Мин ыалдьан үс ый балыыһаны кэрийэн баран, дьиэбэр кэлэн, бэйэм эмтэнэ олоробун. Дьиэм чоҕунан оттуллар. Билэргит курдук, билигин эмп сыаната ыараан, биэнсийэҕэ олорор дьон күннэтэ үгүс кыһалҕаны көрсөбүт. Чоҕум бүтэн, тута сыанатын төлүүр кыаҕым суох буолан, Харбалаахтааҕы «Төлөн» чох разреһын генеральнай дириэктэригэр, сыыйа 2-3 ыйга төлүүргэ көрдөһөн, биир массыына чоҕу биэрэригэр сайабылыанньа суруйбутум. Дириэктэр Прокопий Дмитриевич Рахлеев мин кыһалҕабын ылынан, көрдөһүүбүн өйдөөн, үлэтигэр төһө да бириэмэтэ суох буоллар, биир массыына чоҕу материальнай көмө быһыытынан биэрэргэ быһаарбытыгар, Прокопий Дмитриевичка, кини кэллэктиибигэр муҥура суох итии-истиҥ махталбын тиэрдэбин.
Билигин дьон кыһалҕатын өйдүүр, көмөлөһөр салайааччылар суохтарын кэриэтэ. Биһиги Мойуона оройуонугар ууга барбыппытынан сибээстээн биэрбит дьиэлэригэр 2008 сылтан олоробут.
Прокопий Дмитриевич Рахлеев, быйыл ,(Ил Түмэн) Судаарыстыбаннай Мунньаҕын дьокутаатынан талыллан үлэлээн эрэр. Кини дьон туһугар дьиҥ-чахчы үлэлииригэр эрэллээхпит.
Прокопий Дмитриевич! Кэлэн иһэр 2024 сылынан эһиги дьиэ кэргэни, үлэлиир, салайар кэллэктиипкитин ийэлии истиҥ тылынан эҕэрдэлиибин! Баҕарабын үлэҕитигэр үрдүк ситиһиилэри, олоххутугар дьолу, кытаанах доруобуйаны.
Саха өһүн хоһооно «үтүөнү төһөнөн оҥороҕун, бэйэҕэр үтүөнэн эргиллиэ» диэн эҕэрдэни кытта.
Өрөспүүбүлүкэ Ытык кырдьаҕаһа, улуус, СӨ Бочуоттаах олохтооҕо, сэрии сылын оҕото, үлэ бэтэрээнэ, бочуоттаах сынньалаҥҥа олорор Р.С. Посельская.
19.12.2023 с.