Тохсунньу 8 күнүгэр Таатта улууһун Игидэй нэһилиэгэр, Владимир Андросов аатын сүгэр КСК-ҕа саҥа сылы арыйар сэргэх күрэхтэһии буолан ааста. Ол курдук РСФСР үөрэҕириитин туйгуна, үлэ, тыыл бэтэрээнэ, Игидэй, Уус Амма нэһилиэктэригэр салайар үлэҕэ үлэлээбит Афанасий Константинович Иванов төрөөбүтэ 90 сылыгар анаммыт түөлбэлэр икки ардыларыгар волейболга хаһыылаах-ыһыылаах , тыҥааһыннаах, сэргэх күрэхтэһии ыытылынна.
Күрэхтэһии сыала-соруга — нэһилиэнньэ ортотугар маассабай спорду, чөл олоҕу пропагандалааһын. Күрэхтэһиигэ нэһилиэк 6 түөлбэтэ барыта кыттыыны ылла. Хамаанда 6 киһиттэн (3 дьахтар, 3 эр киһи) турда, оскуола оҕотуттан саҕалаан, бэтэрээн кыттааччыларга тиийэ күрэхтэстилэр.
Күрэхтэһиини Дэбдиргэ солбуллубат комментатора Сергей Петрович Ермолаев иилээн-саҕалаан ыытта. Сүрүн судьуйанан үлэлээтэ: Габышев Захар Васильевич — Владимир Андросов аатынан КСК директора. Маны таһынан тустаах көмөлөһөөччү судьуйалар түөлбэлэртэн таҥыллан үлэлээтилэр.
Күрэхтэһии наҕараадалааһынтан уонна Афанасий Константинович Иванову сырдатыыттан саҕаланна. Ол курдук, бу строкалар автордара В.К.Ефимова Игидэй нэһилиэгин сонуннарын өр сылларга хаһыаттарга сырдаппытым иһин, «Игидэй нэһилиэгин сайдыытыгар кылаатын иһин» диэн анал бэлиэни баһылыктан, Марков Егор Алексеевичтан, тутан соһуйдум да, үөрдүм да.
Нэһилиэк бэтэрээн спортсмена, салайааччы Иван Гаврильевич Гермогенов-Афанасий Константинович Иванов туһунан истиҥ-иһирэх ахтыыны спортсменнарга, күрэхтэһиини сэҥээрэн көрөөччүлэргэ анаан оҥорбута кэрэхсэннэ.
Күрэхтэһиигэ түөлбэлэрин чиэһин көмүскүү улуустан, куораттан элбэх кыттааччы кэлбитин, олор истэригэр нэһилиэк баһылыга, Егор Алексеевич Марков, улуус мунньаҕын депутата Иван Ильич Бурмистров бэйэлэринэн күрэхтэһэн, нэһилиэккэ ыччат ортотугар чөл олоҕу, спорду пропагандалыы сылдьаллара хайҕаллаах түгэн буоларын бэлиэтиир тоҕоостоох.
Тыҥааһыннаах күрэхтэһии түмүгэ маннык таҕыста:
1 миэстэни эрэллээхтик улуус мунньаҕын депутата Иван Ильич Бурмистров салайар «Чабычах» түөлбэтин хамаандата ылла. Бу хамаандаҕа оскуола улуустааҕы хомуур хамаандатын чилиэнэ, 9 кылаас үөрэнээччитэ Иванов Валерий кыраһыабай оонньуулары көрдөрдө.
2 миэстэҕэ «Моччоҕо» түөлбэ таҕыста. 3 миэстэни «Озёрнай» түөлбэ ылары ситистилэр. «Аартык», «Мээндийэ», «Сардаҥа» түөлбэлэр эрбии тииһин курдук эрийистилэр. Саҥа дьыллааҕы уһун өрөбүллэр буолан, дойдуларыгар сынньана кэлбит биир дойдулаахтарбыт, студент оҕолорбут кэлэн түөлбэлэрин чиэһин көмүскээтилэр, хас биирдии киһи дууһатыгар патриотическай өйү-санааны, дойдуга бэриниилээх буолууну сахтылар.
Бу курдук биир дойдулаахпыт, бөдөҥ салайааччыбыт, учууталбыт А.К. Иванов аатын үйэтитиигэ анаммыт волейбол күрэхтэһиитэ ыраахтан-чугастан элбэх киһини түмтэ. Аны тохсунньу 24 күнүгэр (А.К. Иванов төрөөбүт күнүгэр) оҕолоро, сыдьааннара кэлэннэр, элбэх көрүҥнээх тэрээһин ыытыллара былааннанар. Бүгүҥҥү волейболбут күрэҕин түмүгэ ол тэрээһиҥҥэ бэлиэтэниэҕэ.
Варвара Ефимова.
Дэбдиргэ.