Күндүтүк саныыр биир дойдулаахтарым! Олус судургута суох ол да буоллар кырата суох ситиһиилэрдээх, элбэх үтүө түгэннэрдээх сыл ааһан эрэр. Ааһан эрэр сылы махталынан атаарыах тустаахпыт, үүнэн эрэр сылы эрэлинэн көрсүөхтээхпит. Үүнэр сылга хас биирдии улууһум олохтооҕор, хас биирдии дьиэ кэргэммитигэр ил-эйэ эҥэрдээх, уйгу-быйаҥ үктэллээх нус-хас толору дьоллоох дьоһун олох олохтонуохтун, сиэрдээх, үтүө санаа өрөгөйдүөхтүн, ыллыктаах ыраас санаа төрүттэниэхтин, кэскиллээх кэтит санаа кэккэлиэхтин, саргылаах санаабыт саппаҕырбатын, үлүскэннээх үтүө санаабыт өлбөөдүйбэтин, кэскиллээҕи кэҥэтиэҕин, үйэлээҕи үөдүтүөҕүн, чэгиэн чэбдик туруктаныаҕын, этэҥҥэ эрэ буолуоҕун. Төрөтөр оҕобут түөнэ маҥан түөрэҕэ түҥнэстибэтин, үрдүк үөрүүнү, сөҕүмэр ситиһиилэри билиэҕин. Сүөһүбүт-аспыт этэҥҥэ дьылы туоруохтун, төлөһүйэн, тупсан, үксээн иһиэхтин. Үлэһит үтүө дьоммут үлэлэрэ-хамнастара үтүө түмүктэннин, эрэйдэрэ тилиннин, ыллам-ыраас майгылаах ыччат дьоммут үөрдэ турдуннар, аҕам саастаах дьоммут кэрэтик кырыйдыннар, мэлдьи ытыктабылга, болҕомтоҕо сырыттыннар. Тапталлаах Тааттабыт күн-түүн ахсын ситиһиилэринэн киэркэйэн иһиэхтин, тутууларынан тупсуохтун, саргыта улаатыахтын диэн үтүө тылларбын анаатаҕым буолуохтун. Үүнэр сылга барыбытын долгутар анал байыаннай дьайыы түмүктэнэн, иллээх-эйэлээх олох эргийэн, хорсун хоодуот уолаттарбыт этэҥҥэ сылдьан төрөөбүт төрүт дойдубутугар, дьиэ кэргэттэригэр эргиллэн кэллиннэр. Күндү доҕоттор! Кэлэр сылга хас биирдии киһиэхэ, дьиэ кэргэҥҥэ, нэһилиэккэ уонна улууспутугар үгүс былааннар, инники соруктар тураллар. Сүрэхпит баҕатынан, өйбүт-санаабыт кыайарынан, илиибит эрчиминэн, түмсүүлээх үлэбитинэн кыайан-хотон иһиэҕин, бэйэ-бэйэбитигэр харыстабыллаах сыһыаны олохтуоҕун, хайдах да түгэҥҥэ өйөһөр буолуоҕун. Тапталлаах Тааттабыт албан аата айхаллана туруохтун. Махтал буоллун бар дьоммор. Үүнэн эрэр саргылаах саҥа 2024 сылынан эҕэрдэ. Бары үтүөнү кытта норуот депутата Прокопий Рахлеев
Тапталлаах Тааттам олохтоохторо
