Угут сылларга алаасnарбыт күөллэргэ кубулуйдулар, от үрэхтэрбит көҥүс буоллулар. Ити курдук көстүү Таатта үрэх уонна Амма өрүс икки ардыгар сытар Дьиэбэгэнэ от үрэххэ буолла.
Дьиэбэгэнэ Кыйы сириттэн саҕаланар уонна Дьохсоҕон нэһилиэгин туһаайыытынан Тааттаҕа түһэр. Үрэх сүнньүгэр улахан күөллэр бааллар. Молоҕоойу, Имиттэ, Дьуойа, Сыырдаах, Улахан Күөл. Бу эбэлэргэ былыр былыргыттан көмүс хатырыктаах хойуутук үөскээн элбэх көлүөнэ дьону аһатан кэллэ. Бу эбэлэрбит Чөркөөх сиригэр киирэллэр.
Эрдэ кураан дьылларга үрэх көҥүһэ Дьохсоҕон сиригэр эрэ этэ. Кэнники сылларга шелкопряд тыабытын сиэн, Кыйы сиригэр тыа баһаарын түмүгэр уонна уулаах дьыллар буоланнар көҥүс эбэлэрбитигэр тиийэн кэллэ. Ол түмүгэр күөллэрбит көһөн эрэллэр. Ити күөллэргэ бултуур Дьон мустаннар быһыттары оҥоруу үлэлэр буолуталаатылар.
Молоҕоойуга бу кэнники сылларга нэһилиэк дьаһалтата уонна күөллээх дьон көмөлөрүнэн хас эмит бүк быһыт оҥоһулунна. Таас кутуута олус көдьүүстээҕин көрдөрдө. Бу сылларга таас быһыкка нэһилиэк дьаһалтата, Ил Түмэн депутата ВН Лебедев, күөлгэ бултуур балыктыыр Вырдылиннар, Яковлевтар, Николаевтар, Мосорин (Сылгыһыттар) кыттыһан үлэ ыыттылар.
Былырыын таас быһыт ойоҕоһунан тоҕо охсон күөлбүт куоппута. Быйыл саас Молоҕоойулар мустаннар субуотунньуктаатылар. Икки прицеп кумаҕы В.В. Вырдылин киллэрэн биэрдэ, куулу «Байдам», «Эконом» бэкээринэлэрэ биэрдилэр. Тиийбэтин атыылаһан кумаҕы кууллаан быһыт оҥордулар. Эбии икки прицеп тааһы киллэрэн куталлар. Быһыппыт табылыннаҕына аны кэлэр кэмнэргэ муҥха буолуо турдаҕа. Чөркөөххө үгэс быһыытынан муус аннынан муҥха киэҥник тэриллэр. Кэлбит киһи барыта собоҕо тиксэн үөрүү үксүүр. Улуустан СВОҕа сылдьар уолаттарга босхо түҥэтиллэр үтүө үгэс тутуһуллан кэллэ.
Быһыппыт табылыннар үчүгэй буолуо этэ. Бары күөллэргэ быһыттар оҥоһулланнар, сыыйа Дьиэбэгэнэбит оһон, от үрэххэ кубулуйан, урукку оҥкулугар түһэрэ буоллар бэрт этэ.
Г.Г. Вырдылин