Таатта боксаҕа федерацията 2000 эрэ cыллаахха тэриллибитэ. Ол иннинэ биирдиилээн тренердэр уора-көстө эрэ эрчийбиттэрэ.
Биричиинэтэ 1952 сыллаахха коммунистическай партия обкомун уурааҕынан Таатта оҕолоро үрдүк үөрэххэ киирэллэрэ бобуллубутуттан сылтаан эгэ боксанан дьарыктаналларын көҥүллүөхтэрэ дуо, суох бөҕө буоллаҕа.
Бу тэрийбит федерациябыт үлэтин түмүгэр Ытык-Күөлгэ, Дьохсоҕоҥҥо, Дэбдиргэҕэ, Даайа Амматыгар, Чөркөөххө, Харбалаахха, Чычымахха хамнастаах тренердэр оскуола, СПТУ оҕолорун боксаҕа эрчийэр буолбуттара. Онон республикаҕа Тааттаҕа бокса баар диэн билиммиттэрэ. Билигин улууска 1 эрэ тренер Бысыин Николай Николаевич Дьохсоҕоҥҥо олорон Ытык Күөлгэ оҕолору эрчийэр. Нууччаҕа өс хоһооно баар «один на поле не воин» диэн, оттон бу өс хоһооно киниэхэ сөп түбэспэт.
Ону биир маннык холобуртан көрүөххэ сөп. 30.01.25 Саха Сиригэр бокса тэриллибитэ 80 сылынан Дьокуускай куорат аҕа баһылыга, республикаҕа бокса федерациятын салайааччытын солбуйааччы Евгений Николаевич Григорьев республика саамай бастыҥ, инникилээх боксердарыгар спортивнай форманы туттарда. Форманы Александр Максимов салайааччылаах “Таҥас” диэн олохтоох тэрилтэ тикпит. Эдэр уолаттартан 5 уол форманы ылар чиэскэ тигистэ.
Бу 5 уолтан иккитэ Антон Сивцев, Борис Габышев Таатталар. Онон республика 5 бастыҥ боксеруттан иккитэ Таатта буолбута бу үчүгэй көрдөрүү дии саныыбын. Аны форма ылбыт 5 уолтан спорт маастара Никита Малгин эмиэ Таатта. Ол гынан баран кини куорат ДЮСШ дьарыктаммыта. Кини бокса баар улууһуттан кэллэҕэ дии, эйгэ сабыдыала диэн эмиэ баар ээ. Онон Тааттаттан 3 бастыҥ боксер форма ылла диэхпитин сөп.
Дьэ бу республикаҕа үчүгэй көрдөрүүлээх бокса секцията көрдөбүлгэ эппиэттиир эрчиллэр зала суох. Республикаҕа бокса оскуолатын директорыттан Максим Аммосович Куприяновтан эбии штат туруорса сатыыбыт даҕаны, кини грушалар куруук ыйанан турар көрдөбүлгэ эппиэттиир заллаах буоллаххытына эрэ биэрэбин диир. Республикаҕа боксаны төрүттээбит Арсен Петров биир дойдулаахтара улууска бокса күүскэ сайдарыгар сөптөөх усулуобуйаны кыайан тэрийбэтибит.
Быйыл Тааттаҕа Манчаары оонньуулара буолалларынан улахан спортивнай саала тутулла турар, онон сибээстээн улуус боксердара, боксаны сэҥээрээччилэрэ улуус салалтатыттан боксаҕа сөптөөх усулуобуйаны тэрийэллэригэр көрдөһөбүт. Таатта улууһугар бокса федерациятын тэрийээччи, федерация бастакы салайааччыта Иван Гарильевич Неустроев. Хаатыскаҕа уҥаттан 2-с Никита Малгин, 3-с Борис Габышев, 5-с Антон Сивцев.
И.Г. Неустроев.