Соторутааҕыта оройуон киинигэр Ытык Күөлгэ «Алгыс» балаҕаныгар доруобуйаларынан хааччахтаах дьон ортотугар улууска сахалыы остуол оонньуутугар хабылыкка, хаамыскаҕа өрөспүүбүлүкэ чөмпүйүөнээтигэр барыыга сүүмэрдиир күрэх буолан ааста.
Манна уопсайа 7 нэһилиэктэн (Тааттыныскай, Боробул, Октябрьскай, Дьүлэй, Игидэй, Баайаҕа, Уус Амма) мустан спортсменнар көхтөөх оонньууну көрдөрдүлэр. Күрэҕи иилээн-саҕалаан ыытта адаптивнай успуорт тренерэ Власов Николай Николаевич. Түмүккэ мөлтөхтүк истэр дьахталларга: 1 миэстэ — Кулаковская Валентина (Чөркөөх), 2 м — Павлова Мария (Туора Күөл), 3 м — Габышева Дария (Дэбдиргэ). Мөлтөхтүк истэр эр дьон ортотугар: 1 м — Попов Валентин (Боробул), 2 м- Вырдылин Ананий (Чөркөөх).
ПОДА (с поражением опорно-двигательного аппарата) эр дьоҥҥо Иван Тистяхов (Чымынаайы) 1 миэстэ, дьахталларга Читаева Клара (Ытык Күөл) 1 миэстэ, Находкина Раиса (Ытык Күөл) 2 миэстэ, Постникова Рита (Туора Күөл) 3 миэстэ буолары ситистилэр.
Сахалыы төрүт остуол оонньуулара бары өттүнэн дьарыктанарга, күрэхтэһэргэ судургута уонна өй, илии сымсатын сайыннарарга көдьүүһэ улахан оруолу ылар. Бэйэбит испитин ылан көрөр буоллахха, бу көрүҥ кэлиҥҥи кэмҥэ киэҥ сэҥээриини ылбыта балайда өр кэм буолла. Ол түмүгэ сыллата республика таһымнаах күрэхтэргэ куруутун миэстэлэһэр гына ситиһиилээхтик кыттан, бастыҥнар истэригэр сылдьабыт.
Светлана Дорофеева, Таатта улууһун мөлтөхтүк истэллэр обществоларын бэрэссэдээтэлэ.