С.Р. Кулачиков- Эллэй аатынан Чычымах орто оскуолатыгар өр сылларга физкультура уонна ОБЖ учууталынан айымньылаахтык, ситиһиилээхтик үлэлээбит Артур Николаевич Иванов сырдык аатыгар улуустааҕы «Снежный барс» күрэхтэһии буолан ааста. Барыта 9 хамаанда кыттыыны ылла.
Биһиги үөрэхтээһиммт холбоһугун хамаандатын Владислав Сергеевич Халыев уонна Татьяна Прокопьевна Слепцова бэлэмнээн кытыннардылар. Биһиги оҕолорбут бары көрүҥҥэ эриэ-дэхси кытыннылар. Саша Оконешников салгын саатынан ытыыга, абсолютнайга бастакы миэстэни ылла. Уопсай түмүккэ үһүс бириистээх миэстэҕэ тиксэн, үөрүү өрөгөйө буолла. Улуус үрдүнэн бастакы миэстэни Ытык Күөл иккис нүөмэрдээх оскуолата ылан, өрөспүүбүлүкэҕэ Таатта улууһун көмүскүүр чиэскэ тигистилэр. Чычымах оскуолата үрдүк таһымҥа тэрийэн ыыппытын бэлиэтиир наадалаах. А.Н.Иванов кыргыттара тэрээһиҥҥэ көхтөөх кыттыыны ыллылар.
Маннык тэрээһиннэр Ийэ дойдуга бэриниилээх буоларга, бэрээдэккэ, эппиэтинэстээх буоларга иитэллэринэн улахан суолталаахтар!
Валентина Кривошапкина, Харбалаах.