Саҥа Дьылы көрсө НВК-ҕа араас интэриэһинэй биэриини көрдөрөллөр. Бэҕэһээ Дьокуускайга буолбут балеттар түмсүүлээх Гала кэнсиэрдэрин көрдөрдүлэр. Саха киһитэ үксэ балеты сэҥээрбэт. Мин да оннук этим. Ол эрээри арай Сверидов хампаһыытар «Метель» диэн музыкальнай айымньытыгар турбут балетнай испэктээкили көрөн «мах» бэрдэрдим. Тыал улуйар, хаар бурҕаҥныыр уол кыыһын тохтото, атаҕыттан кытта тардыһа сатыыр да, кыыһа быыс хайаҕас булан халты харбатар, салгыны куустарар. Бирээмэ уолу аһынан көрөөччү хараҕыттан уу тахсар. Инньэ гынан кыыспыт охто сытар киһини үрдүттэн үктээн бара турда. Ити кэпсээн барыта эт хаан айманыытынан, илии атах оонньуутунан, сирэй харах туттунуутунан, чэпчэкитик, салгыҥҥа уруһуйдааһын курдук бэриллэрэ көрөргө үчүгэйин баҕаһын. Күүстээх группа Москваттан, Санк Питербургтан, Новосибирскэйтэн, Астанаттан, Башкорстантан уо .д.а кэлбиттэр. Биһиги сахалар чиэстэрин Сарыал Афанасьев , биир нуучча кыыһа балериналыын көрдөрдүлэр. Эр дьон партиятын Москубаттан, Белорусияттан кэлбит балеттар, 2 миэтэрэлээх уолаттар күүскэ көрдөрдүлэр. Партнершаларын аҥар илиилэринэн өрө анньаллар, атырдьаҕы бырахпыт курдук өрө ыстанан , чиккэс гына сценаҕа түһэлл эр. Көрөргө үчүгэйдэр күүстээхтэр, кыраһыабайдар, били соҕурууттан атыылаһыллан кэлбит сүүрүк сылгы курдук барахсаттар. Арай туттунуулара хаптаныылара сымнаҕаһа суох, дьороҕой, партнершаларыгар сымнаҕас мичээри, киниттэн астына сылдьалларын сатаан көрдөрбөттөр эбит. Бэйэлэрин эрэ көрдөрө сатыыллар. Онтон Сарыал олус да истиҥник, балеринатыгар сыһыаннаһарын, болҕомтолооҕун, үөрэрэ көтөрө үчүгэйин, ыстанара сымнаҕаһын, эрэллээҕин бэлиэтии көрдүм. Кинини кытта хайа баҕарар балерина үөрэ астына үҥкүүлүөн сөп эбит. Инньэ гынан пааралар сылаас сыһыаннара көрөөччүгэ бэриллэр эбит. Саха Балетнай ускуустубата сайдан ырааппытын, хайа да улахан куораттартан хаалсыбатын, өссө ордугун дьэ кэлэн итэҕэйдим, Сарыалы көрөн биһирээн.💐🌿
F.