уопсастыбаннай үлэҕэ эмиэ көхтөөх. Кыралаан иистэнэр, оҕуруонан тиһэр, баайар, хас биирдии оҕолорун таҥаһын бэйэтэ тигэр, арааһынайдаан аттарар. Уон оҕоттон 7 кыыс, 3 уол, икки кыыс номнуо устудьуоннар.
Үөрүүлээх түгэҥҥэ «Таатта улууһа» МО баһылыга Айаал Бурцев уон оҕолоох Дьоруой ийэни Кристина Игнатьевнаны эҕэрдэлээн туран, судаарыстыбаннай бырагыраама чэрчитинэн субсидияҕа тиксибит сэртипикээти туттарда. Тааттатааҕы «Эрэл» сокуоннай саастарын ситэ илик оҕолору чөлүгэр түһэрэр киин дириэктэрэ Елена Дедюкина Дьоруой ийэни эҕэрдэлээтэ, үөрүүтүн үллэһиннэ.
Уон оҕолоох Игнатьевтар дьоллоох дьиэ кэргэн уйата кэҥээтин, Этэҥҥэ олоруҥ, үүнүҥ, сайдыҥ, үөрэхтээх дьоһун дьону улаатыннарын.
Елена Слепцова