“Октябрьскай нэһилиэк” тыа сирин түөлбэтэ Өрөспүүбүлүкэбит ыытар олохтоох көҕүлээһини өйүүр бырагыраамаҕа (ППМИ) сылын аайы кыттан элбэх бырайыактары олоххо киллэрдибит. Ол курдук, кылаабыһаны күрүөлээһин, ыраас уунан хааччыйарга аналлаах оборудование туруута, КСК өрөмүөнэ, Хадарҕааччы түөлбэҕэ уулусса уотун тардыыта, оскуола аттынааҕы суолга муоста тутуута, сири хорутар булууктаах уонна отваллаах гусеничнай бульдозер атыылаһылынна.
Биһиги нэһилиэкпититтэн төрүттээх урбаанньыттарбыт ыҥырыыбытын ылынаннар уопсайа 500 тыһыынча солкуобай спонсорскай көмөнү оҥордулар, куруутун маннык көмө оҥороллоругар, өйүүллэригэр дириҥ махталбытын тиэрдэбит.
Эһиилги 2025 сыллаахха “Уунан хааччыйыы” диэн хайысханан нэһилиэккэ сайыҥҥы уу ситимин турбаларын атыылаһан уларытыыга куоластааһын түмүктэннэ уонна олохтоохтор уопсай мунньахтарынан бигэргэннэ. Бу нэһилиэкпит олоҕор улахан суолталаах буолуо диэн бары билэбит уонна эрэнэ күүтэбит.
Олохтоох көҕүлээһини өйүүр бырагыраамаҕа сылын аайы түмсүүлээхтик кыттан, биир сомоҕо буолан саҥаттан саҥа киирбиилэри дабайан иһиэҕин диэн баҕа санаабытын аныыбыт уонна араас хайысхалаах бырайыактар олоххо киирэллэригэр нэһилиэкпит хас биирдии олохтооҕо өйөбүл буолан, инникитин да тапталлаах Чөркөөхпүт сылын аайы сайдан, тупсан, кэлэр кэскилбитин бииргэ түстүөҕүҥ диэн ыҥырабыт.
А.Вырдылина, олохтоох дьаһалта баһылыгын солбуйааччыта.