Улуу Суорун ыйыгар Тааттаҕа «Виртуальный музей колоколов Сибири. Мультимедийная энциклопедия» диэн бырайыак чэрчитинэн Новосибирскай куораттан Колокольнай Искусство Сибиирдээӄи киинин сотрудниктара, Саха сиригэр эрдэ хаста да кэлэн куолакаллары үөрэппит бэйэтэ звонарь идэлээх улахан доҕорбут, Саха сирин куолакалларын сырдатар 2021с. «Сибирская звонница» сурунаал 1-кы выпуһын сүрүн редактора Алексей Талакшин уонна литейщик-формовщик идэлээх Лев Инякин Чөркөөххө, Ытык-Күөлгэ, Чычымахха үлэлээтилэр.
Кинилэр Бүтүн Сибиир куолакалларын аныгы технологиянан үөрэтэн биир ситимҥэ угар бырайыагы Дойду Президенэ культураны көҕүлээһинин фондата бэйэтинэн өйөөн, 2026 сыл ахсынньы ыйга түмүктэнэрин кэпсээн туран, эһиил бу ыйга Д.К.Сивцев – Суорун Омоллоон төрөөбүтэ 120 сылыгар аналлаах тэрээһиҥҥэ кыттан, Чөркөөх музейын куолакалларын лоҥкуначчы охсон дьон көрүүтүгэр истиитигэр таһаарар буоллар диэн баҕа санааларын үллэһиннилэр.
Ол инниттэн Чөркөөх музейын сүрүн объегар — Тааттатааҕы Николаевскай таҥара дьиэтин куолаканньатыгар тиийбэт куолакалларын ситэрэн эбии булан оҥорторон, уонна манна миэстэтигэр куолакаллары охсор анал тирээбили оҥорторор наадатын эттилэр. Иккиэн даҕаны куолакал дьыалатыгар маастар дьон, куолакаллары хайдах наардаан ыйыырга уонна охсор анал тэрили сөпкө туруорарга сүбэ-ама буолуохпут, баҕалаах киһини Новосибирскайга звонарь идэтигэр үөрэтиэхпит уонна эһиил баччаларга бэйэбит кэлэн үлэбит түмүгүн дьон-сэргэ көрүүтүгэр таһаарыахпыт диэн ис сүрэхтэриттэн мэктиэлээн эппиттэрин тиэрдэбин.
Изабелла Жерготова, Чөркөөх музейын специалиһа.