Үс ТХПК: “Уолба”, “Эрэл” (Дэбдиргэ), уонна “Байаҕантай” (Баайаҕа) кыттыһаннар, быйылгыттан Егор Чахов салайааччылаах “Байым” тыа хаһаайыстыбатын потребительскай кооператив тула түмсэн үлэлииллэрин туһунан сиһилии суруйбуппут.
Сааскы ыһыыттан саҕалаан, күрүө тутуутугар, от, хомуур үлэтигэр барытыгар биир сомоҕо күүс буолан үлэлии-хамсыы сылдьаллар. “Уолба” ТХПК салайааччыта Семен Андросов бэйэтин уолаттарын уонна студеннары көмөлөһүннэрэн Таатта уҥуоргу бааһыналары 7,5 км аныгы матырыйаалынан күрүөлээтилэр.
Ааспыт нэдиэлэтээҕи туругунан 350 тоннаны оттоотулар. Данил Попов уонна Иннокентий Ноговицын салалтатынан икки бааһынанан билигин да оттуу сылдьаллар.
Уолбаҕа билигин бурдугу “силосной рукав” диэн аныгы ньыманан хомуйа сылдьаллар: комбайнер Аркадий Рахлеев, суоппар Владислав Басов, саҥа агрегаты үлэлэтэр Иван Боппосов, механик Эдуард Винокуров. “Уолба” ТХПК салайааччыта Семен Андросов бэйэтэ тэҥҥэ үлэлэһэ сылдьар. 50-ча тонна бурдугу рукавка уктулар, биирдии рукавка 100 тонна киирэр. Орто күөл бааһынатыгар 100 га сиргэ бурдук ыһыллан турар, онтон 4/1 хомулунна. Күҥҥэ ортотунан 4 рейс оҥоһуллар, онно 8 бункер киирэр, биир бункера 2,5 тонналаах. Бу үлэ кэнниттэн соломону хаһааныы, сири бэлэмнээһин, күөх маасса хомуура уонна оттоон бүтэн кыстыкка киириигэ үлэлиэхтээхтэр.
Василена Власова