Муус устар 27 күнүгэр Арассыыйаҕа Дьиэ кэргэн, Саха сиригэр Оҕо сылыгар анаммыт Ыам ыйын 1 күнүнээҕи тэрээһиннэр чэрчилэринэн, дьиэ кэргэҥҥэ чөл олоҕу, спорду пропагандалыыр, эт-хаан бэлэмин, хамсаныыны көҕүлүүр сыаллаах улуус үөрэх эйгэтин «Ийэм, аҕам уонна мин — спортивнай дьиэ кэргэн» күрэх ыытылынна. Күрэҕи Ытык Күөл Алампа аатынан 1 нүөмэрдээх оскуолатын профсоюзнай комитета (предс. Большаков М.Н.), «Күндүс» эдэр педагогтар ассоциациялара (сал. Егоров К.Л.) иилээн саҕалаан үрдүк таһымҥа тэрийдэ.
Күрэх кыттыылаахтарын Өрөспүүбүлүкэ күнүнэн, 1маай кэлэн иһэринэн, кыайыыны хотууну баҕаран туран үөрэх салалтатын начальнига Дягилев И.И., улуус үөрэх үлэһиттэрин идэлээх сойууһун бэрэссэдээтэлэ Борисов П.В., күрэх сүрүн судьуйата Большаков М.Н. эҕэрдэлээтилэр.
«Чуораанчык» оҕону сайыннарар киин эбии үөрэхтээһин педагога Варвара Рахлеева «Сахам сирин таптыыбын» диэн патриотическай тыыннаах, ылбаҕай ырыатынан, сахалыы таҥаһынан Өрөспүүбүлүкэ күнүнэн бэйэтин эҕэрдэтин тиэртэ.
Кыттааччылар 7 араас хабааннаах түһүмэҕи ааһан кыайыылаахтары быһаардылар. Бастакы миэстэҕэ Оҕо спортивнай оскуолатыттан спорду кырдьык да өрө тутар оҕунан ытыынан, гиирэнэн утумнаахтык дьарыктанар Вырдылиннар – Аина, Екатерина Петровна, Гаврил Гаврильевич 1 миэстэҕэ тахсан кыайыы өрөгөйүн биллилэр.
Иккис бочуоттаах миэстэҕэ биир очконан хаалан А.Е. Мординов аатынан лицей хамаандата Ытык-Күөл 2-с оскуолатын 3 кылааһын үөрэнээччитэ Вася, Наталья Васильевна, физкультура учуутала Лука Анатольевич Даниловтар таҕыстылар. Кыайыыга дьулуурдарын көрдөрдүлэр.
Үһүс миэстэни Уолба оскуолатыттан Алина, математика учуутала Айыына Альбертовна, оскуола директора Алексей Валентинович Аржаковтар ыллылар. Бу дьиэ кэргэн сүрдээх активнай позициялаах, мэлдьи инники күөҥҥэ сылдьар, эдэр да буоллаллар, үтүө холобур буолар ыаллар.
Тыараһа оскуолатыттан Васильевтар дьиэ кэргэн капитана Валерий, «Чуораанчык» оҕону сайыннарар киинтэн Бочониннар дьиэ кэргэн уоллара Эрсан 1 кылаас үөрэнээччилэрэ, саастарынан атын хамаанда капитаннарыттан 3-4 сыл балыс да буоллаллар, тэбис-тэҥҥэ күрэхтэһэн, үтүө өйдөбүлү хааллардылар, кэлэр сылларга күрэхтэһэргэ уопут ыллылар, инникитин спорка үрдүк ситиһиилэниэхтэрэ диэн эрэнэбит.
Таатта улууһун үөрэх үлэһиттэрин идэлээх сойууһа