Самаан сайын устата силигилии сиппит оҕуруот аһын арааһын хаһаайкалар атырдьах ыйыттан хаһаанан саҕалыыллар.
Ытык Күөл олохтооҕо, урбаанньыт Туяра Савватеева сылын ахсын тиэргэнин кэрэчээн сибэккилэринэн киэргэтэр, күннээҕи остуолга сиэниллэр оҕуруот аһын олордор.
«Сибэкки олордуутунан үлүһүйбүтүм 4-5 сылыгар барда. Онтон оҕуруот чааһыгар, күүстээх оҕуруоччуппун дэммэппин. Дьон сиэринэн, ыал аайы үүнэри олордобун. Көрүүтүгэр да улахан кистэлэҥим суох», — диэн сэмэйэдик кэпсиир.
Ол эрэн Савватеевтар тиэргэннэрэ сайын ахсын сибэккинэн симэнэн, барыта уурбут-туппут курдук тупсаҕай оҥоһуулаах. Быйыл оҕурсулара, помидордара, кабачоктара өлгөм үүнүүнү биэрбит.
Туяра Анатольевна нэһилиэк, улуус общественнай олоҕор көхтөөх кыттыыны ылар кэрэ аҥар буолар. Кини улуустааҕы женсовекка чилиэн быһыытынан киирэн, туох баар тэрээһиннэри ыытыыга үлэлэһэр. Улууска биллэр-көстөр үлэлээх “Эдэр ийэлэр” диэн общественнай хамсааһын активыгар баар.
— 2023 сыллаахха Муоматтан сылдьар кийииит кыыс Ньургуйаана Аргунова социальнай ситимҥэ «Эдэр ийэлэр» диэн бөлөх тэрийбитэ. Ол бөлөххө бары биир саастаах, кыра оҕолордоох, биир интэриэстээх ийэлэр киирбиппит. Сыыйа билсэн-көрсөн, хардарыта өйөһөн, сатабылбытынан араас көрүҥҥэ (халадаай тигиитигэр, гипсовай оҥоһуктарга, уруһуйга, о.д.а.) маастар-кылаастары тэрийэн, бииргэ сир астаан, айылҕаҕа сылдьан иллэҥ кэммитин туһалаахтык атаарар буолбуппут.
Былырыын Тааттаҕа ыытыллыбыт Манчаары оонньууларын көрсө Ытык Күөлгэ П.А.Ойуунускай уулуссатыгар дьон хаамар тротуарын саламанан киэргэтиигэ ыҥырыы таһаарбыппыт. Соһуйуохпут иһин, киһи бөҕө ыҥырыыны ылынан, үбүнэн көмөлөһөн, биир уулуссаны былааннаан баран, Пекарскай уулуссатын эмиэ киэргэппиппит. Саламаларбытын күһүн хомуйан ылан баран, быйыл сайын эмиэ ыйаан, уулуссаларбытын сэргэхситтибит.
Эдэр ийэлэр чахчы барыга бары көхтөөхтөр, улууска ыытыллар хамсааһынтан туора турбаттар. Ол курдук, былырыын баҕа өттүлэринэн «Аһымал» акцияҕа кыттыһан, маҥнайгы кылааска киирэр оҕолоох ыалларга бэлэх туттарбыттара. Быйыл да бу үтүө хамсааһыны салҕыыр былааннаахтар.
Соторутааҕыта сайыҥҥы күлүмнэс күннэри баттаһа эдэр ийэлэр Туяра Савватеева сибэккинэн симэммит тупсаҕай тэлгэһэтигэр түмсэн, өлгөм үүнүүлээх оҕуруотугар Наталья Антоеваҕа хаартыскаҕа түстүлэр.
Галина ПОЛУСКИНА.