Кырдьаҕас Баайаҕа уустара былыр былыргыттан болгуо тааһы уһааран, онтон тимири ылан, оҥоһуктарын оҥороллоро. Аныгы кэм уустара дойдуларыгар хас да төгүл тимири уһаарбыттара. Тимир ууһа Б.Ф.Неустроев-Мандар Уус көҕүлээн, баһылык Р.Р.Романов турунан, бастакы уһаарыы ыытыллыбыта. Үс сыллааҕыта этнограф, уус Н.И.Егоров-Баайаҕыын былыргы уһаарыыны чинчийэн, ол ньыматынан уһаарыыны тэрийбитэ.
Быйылгы уһаарыы уратытынан Баайаҕа үрэҕэ Аллан өрүскэ түһэр тардыытыттан анаан аҕалыллыбыт болгуону уһаарыы буолар. Уһаарыыны көҕүлээччинэн «Мандар кыһата» сайыҥҥы оскуола уһуйааччыта, СӨ норуотун уус-уран оҥоһуктарын маастара Иван Иванович Неустроев буолар. Уһаарыы балаҕан ыйын 8 күнүгэр Мандар Уус алгыһынан саҕаланна. Бу күн Баайаҕа аатын ааттатар эдэр уустар түмсэн, илиилэринэн-атахтарынан тутан-хабан, тимири уһааран, олохторугар биир умнуллубат түгэни хааллардылар. Сыралаах үлэ түмүгүнэн, 2 кг 700 гр тимир ылылынна.
«Мандар Уус» киин пресс-киинэ.